Biblu dọ dọ Jesu “yin hùhù to agbasalan mẹ, ṣigba yin hinhẹnwa ogbẹ̀ [yin finfọnsọnku] to gbigbọ mẹ.”​—1 Pita 3:18; Owalọ lẹ 13:34; 1 Kọlintinu lẹ 15:45; 2 Kọlintinu lẹ 5:16.

 Ohó Jesu lọsu tọn lẹ dohia dọ e ma na yin finfọnsọnku po agbasa gbẹtọ tọn po. E dọ dọ emi na na “agbasalan [emitọn] na ogbẹ̀ aihọn tọn” taidi ofligọ de na gbẹtọvi lẹ. (Johanu 6:51; Matiu 20:28) Eyin e ko fọnsọnku po agbasalan etọn po wẹ, ofligọ ehe ma nasọ yọnbasi ba. Ehe ma ka sọgan jọ, na Biblu dọ dọ e yí agbasa po ohùn etọn po do sanvọ́ “whladopo podọ kakadoi.”​—Heblu lẹ 9:11, 12.

Jesu yin finfọnsọnku taidi gbigbọ de bọ devi etọn lẹ ka mọ ẹn. Nawẹ enẹ yọnbasi gbọn?

•  Nudida gbigbọnọ lẹ sọgan ze agbasa gbẹtọ tọn do. Di apajlẹ, angẹli delẹ he wàmọ to hohowhenu tlẹ dù bo nù hẹ gbẹtọ lẹ. (Gẹnẹsisi 18:1-8; 19:1-3) Etomọṣo, yé gbẹ́ yin nudida gbigbọnọ lẹ bo sọgan lẹkọyi olọn mẹ.​—Whẹdatọ 13:15-21.

•  To fọnsọnku Jesu tọn godo, e ze agbasa gbẹtọ tọn do na ojlẹ de, dile angẹli delẹ ko wà do dai. Na e yin nudida gbigbọnọ de wutu, e penugo nado nọ sọawuhia podọ nado nọ bu sọn aimẹ to ajiji mẹ. (Luku 24:31; Johanu 20:19, 26) Agbasa wunmẹ voovo mẹ wẹ e sọawuhia te to ninọmẹ dopodopo mẹ. Gbọnmọ dali, nuhe Jesu dọ kavi wà wẹ gọalọna họntọn vivẹ́ etọn lẹ nado yọnẹn.​—Luku 24:30, 31, 35; Johanu 20:14-16; 21:6, 7.

•  To whenue Jesu sọawuhia apọsteli Tọmasi, e ze agbasa he go oṣó-pà tin te lẹ do. Jesu wàmọ nado hẹn yise Tọmasi tọn lodo, na Tọmasi ma yise dọ Jesu ko yin finfọn sọn oṣiọ lẹ mẹ.​—Johanu 20:24-29.