Biblu hẹn ẹn họnwun hezeheze dọ Jesu ma wlealọ dile etlẹ yindọ e ma dọho tlọlọ do whẹho asi didà tọn etọn ji. a Pọ́n nudọnamẹ he bọdego lẹ.

1.   Biblu nọ saba dọhodo whẹndo Jesu tọn po yọnnu he hodo e to lizọnyizọn etọn whenu lẹ po gọna mẹhe nọte to apá na ẹn to whenue e yin hùhù ji, amọ́ e ma donù e go gbede dọ e dà asi. (Matiu 12:46, 47; Malku 3:31, 32; 15:40; Luku 8:2, 3, 19, 20; Johanu 19:25) Whẹwhinwhẹ́n tangan he wutu Biblu ma dọho de gandego wẹ yindọ e ma dà asi paali.

2.   Na nuhe dù mẹhe gbọṣi tlẹnmẹ na yé nido wà susu to sinsẹ̀nzọn Jiwheyẹwhe tọn mẹ lẹ, Jesu dọna devi etọn lẹ dọmọ: “Mì gbọ mẹhe sọgan natẹn ehe [tlẹnmẹninọ] ni natẹn ẹn.” (Matiu 19:10-12) E ze apajlẹ dai na mẹhe de bo ma jlo na wlealọ lẹ nado ze yede jo na Jiwheyẹwhe to gigọ́ mẹ.—Johanu 13:15; 1 Kọlintinu lẹ 7:32-38.

3.   Whẹpo Jesu do kú, e basi tito na onọ̀ etọn nido yin nukunpedego. (Johanu 19:25-27) Eyin Jesu dà asi kavi do ovi lẹ wẹ, e na ko hẹn ẹn diun dọ hagbẹ whẹndo tọn mọnkọ lẹ lọsu ni yin nukunpedego.

4.   Biblu nọ yí Jesu do basi apajlẹ he asu lẹ gán hodo, amọ́ e ma dọ aliho he mẹ e yinuwa hẹ asi de te. Kakatimọ, Biblu dọmọ: “Mì asu lẹ emi, mì nọ yiwanna asi mìtọn, kẹdẹdile Klisti yiwanna agun lọ do ga bo ze ede jo na ẹn.” (Efesunu lẹ 5:25) Eyin Jesu ko dà asi whenue e to aigba ji wẹ, be apajlẹ pipé etọn taidi asu dagbe de ma na ko yin nùdego to wefọ enẹ mẹ ya?

 Mọwẹ, e whè gbau Jesu do nọvi ṣidopo nkọ. Nọvisunnu etọn lẹ wẹ Jakọbu, Josẹfu, Simọni po Juda po gọna nọviyọnnu awe. (Matiu 13:54-56; Malku 6:3) Ovi jọnun Malia onọ̀ Jesu tọn, po Josẹfu asu etọn po tọn wẹ nọvi Jesu tọn lẹ yin. (Matiu 1:25) Biblu ylọ Jesu dọ “plọnji” Malia tọn, ehe dohia dọ e tindo ovi devo lẹ.—Luku 2:7.

 Mẹdelẹ ko na zẹẹmẹ voovo hogbe lọ “nọvisunnu” nado nọgodona linlẹn lọ dọ Malia gbọṣi alọji to gbẹzan etọn blebu mẹ. Di apajlẹ, mẹdelẹ yise dọ nọvisunnu Jesu tọn lẹ he yin nùdego yin visunnu Josẹfu tọn lẹ he e ji whẹpo do wlealọ hẹ Malia. Amọ́, Biblu dohia dọ Jesu dugu jlọjẹ sọgbe hẹ osẹ́n gandudu tọn he yin opagbe etọn do na Davidi tọn. (2 Samuẹli 7:12, 13; Luku 1:32) Eyin Josẹfu ko ji visunnu devo lẹ he hù mẹho Jesu wẹ, mẹhe yin mẹho hugan to yé mẹ wẹ na ko tindo jlọjẹ sọgbe hẹ osẹ́n nado yin gudutọ Josẹfu tọn.

 Be hogbe lọ gán sọ dlẹnalọdo devi kavi mẹmẹsunnu gbigbọmẹ tọn Jesu tọn lẹ wẹ ya? Linlẹn ehe jẹagọdo nuhe Owe-wiwe lẹ dọ, na Biblu dọ to ninọmẹ de mẹ dọ, “na nugbo tọn, nọvisunnu etọn lẹ ma to yise dohia to ewọ mẹ.” (Johanu 7:5) Biblu do vogbingbọn hia to nọvisunnu Jesu tọn lẹ po devi etọn lẹ po ṣẹnṣẹn.—Johanu 2:12.

 Mẹdevo lẹ dọ dọ hẹnnumẹ lẹ wẹ nọvisunnu Jesu tọn lẹ yin na ẹn. Amọ́, hogbe voovo lẹ wẹ Owe-wiwe Glẹki tọn lẹ yizan na “nọvisunnu” po “hẹnnumẹ” po. (Luku 21:16; Kolosinu lẹ 4:10) Weyọnẹntọ Biblu tọn susu yise dọ nọvisunnu po nọviyọnnu Jesu tọn lẹ po yin nọvi jọnun etọn lẹ. Di apajlẹ, owe lọ, The Expositor’s Bible Commentary dọ dọ: “Aliho he sọgbe to jọwamọ-liho nado mọnukunnujẹ ‘nọvisunnu’ mẹ . . . wẹ yindọ hogbe lọ dlẹnalọdo visunnu Malia po Josẹfu po tọn lẹ bo gbọnmọ dali yin nọvisunnu Jesu tọn lẹ to adà onọ̀ etọn tọn mẹ.” b