Ang pagpatawad amo ang pagpasaylo sa nakasala nga wala na sing kaakig kag paghinakit. Indi ini pagpakadiutay sa sala ukon paghunahuna nga daw wala lang ini natabo.

PRINSIPIO SA BIBLIA: “Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa.”—Colosas 3:13.

“Kon palangga mo ang isa, wala ka nagapokus sa iya mga kakulangan kundi sa iya pagtinguha nga mangin maayo.”—Aaron.

Ang paghinakit makahalit sa imo lawas kag emosyon, kag pati na sa inyo pag-asawahay.

“Isa ka bes, nangayo sing pasaylo ang akon bana kay nasakitan gid ako sa iya ginhimo. Nabudlayan ako magpatawad sa iya. Ginpatawad ko sia, pero naghinulsol gid ako kay wala ko ini ginhimo dayon. Indi gid maayo ang nangin epekto sini sa amon pag-asawahay.”—Julia.

TILAWI INI

Sa masunod nga masakitan ka sa ginhimo ukon ginsiling sang imo bana ukon asawa, pamangkuta ang imo kaugalingon:

• ‘Tama lang bala ako ka sensitibo?’

• ‘Daku gid bala ang iya sala nga kinahanglan gid mangayo sia sing pasaylo, ukon basi puede ko man lang ini palampason?’

ISTORYAHI NINYO NGA MAG-ASAWA

• Sa masami, daw ano ka dugay kami magpatawad sa isa kag isa?

• Ano ang mahimo namon para mas madali namon mapatawad ang isa kag isa?

MGA PANUGDA

• Kon nasakitan ka, indi pagpamensara nga ginhungod gid ini sang imo bana ukon asawa.

• Tinguhai nga palampasa ang ginhimo sang imo bana ukon asawa nga nagadumdom nga “kita tanan nagakasandad sing madamong beses.”—Santiago 3:2.

“Kahapos magpatawad kon pareho kami nga nakasala, pero mabudlay kon isa lang ang may sala. Dapat gid magpaubos para mabaton ang pagpangayo sing pasaylo kag makapatawad.”—Kimberly.

PRINSIPIO SA BIBLIA: “Makighusay ka gilayon.”—Mateo 5:25.