Sang Abril 21, 2024, gin-release ni Brother Dean Jacek, isa ka miembro sang Branch Committee sa Pilipinas, ang libro sang Biblia nga Mateo sa Filipino Sign Language sa isa ka espesyal nga programa nga ginhiwat sa branch office sa Pilipinas sa Quezon City. May kabilugan nga 413 ka kauturan ang nag-attend sa programa sing face-to-face. May 3,998 man nga nag-tie in paagi sa videoconference halin sa bilog nga pungsod. Puede na dayon ma-download ang gin-release nga libro sang Biblia sa jw.org kag sa JW Library Sign Language nga app.

Ginabanta nga may mga 500,000 ka tawo ang nagagamit sang Filipino Sign Language. Ang pinakauna nga Filipino Sign Language nga kongregasyon naporma sa Quezon City sang 1999, kag sang 2011, gin-translate ang una nga base sa Biblia nga mga publikasyon sa sini nga lenguahe. Subong, sobra 3,000 ka kauturan ang nagaalagad sa 72 ka kongregasyon kag mga group nga nagagamit sang sign-language sa bilog nga Pilipinas.

Amo ini ang pinakauna nga kompleto nga libro sang Biblia nga gin-translate sa Filipino Sign Language. Ang isa ka apa nga brother nagsiling: “Antes sini nga release, may pila lang ka bersikulo sa libro sang Mateo ang available sa amon lenguahe. Daw pareho ini sa isa ka daku nga puzzle nga kulang ang mga piyesa. Pero subong, makita na namon ang kabilugan sini!” Ang isa ka elder nga nagaalagad sa isa ka kongregasyon sa Filipino Sign Language nagsiling: “Madamo sang leksion sa libro sang Mateo nga makabulig gid sa pag-shepherding kag pagpalig-on sang kongregasyon. Halimbawa, ang Mateo 5:23, 24 nagapalig-on sa aton nga makighidait sa aton mga utod kon may indi pag-intiendihanay nga matabo. Nagapasalamat gid ako kay Jehova sa sining importante nga mga leksion nga nangin available sa amon lenguahe.”

Nalipay kita sa gin-release nga libro sang Mateo sa Filipino Sign Language, nga makabulig gid sa mas madamo nga sinsero nga tawo nga makabenepisyo sa Pulong sang Dios.—Mateo 7:24, 25.