LI CAGILI 9
Tin kpiagi Jeova ku diegu nni
‘Yin gbaani ki kpiagi wani yua n den tagi tanpoli, leni ki tinga’.—Mi Doagidima 14:7
Nani tin bangi yaala li nee tili nni, Biibili pia yaa tundi n baa pa ti li pamanli ku diegu nni. Jeova bua tin baa li pamanli. O niani ke O yanbuama tienma yaa gaa liigi yi yema nni, “bonla kuli baa yuandi ki pugini yi po.” (Matie 6:33) O li bua yin tua o danli. Moandi ki tieni yaala kuli n baa fidi ki todi yi, yin tua O danli. Li tie tipo jigidi cianmoanle ti yaa tie U Tienu danli.—Matie 22:37,38.
1 MOANDI MANI YINBA LENI JEOVA DANLINGU N PUGINI
BIIBILI N YEDI YAALA: “N baa yaa tie yi po yi Baa, yinba mo baa yaa tie n bonjala leni n bonpola. O Diedo U Paaciamu Kuli Daano n yedi yeni.” (Korenti Yaaba Tilieli 6:18) U Tienu bua yin tua O danlimoano. Mi jaanma baa fidi ki todi yi. Jeova yedi ke yin ‘yaa jaandi yogunu kuli, ki da cedi.’ (Tesaloniki Yaaba Tikpiali 5:17) Li tie pamanle O po, yi yaa togidi O yaala n ye yi pala leni yi yanjaga nni. (Filipi Yaaba 4:6) Yi yaa taagi ki jaandi Jeova leni yi diegu niba, bi baa le ke Jeova tie nilo moamoani yipo.
Baa yi yaa maadi leni U Tienu yi jaanma nni, li ŋani yii cengi O moko. Yi baa fidi ki waani ke yi cengi O, yi yaa bangi ki go kpaagi Biibili yeni leni yaa tila n wangi Biibili maama fuuli. (Pisomi 1:1,2 ; Pisomi 77:12,13) Yi go baa fidi ki cengi U Tienu yi yaa caa Jeova Siedinba taana po yogunu kuli.—Pisomi 122:1-4.
Yi yaa bua ki pugini yinba leni Jeova danlingu paalu, li ŋani yin yaa wangi nitoaba yin bangi yaala Jeova po. Yi yaa tiendi ania, laa danlingu baa pugini.—Matie 28:19,20.
ŊAN BAA FIDI KI TIENI YAALA:
-
Daali kuli, ba mani li lenli ki cogi Biibili ki go jaani U Tienu.
-
Moandi mani, U Tienu ŋoadima tuona n yaa ye liiga yi yema nni, ki cie yi yaa baa fe mi fawaama.
2 KU DIEGU BIIBILI BANGIMA YOGUNU N TUA YIPO PAMANLI
BIIBI N YEDI YAALA: “Yin nagini U Tienu kani, omo baa nagini yi kani.” (Jaki 4:8) Li ŋani yin ñani o yogu yi diegu Biibili bangima po, ki moandi bonli bakuli n da jidi la. (Mi Cilima 18:19) Ama lan bebe ki dagidi ba. Li ŋani U Tienu n yaa ye yi yema nni daali kuli. Yi diegu niba yaa maadi U Tienu maama ke ‘yi ye yi diedi nni yaa yogunu, ke yi ye li sanceli yaa yogunu, yin baa duani yaa yogunu leni yin baa fii yaa yogunu;’ li baa pugini yua kuli danlingu leni U Tienu. (Mi Tiadima 6:6, 7) Ti baa fidi ki taa li yanjagili nani Josue. O yedi: “Mini leni n diegu yaaba wani, ti baa yaa ŋua Li Miali Diedo yo.”—Josue 24:15.
ŊAN BAA FIDI KI TIENI YAALA:
-
Ñani mani o yogunu yi diegu Biibili bangima po, bonli bakuli n da jidi la. Moandi mani lan dagidi yua kuli po.
