Jän, Ngöbö tärä ye Biblia tä mike gare metre. Ne madakäre, Biblia tä driere nie ni rabadre tödeke Ngöböi yekäre, nikwe ja tötikadre aune kukwe ngwarbe bätäkä ngwarbe drieta ye nikwe ñaka kadre ngäbiti jerekäbe (1 Juan 5:20; Romanos 12:1). Ngöbö tärä drieta Bibliakwe ye ani mike ruäre gare jai.

•   Kä kwinta aune kä tibien tä ükaninte kwin aune jondron nire tärä ye tä mike gare sribekä tärä. Biblia tä niere: “Ju kwatirekwatire mikata ye abko ni tärä iti käta mike, akwa Ngöbö abko käkwe jändrän jökrä dätebare” (Hebreos 3:4). Kukwe nieta nete ne ñan raba tuin ütiäte, akwa nitre kwati ja tötikaka ie tuin metre. a

•   Ñokäre nita nüne ye ni jökrä tö mikai gare jai. Jondron nünankäre tä nemen nikwe, akwa ñokäre nita nüne ye ñan tä nemen gare nie ngwane, jata nemen ruin ngwarbe nie aune ni ñaka tä nüne kä jutobiti. Kukwe ye Biblia tä kädeke “kukwe ja üaire ribeta jai”, ye abokän ni tö Ngöbö mikai gare jai aune mikai täte meden gärätä arato (Mateo 5:3; Apocalipsis 4:11). Ngöbökwe ni sribebare ne kwe ni töi rabadre mikabätä gare jai aune mikabätä täte. Ye tä mike gare niara tärä, tä ni tarere aune tö ni tuai ja kete jabe (Mateo 4:4).

•   Profecía keta kabre tikani Bibliabätä ye siklo nikanina kwati krubäte ta ngwane namani bare, akwa rabadre bare ño tikani ye erere namani bare täte. Kukwe tikani ño erere namani bare ye tä mike gare ñan ni kä tibienbätä ai käkwe kukwe ye mikani gare (2 Pedro 1:21).

•   Nitre Biblia tikaka ye ie kukwe científico nämäne gare bäri nitre nünanka kä ye näire kräke. Ñodre, nitre kirabe ye nämäne nütüre kä tibien ne elefante, jabalí, toro o jondron nire mada nämäne ketebätä. Akwa Biblia tä niere Ngöböta “kä tibien mike nakainkä deme kwin” (Job 26:7). Ne madakäre, Biblia käkwe mikani gare kä tibien ne abokän “bolore” (Isaías 40:22). Kukwe ye nämäne gare nitre Biblia tikaka ie ñobätä ñan aune Ngöbökwe mikani gare ietre ye nitre kwati tä niere.

•   Nitre ñaka Ngöbö mike era jai tä kukwe keta kabre ngwentari ye Biblia tä mike gare, ñodre, Ngöbö ye töi kwin aune dite kri, ¿akwa ñobätä kukwe käme nuainta krubäte aune ja tare nikata? ¿Ñobätä iglesia keta kabre köböite kukwe kwin nuain ñaka? (Tito 1:16). Kukwe ngwantarita ne aune mada ye Biblia tä mike gare, ye raba nitre ñaka Ngöbö mike era jai ye dimike tödeke ie.