A NA KO NỌ SABA SÈ DỌ NUTINDO LẸ PO ADỌKUN PO WẸ NỌ HẸN AYAJẸ PO KỌDETỌN DAGBE PO WÁ. Na pọndohlan enẹ wutu, gbẹtọ livi susu nọ wazọ́n na gànhiho susu nado dín akuẹ. Amọ́, be akuẹ po nutindo lẹ po nọ hẹn ayajẹ dẹn-to-aimẹ wá nugbonugbo ya? Etẹwẹ numimọ lẹ dohia?

Linlinwe de dọ dọ eyin mí ko gbẹ́ tindo dandannu lẹ, akuẹ depope he mí to bibẹpli masọ nọ yidogọna ayajẹ kavi dagbemẹninọ mítọn. (Journal of Happiness Studies) E ma yin akuẹ wẹ yin nuhahun lọ gba. Amọ́, “wezundido to [akuẹ] godo wẹ nọ hẹn ayajẹ matindo wá,” wẹ hosọ de dọ to linlinwe de mẹ. (Monitor on Psychology) Hogbe ehelẹ sọgbe hẹ ayinamẹ he yin nina to Biblu mẹ to nudi owhe fọtọ́n donu awe die dọmọ: “Wanyina akuẹ wẹ yin adọ̀ nuylankan wunmẹ lẹpo tọn, podọ gbọn afọdidona owanyi ehe dali, mẹdelẹ ko . . . yí awufiẹsa susu do sọnú yede gbọn filẹpo.” (1 Timoti 6:9, 10) Awufiẹsa tẹlẹ wẹ?

NUHIHA PO AMLỌNMADỌ́ PO NADO BASI HIHỌ́NA ADỌKUNNU LẸ. “Mẹhe to devizọnwa nọ damlọn yìkànmẹ, vlavo e dùnú vude kavi susu, ṣigba nutindo susugege adọkunnọ tọn ma nọ na ẹn agbọ́ nado damlọn.”—Yẹwhehodọtọ 5:12.

FLUMẸJIJẸ TO WHENUE AYAJẸ HE YÈ TO NUKUNDO MA WÁ. To whedelẹnu, flumẹjijẹ enẹ nọ wá, na wezundido to godona akuẹ taidi odò de he ma nọ gọ́ gbede. “Mẹhe yiwanna fataka, fataka ma na pekọna ẹn gbede, mọdopolọ wẹ nutindo ma na pekọna mẹhe yiwanna adọkun.” (Yẹwhehodọtọ 5:10) Humọ, wezundido to godona adọkunnu lẹ sọgan sisẹ́ mẹde nado yí nujọnu he nọ hẹn ayajẹ wá lẹ do sanvọ́, taidi whenu dagbe zinzan hẹ whẹndo mẹtọn po họntọn lẹ po kavi na Jiwheyẹwhe sinsẹ̀n.

AWUBLA PO FLUMẸJIJẸ PO TO WHENUE AKUẸ VỌ̀ KAVI AJỌ́ MẸTỌN JAI. “A do magbọjẹ na dewe nado sọgan jẹ adọkun blo. Yì agbọ́ji bo do wuntuntun hia. Whenue hiẹ na ze nukun towe deji, e ma na tin ba, na ayihaawe ma tin dọ e na wú awà di akùn bo zlọn yì.”​—Howhinwhẹn lẹ 23:4, 5.

PEKỌ. “Mí ma hẹn nudepope wá aihọn mẹ, mọjanwẹ mí ma sọgan sọ ze nudepope tọ́nyi do niyẹn. Enẹwutu, eyin mí tindo núdùdù po avọ̀ po, onú ehelẹ ni pekọna mí.” (1 Timoti 6:7, 8) Mẹhe nọ tindo pekọ lẹ ma nọ saba to lewu kavi to nuhlundọ, bọ ehe nọ họ́ yé sọn nuvẹun tintindo si. Podọ na nuhe yé nọ tindo ojlo na lẹ ma nọ zẹ̀ nugopipe yetọn go wutu, yé ma nọ jo yede na nuhiha po flumẹjijẹ he ma yin dandan tọn lẹ po.

ALỌTÚTLÚ. “Ayajẹ sù to nunamẹ mẹ hú to mimọyi mẹ.” (Owalọ lẹ 20:35) Mẹhe yin alọtlútọ lẹ nọ saba yin ayajẹnọ, na yé nọ saba hẹn mẹdevo lẹ jaya wutu, eyin nuhe yé tlẹ penugo nado namẹ lẹpo wẹ whenu po nugopipe vude poun po. Yé nọ saba duale nuhe akuẹ ma sọgan họ̀ lẹ tọn susugege—yèdọ owanyi, sisi, po họntọn nujọnu tọn lẹ po, he nọ hẹn ale susu wá na yé!—Luku 6:38.

OJLO TINTINDO TO GBẸTỌ LẸ MẸ HÚ NUTINDO LẸ. “E pọnte nado dù omá-nusọnu to fie owanyi tin te hú nado dù olàn oyìnsú he dojó de tọn to fie wangbẹna tin te.” (Howhinwhẹn lẹ 15:17) Etẹwẹ ehe zẹẹmẹdo? Haṣinṣan dagbe tintindo hẹ mẹdevo lẹ họakuẹ hú nutindo agbasa tọn lẹ. Podọ dile mí na mọ do to nukọn mẹ, owanyi yin dandannu nado tindo ayajẹ.

Sabina, yọnnu de sọn Hùwaji Amelika tọn mọ nugbo anademẹ Biblu tọn lẹ tọn. To whenue asu Sabina tọn họ̀n jo e do, e ma nọ bọawuna ẹn nado mọ dandannu lẹ na ewọ po viyọnnu etọn awe lẹ po. Azọ́n awe wẹ e nọ wà bo nọ fọ́n to ogàn 4 mẹ afọnnu. Mahopọnna dọ alọnu Sabina tọn nọ ján taun, e basi dide nado plọn Biblu. Etẹwẹ yin kọdetọn lọ?

Nugbo wẹ dọ ninọmẹ etọn ma pọnte to akuẹzinzan-liho. Amọ́, pọndohlan etọn gando ogbẹ̀ go diọ taun! Di apajlẹ, e duvivi ayajẹ he pekọ hinhẹnwa na nuhudo gbigbọmẹ tọn mẹtọn lẹ nọ hẹnwa tọn. (Matiu 5:3) E jihọntọn nugbo lẹ to yisenọ hatọ lẹ ṣẹnṣẹn. Podọ e duvivi ayajẹ he nunamẹ nọ hẹnwa lẹ tọn gbọn nuhe e ko plọn lẹ mimá hẹ mẹdevo lẹ dali.

Biblu dọmọ: “Nuyọnẹn nọ yin whẹsuna gbọn kọdetọn etọn lẹ dali.” (Matiu 11:19; nudọnamẹ odò tọn) Enẹwutu, pekọ po alọtútlú po gọna ojlo tintindo to gbẹtọ lẹ mẹ hú nutindo lẹ nọ yin whẹsuna taun!