Etẹwẹ Biblu Dọ Gando Azọ̀nylankan Lẹdo Aihọn Pé lẹ Go?
Gblọndo Biblu tọn
Biblu dọ dọdai dọ azọ̀nylankan lẹ (awutu he mẹsusu nọ bẹ lẹ, kakajẹ azọ̀nylankan lẹdo aihọn pé lẹ ji) na tin to azán godo tọn lẹ mẹ. (Luku 21:11) Azọ̀nylankan mọnkọ lẹ ma yin ahọsumẹ na ylando lẹ kavi yasanamẹ sọn Jiwheyẹwhe dè. Na nugbo tọn, Jiwheyẹwhe na yí Ahọluduta etọn zan nado doalọtena nuhahun agbasalilo tọn lẹpo to madẹnmẹ, kakajẹ azọ̀nylankan lẹdo aihọn pé lẹ ji.
Be Biblu dọ dọ azọ̀nylankan lẹdo aihọn pé lẹ na wá tin wẹ ya?
Biblu ma donù azọ̀nylankan lẹdo aihọn pé kavi awutu tangan delẹ, taidi COVID-19, Sida kavi Grippe espagnole go. Amọ́, e dọ dọ “azọ̀nylankan lẹ” po “awutu ylankan” lẹ po na wá tin. (Luku 21:11; Osọhia 6:8) Nujijọ ehelẹ yin delẹ to ohia “azán godo tọn” lẹ tọn mẹ, ehe sọ nọ yin alọdlẹndo taidi “vivọnu titonu lọ tọn.”—2 Timoti 3:1; Matiu 24:3.
Be Jiwheyẹwhe ko yí azọ̀n do sayana gbẹtọ lẹ pọ́n wẹ ya?
Biblu dọhodo nujijọ kleun delẹ ji, ehe mẹ Jiwheyẹwhe yí awutu do sayana gbẹtọ lẹ te. Di apajlẹ, e yí pòzọ̀n do hò mẹdelẹ. (Sọha lẹ 12:6; 2 Ahọlu lẹ 5:20-27; 2 Otànnugbo lẹ 26:16-21) Amọ́, nujijọ he go mí donù ehelẹ ma yin azọ̀nylankan lẹ he gbẹtọ homẹvọnọ lẹ lọsu bẹ gba. Kakatimọ, nujijọ enẹlẹ yin whẹdanamẹ tangan lẹ sọta mẹdelẹ he ko ṣiatẹ sọta Jiwheyẹwhe.
Be azọ̀nylankan lẹdo aihọn pé egbezangbe tọn lẹ yin yasanamẹ sọn Jiwheyẹwhe dè wẹ ya?
Lala. Mẹdelẹ nọ dọ dọ Jiwheyẹwhe to azọ̀nylankan lẹ po awutu devo lẹ po yizan nado sayana gbẹtọ lẹ to egbehe. Amọ́, Biblu ma nọgodona linlẹn enẹlẹ. Etẹwutu?
Na delẹ to sinsẹ̀n-basitọ Jiwheyẹwhe tọn lẹ mẹ—to hohowhenu podọ to egbezangbe—wẹ ko jẹazọ̀n. Di apajlẹ, dawe nugbonọ lọ Timoti, jiya “na azọ̀n whẹwhẹ . . . wutu.” (1 Timoti 5:23) Amọ́, Biblu ma dọ dọ ehe dohia dọ e ba nukundagbe Jiwheyẹwhe tọn pò gba. Mọdopolọ to egbehe, devizọnwatọ nugbonọ Jiwheyẹwhe tọn delẹ nọ wá jẹazọ̀n kavi bẹ awutu. To ninọmẹ susu mẹ, omẹ ehelẹ nọ gbọn kosọ dali tin to fie nuylankan na jo te to ojlẹ enẹ mẹ poun wẹ.—Yẹwhehodọtọ 9:11.
Humọ, Biblu plọnmẹ dọ ojlẹ he mẹ Jiwheyẹwhe na sayana mẹylankan lẹ te ma ko sọ̀. Kakatimọ, mí to gbẹnọ “to azán whlẹngán tọn gbè”—yèdọ ojlẹ de ehe mẹ Jiwheyẹwhe yí zohunhun do to oylọ-basina gbẹtọvi lẹpo nado wá dọnsẹpọ ẹ bo mọ whlẹngán. (2 Kọlintinu lẹ 6:2) Aliho dopo he mẹ e to oylọ-basina mẹlẹ te wẹ gbọn azọ́n yẹwhehodidọ lẹdo aihọn pé tọn he bẹ owẹ̀n todido tọn de hẹn dali—enẹ wẹ “wẹndagbe Ahọluduta lọ tọn.”—Matiu 24:14.
Be azọ̀nylankan lẹdo aihọn pé lẹ na wá doalọte gbede ya?
Mọwẹ. Biblu dọ dọ to madẹnmẹ mẹdepope ma nasọ jẹazọ̀n ba. To Ahọluduta Jiwheyẹwhe tọn glọ, e na hẹn nuhahun agbasalilo tọn lẹpo gbọ̀. (Isaia 33:24; 35:5, 6) E na de yajiji, awufiẹsa po okú po sẹ̀. (Osọhia 21:4) Podọ e na hẹn mẹhe ko kú lẹ gọwá ogbẹ̀, na yé nido sọgan duvivi agbasalilo dagbe tọn to aigba ji fi to ninọmẹ pipé de mẹ.—Salmu lẹ 37:29; Owalọ lẹ 24:15.
Wefọ Biblu tọn he dọhodo azọ̀n ji lẹ
Matiu 4:23: “[Jesu] to yìyì lẹdo Galili lẹpo pé bo to mẹplọn to sinagọgu yetọn lẹ mẹ bosọ to yẹwheho wẹndagbe Ahọluduta lọ tọn dọ bo to azọ̀n wunmẹ lẹpo po madogán wunmẹ lẹpo po hẹngbọ to gbẹtọ lẹ ṣẹnṣẹn.”
Zẹẹmẹ: Azọ́njiawu he Jesu basi lẹ do vude poun to nuhe Ahọluduta Jiwheyẹwhe tọn na wà to madẹnmẹ na gbẹtọvi lẹpo mẹ hia.
Luku 21:11: “Azọ̀nylankan lẹ . . . na tin.”
Zẹẹmẹ: Nuhahun agbasalilo tọn he gbayipe lẹ yin delẹ to ohia azán godo tọn lẹ mẹ.
Osọhia 6:8: “Pọ́n! osọ́ wlanwlan de, podọ oyín mẹhe sinai to e ji tọn wẹ Okú. Yọdò sọ to hihodo e pẹkipẹki. Aṣẹ sọ yin nina yé . . . nado nọ yí . . . awutu ylankan . . . do hù.”
Zẹẹmẹ: Dọdai he dọhodo osọ́nọ ẹnẹ lẹ ji to owe Apokalipsi tọn mẹ dohia dọ azọ̀nylankan lẹdo aihọn pé lẹ na tin to ojlẹ mítọn mẹ.
A Gán Sọ Pọ́n Hosọ Ehelẹ
ATỌ̀HỌ̀-NUHIHỌ́ LỌ TỌN
Yajiji—Be Yasanamẹ sọn Jiwheyẹwhe Dè Wẹ Ya?
Be Jiwheyẹwhe nọ yí azọ̀n kavi nugbajẹmẹji lẹ do sayana gbẹtọ lẹ na ylando yetọn lẹ wutu wẹ ya?
NUPLỌNMẸ TANGAN BIBLU TỌN LẸ
Naegbọn Jiwheyẹwhe Do Jotẹnna Yajiji?
Mẹsusu wẹ nọ kanse dọ naegbọn wangbẹna po yajiji po do gọ́ gbẹ̀mẹ sọmọ. Gblọndo he Biblu na na kanbiọ enẹ hẹn pekọ wá namẹ bosọ miọnhomẹnamẹ taun.
ATỌ̀HỌ̀-NUHIHỌ́ LỌ TỌN
Whetẹnu Wẹ Ogbẹ̀ lọ Na Vọ̀? Nuhe Jesu Dọ
Be a to nuhe Jesu dọ dọ e na jọ lẹ mọ ya?
GBLỌNDO NA KANBIỌ SINAI DO BIBLU JI LẸ
Etẹwẹ yin ohia “azán godo tọn lẹ,” kavi ‘ojlẹ opodo tọn’ lọ tọn?
Biblu basi zẹẹmẹ nujijọ po ninọmẹ delẹ po tọn he na wá aimẹ jẹnukọnna “opodo aihọn tọn.”
GBLỌNDO NA KANBIỌ SINAI DO BIBLU JI LẸ
Etẹwẹ Ahọluduta Jiwheyẹwhe Tọn Na Wà?
Pọ́n nuhe a sọgan donukun lẹ to whenue gandudu Jiwheyẹwhe tọn na dugán do aigba ji.
NUHE BIBLU PLỌN MÍ
Tẹ́n Tito Biblu Pinplọn Tọn Mítọn Pọ́n
A gán plọnnu vọnu hẹ mẹplọntọ de nukun sọ nukun nado mọ ayinamẹ sinai do Biblu ji lẹ yí.