LI CAGILI 1
Tin yaa dugi Jeova po, li pamanli n yaa ye yi ñiigili nni
“Mi cilima o Tagido den tagi joa leni pua.” —Matie 19:4
Jeova a U Tienu n tie yua n kaani li ciciñiigili. Biibili wangi ke O tagi o cicili pua yeni, “ki gedini o o joa kani”. Adama pali den mangi ŋali ke o yedi: “Diidi ki le yua n tie n kpabili yaa kpabili leni n gbanandi yaa gbanandi.” (Mi Cilima 2:22, 23) Jeova li baa bua yaaba n ñiigi n yaa pia li pamanli.
Li fidi ke a ñiigili daali, a den tama ke a yema nni bonli kuli baa tua nani ŋan bua maanma. Ama i moamoani po, a bani ke yin li bua yi yaba maanma kuli, a paka baa ye. (Korenti Yaaba Tikpiali 7:28) Li tili nne pia yaa tundi n ñan Biibili nni, ke li baa fidi todi, a ñiigili leni a diegu yema n yaa mani.—Pisomi 19:8- 11.
1 TIN TUO JEOVA N BUA TIN TIENI YAALA
BIIBILI N YEDI YAALA: O ja n tie ku diegu kuli yudaano.—Efesi Yaaba 5:23.
A yaa tie podaano, ŋan bandi ke Jeova bua ŋaa kubi a diegu niba leni mi yanduanma. (Pieli Tikpiali 3:7) O tagi o pua ke o tie o ja todika. O go bua, ja kuli n ŋanbi ki kubi o pua mi buama nni leni mi fangima nni. (Mi Cilima 2:18) Li ŋani ŋan yaa bua a pua ŋali o bonbuadikaali n gaa a yaa yaala liiga.—Efesi Yaaba 5:25-29.
A yaa tie pua, Jeova bua ŋan ŋanbi ki kpiagi a calo, ki go todi o ku diegu kubima nni. (Korenti Yaaba Tikpiali 11:3; Efesi Yaaba 5:33) O yaa ta li yanjagili, ŋan todi o ki go tebini o leni a pali kuli. (Kolosi Yaaba 3:18) A yaa tiendi la, a baa tua poŋamo Jeova leni a calo nunbu po.—Pieli Tikpiali 3:1-6.
ŊAN BAA FIDI KI TIENI YAALA:
-
Ŋan buali a pua bi a calo ŋan baa tienni maanma ki tua jaŋamo bi poŋamo. Ŋan ŋanbi ki cengi o, ki go moandi ŋoadi wan baa yedi a yaala.
-
Je mani li juunli, kelima li baa waagi yin yuandi ki bandi yin baa tieni maanma ki pa yi lielo li pamanli.
2 YUA KULI N LINGI YAALA N BAA MANGI O LIELO PALI
BIIBILI N YEDI YAALA: Li ŋani yua kuli n yaa lingi o lielo ŋamu. (Filipi Yaaba 2:3,4) A calo bi a pua ŋani ki yaa pia li mayuli a nunbu po, ŋan tiadi ke Jeova bua o ŋoadikaaba “yama n dingi bi niba kuli po”. (Timoti Tilieli 2:24) “Yua yaa ñoabu n yua, poagiliti nani ki jugisiega yeni. Bi yanfuodanba mo yaa maama paagidi u gbanu.” Li ŋani tin guudi ti yuli leni tin maadi maanma. (Mi Kpanjama 12:18) Jeova fuoŋamo baa fidi ki todi yi, yin waani yi maama nni ke yi bua yi lielo, ki go bua ki tieni yaala n ŋani opo.—Galati Yaaba 5:22,23; Kolosi Yaaba 4:6.
ŊAN BAA FIDI KI TIENI YAALA:
-
Fini leni a pua bi leni a calo maama yaa gali, li ŋani ŋan jaani Jeova ki mia mi todima, ki fidi ki maadi leni mi yandingima.
-
Ŋan ŋanbi ki tia, ŋan baa yedi yaala leni ŋan baa maadi maanma.
3 BAA MANI YANTIAYENLI
BIIBILI N YEDI YAALA: Yi yaa ñiigi, yi baa tua “gbananyendi”. (Matie 19:5) Ama yin daa tie niba lie ke yi yantiana ki tata ba. Lanwani, li ŋani yi yantiana leni yi yama n taani yenma. (Filipi Yaaba 2:2) Mi taanyenma tie tiladi ti yaa bua ki ta a yanjaga. Biibili yedi: ‘A jaga baa cuoni bi tundikaaba yaa yabi.’ (Mi Kpanjama 15:22) Yi yaa bua ki ta li yanjagicianli, taani mani ki lingi Biibili tundi.— Mi Kpanjama 8:32,33.
ŊAN BAA FIDI KI TIENI YAALA:
-
Li booli yogunu, ŋan daa togidi a lielo i laabaali bi ŋan bani yaala bebe ka. Moandi mani wan bandi yaala n ye yi pali nni.
-
A yaa bua ki ta li yanjagicianli, yin yen boe leni yaba.
a Biibili wangi ke U Tienu pia li yeli, laa yeli tie Jeova