Nujijọ jọnun de wẹ Singigọ lọ yin. Jiwheyẹwhe hẹn ẹn wá nado và mẹylankan lẹ sudo, amọ́ e dọna Noa dọ ni gbá aki de nado whlẹn mẹdagbe lẹ po kanlin lẹ po gán. (Jenẹsisi 6:11-20) Mí gán yise dọ Singigọ lọ wá aimẹ nugbo, na e yin kinkandai do Owe-wiwe lẹ mẹ wutu, yèdọ owe de he “yin gbigbọdo sọn Jiwheyẹwhe dè.”— 2 Timoti 3:16.

•  Nujijọ jọnun kavi otàngblo?

•  Naegbọn Singigọ lọ do wá aimẹ?

•  Be mẹhe nọgbẹ̀ to whenẹnu lẹ yọnẹn dọ Singigọ de ja ya?

•  Awusọhia tẹwẹ aki Noa tọn tindo?

•  Ojlẹ nẹmu wẹ Noa yí do gbá aki lọ?

•  Otàn, hopàdọ po otàngblo he gando singigọ daho lọ go lẹ po

 Biblu dohia dọ Noa yin omẹ nujọnu tọn de he nọgbẹ̀ pọ́n podọ dọ Singigọ lọ yin nujijọ jọnun de, e ma yin hopàdọ kavi otàngblo de poun.

•   Biblu-kantọ lẹ yise dọ Noa yin omẹ nujọnu tọn de he nọgbẹ̀ pọ́n. Di apajlẹ, Biblu-kantọ Ẹzla po Luku po yin whenuho-kantọ azọ́nyọnẹntọ lẹ he kàn yinkọ Noa tọn do todohukanji kúnkan akọta Islaeli tọn lẹ tọn mẹ. (1 Otànnugbo lẹ 1:4; Luku 3:36) Wẹndagbe-kantọ Matiu po Luku po basi kandai nuhe Jesu dọ gando Noa po Singigọ lọ go po tọn.—Matiu 24:37-39; Luku 17:26, 27.

   Humọ, yẹwhegán Ezekiẹli po apọsteli Paulu po donù Noa go taidi apajlẹ yise po dodowiwa po tọn de. (Ezekiẹli 14:14, 20; Heblu lẹ 11:7) Be e na sọgbe hẹ lẹnpọn dagbe na wekantọ enẹlẹ nado dlẹnalọdo mẹhe ma nọgbẹ̀ pọ́n de taidi apajlẹ de he mí na hodo ya? E họnwun dọ Noa gọna sunnu po yọnnu yisenọ devo lẹ po yin apajlẹ he mí sọgan hodo lẹ, na yé yin omẹ nujọnu tọn he nọgbẹ̀ pọ́n lẹ wutu.—Heblu lẹ 12:1; Jakọbu 5:17.

•   Biblu na nudọnamẹ tangan delẹ gando Singigọ lọ go. Kandai Singigọ lọ tọn he to Biblu mẹ ma bẹjẹeji po hogbe depope po taidi “to ojlẹ de mẹ wayi,” nado dohia dọ otàngblo de poun wẹ gba. Kakatimọ, Biblu dọ owhe, osun po azán he gbè nujijọ he gando Singigọ lọ go lẹ po wá aimẹ te. (Jenẹsisi 7:11; 8:4, 13, 14) E sọ donù tedidi, gbigblo po jiyiyi aki he Noa gbá lọ tọn po go. (Jenẹsisi 6:15) Nudọnamẹ gigọ́ ehelẹ dohia dọ Biblu dọhodo Singigọ lọ ji taidi nujijọ jọnun de, e ma yin taidi otàngblo de.

 Sọgbe hẹ kandai Biblu tọn, jẹnukọnna Singigọ lọ “kanyinylan gbẹtọ tọn sù tlala.” (Jenẹsisi 6:5) E yidogọ dọ “aigba sọ gblezọn . . . to nukun Jiwheyẹwhe nugbo lọ tọn mẹ,” na e gọ́ na danuwiwa po fẹnnuwiwa zanhẹmẹ tọn po wutu.—Jenẹsisi 6:11; Juda 6, 7.

 Biblu dọ dọ angẹli ylankan he jo otẹn yetọn do to olọn mẹ nado wá tindo kọndopọ zanhẹmẹ tọn hẹ yọnnu lẹ wẹ hẹn suhugan nuhahun ehelẹ tọn wá. Angẹli ehelẹ ji ovi he nọ yin yiylọdọ Nẹfilimi lẹ, podọ ovi enẹlẹ hẹn yajiji wá gbẹtọvi lẹ ṣẹnṣẹn. (Jenẹsisi 6:1, 2, 4) Enẹwutu, Jiwheyẹwhe de nado sukúndona ylanwiwa to aigba ji bo hùn dotẹnmẹ dote na mẹdagbe lẹ nado bẹ gbẹzan yọyọ de jẹeji.—Jenẹsisi 6:6, 7, 17.

 Mọwẹ. Jiwheyẹwhe dọ nuhe to na jọ lọ na Noa bo na ẹn anademẹ nado gbá aki de he na gọalọ nado whlẹn whẹndo etọn po kanlin lẹ po. (Jenẹsisi 6:13, 14; 7:1-4) Noa na avase gbẹtọ lẹ gando vasudo he to nukọn ja lọ go, amọ́ yé dovọ́na avase etọn. (2 Pita 2:5) Biblu dọmọ: “Yé ma doayi e go kaka Singigọ lọ do wá bo plọ́ yemẹpo yì.”—Matiu 24:37-39.

 Aki lọ yin ogbá kavi apotin daho de he tindo adà ẹnẹ bo dite na nudi mẹtlu 133 bọ gbigblo etọn yin mẹtlu 22 podọ jiyiyi etọn yin mẹtlu 13. a Aki lọ yin bibasi po atin gofa tọn po bọ osẹ̀n pinpẹn yin sisà do ohò etọn mẹ podọ do gbonu etọn. E tindo petlezìn atọ̀n gọna abò sọha de. Ohọ̀n de tin to adà mẹ na aki lọ podọ e taidi dọ e tindo fleṣe de lẹdo pé to aga. E yọnbasi dọ họta aki lọ tọn ni yiji yẹẹ de to ṣẹnṣẹn mẹ, na e nido sọgan kọ̀n osin.—Jenẹsisi 6:14-16.

 Biblu ma dọ ojlẹ nẹmu he Noa yí do gbá aki lọ, amọ́ e taidi dọ owhe susu wẹ e biọ e to si nado gbá ẹ fó. Noa ko tindo owhe 500 linlán whẹpo do ji visunnu etọn tintan podọ e tindo nudi owhe 600 to whenue Singigọ lọ wá aimẹ. b—Jenẹsisi 5:32; 7:6.

 Jiwheyẹwhe dọna Noa dọ ni gbá aki lọ to whenue visunnu etọn atọ̀n lẹ ko whẹ́n bo dà asi godo, ehe sọgan ko yí nudi owhe 50 kavi 60. (Jenẹsisi 6:14, 18) Po ehe po, e taidi nuhe sọgbe hẹ lẹnpọn dagbe nado wá tadona lọ kọ̀n dọ owhe 40 kavi 50 na ko juwayi whẹpo aki lọ do yin gbigbá fó.