Họntọnjiji sọgan gọalọna mí nado tindo ayajẹ bosọ do kọdetọn dagbe to gbẹ̀mẹ. Họntọn dagbe lẹ gán yinuwado ode awetọ ji to aliho dagbe mẹ bo nasọ zọ́n bọ mí na do walọ dagbe.—Howhinwhẹn lẹ 27:17.

 Amọ́, Biblu dọna mí dọ nujọnu wẹ e yin nado yí sọwhiwhe do de họntọn mítọn lẹ. E sọ na mí avase nuhe gán jọ eyin mí do họntọn ylankan lẹ tọn. (Howhinwhẹn lẹ 13:20; 1 Kọlintinu lẹ 15:33) Họntọn mọnkọ lẹ gán zọ́n bọ mẹde na basi nudide nulú tọn kavi hẹn walọ dagbe etọn lẹ gble.

To hosọ ehe mẹ

•  Nawẹ yè nọ yọ́n họntọn dagbe de gbọn?

•  Apajlẹ họntọn dagbe tẹlẹ tọn go wẹ Biblu donù?

•  Be mẹde gán jihọntọn hẹ Jiwheyẹwhe ya?

•  Wefọ Biblu tọn he dọho gando họntọnjiji go lẹ

 Biblu plọnmẹ dọ họntọn dagbe jiji ma dona sinai do nudopolọ he họntọn awe lẹ nọ yiwanna kẹdẹ ji. Di apajlẹ, Salmu lẹ 119:63 dọmọ: “Họntọn wẹ mẹhe nọ dibusi we a lẹpo yin na mi gọna mẹhe nọ yìn gbedide towe lẹ.” Doayi e go dọ Biblu-kantọ lọ dọ dọ mẹhe jlo na hẹn homẹ Jiwheyẹwhe tọn hùn bo nọgbẹ̀ sọgbe hẹ nubiọtomẹsi etọn lẹ wẹ emi nọ de di họntọn.

 Biblu sọ zinnudo walọ dagbe he họntọn dagbe de dona do ji. Di apajlẹ:

•   “Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”—Howhinwhẹn lẹ 17:17.

•   “Họntọn delẹ tin he nọ wleawufo nado gídí ode awetọ, ṣigba, họntọn delẹ tin he nọ sẹpọ yede pẹkipẹki hú nọvisunnu.”—Howhinwhẹn lẹ 18:24.

 Wefọ ehelẹ plọnmẹ dọ họntọn nugbo de nọ yin nugbonọ, nọ yiwannamẹ, nọ jọmẹ bosọ nọ tlúalọ. Họntọn nugbo wẹ mẹhe go mí sọgan ganjẹ to whenue nulẹ to yìyì ganji na mí kavi whenue mí pehẹ nuhahun gbẹ̀mẹ tọn lẹ. Họntọn dagbe de na do adọgbigbo nado gbẹnuna mí whenue mí to nuṣiwa kavi whenue mí jlo na bayi nudide he ma sọgbe de.—Howhinwhẹn lẹ 27:6, 9.

 Biblu bẹ apajlẹ họntọn dagbe lẹ tọn hẹn he ma do owhe dopolọ, bo wá sọn akọ̀ po aṣa voovo po mẹ, bosọ tindo otẹn aṣẹpipa tọn voovo lẹ. Mí ni pọ́n apajlẹ họntọnjiji atọ̀n delẹ tọn.

•   Luti po Naomi po. Ovisi Naomi tọn wẹ Luti, podọ Naomi na ko yin mẹho na Luti taun. Gbọnvọna enẹ, akọ̀ he mẹ Luti wá sọn gbọnvona Naomi tọn. Mahopọnna vogbingbọn enẹlẹ, yé omẹ awe lẹ vẹ́ taun bosọ yiwanna ode awetọ.—Luti 1:16.

•   Davidi po Jonatani po. Dile etlẹ yindọ Jonatani yí owhe 30 do hugan Davidi, Biblu dọ dọ Davidi po Jonatani po “lẹzun họntọn vivẹ́ lẹ.”—1 Samuẹli 18:1.

•   Jesu po apọsteli etọn lẹ po. Jesu tindo aṣẹpipa do apọsteli etọn lẹ ji, na ewọ wẹ mẹplọntọ po oklunọ yetọn po wutu. (Johanu 13:13) Etomọṣo, e ma nọ pọ́n yé hlan di mẹhe ma jẹ nado yin họntọn etọn lẹ. Kakatimọ, Jesu vẹ́ taun hẹ mẹhe nọ setonuna nuplọnmẹ etọn lẹ. E dọmọ: “Yẹn ko ylọ mì dọ họntọn, na nuhe yẹn sè sọn Otọ́ ṣie dè lẹpo wẹ yẹn ko hẹn zun yinyọnẹn na mì.”—Johanu 15:14, 15.

 Mọwẹ, e yọnbasi na gbẹtọvi lẹ nado jihọntọn hẹ Jiwheyẹwhe. Biblu dọmọ: “Nugbonọ lẹ wẹ nọ jihọntọn pẹkipẹki hẹ Ẹ.” (Howhinwhẹn lẹ 3:32) Enẹ dohia dọ, Jiwheyẹwhe nọ jihọntọn hẹ mẹhe nọ tẹnpọn nado zan walọ dagbe bo yin nugbonọ bosọ nọ na sisi mẹdevo lẹ gọna mẹhe nọ dovivẹnu nado nọgbẹ̀ sọgbe hẹ nue Jiwheyẹwhe dọ gando walọ dagbe po oylan po go lẹ. Di apajlẹ, dawe nugbonọ lọ Ablaham yin yiylọdọ họntọn Jiwheyẹwhe tọn to Owe-wiwe lẹ mẹ.—2 Otànnugbo lẹ 20:7; Isaia 41:8; Jakọbu 2:23.