E nọ vẹna mí nado mọdọ mẹdagbe lẹ nọ jiya. Mẹsusu nọ wá mọdọ dagbewiwa ma doale.

Mẹdelẹ yise dọ gbẹtọvi lẹ nọ kú bo nọ wá yin vivọji whlasusu. Yé nọ dọ dọ mẹhe wà dagbe lẹ nọ yin vivọji nado wá dugbẹ bọ mẹhe wà nuylankan lẹ nọ yin vivọji nado jiya. Ehe zẹẹmẹdo dọ mẹhe tlẹ to dagbe wà todin gán wá jiya, eyin e ko ṣì nudelẹ wà to whenue e nọgbẹ̀ wayi. Amọ́ . . .

• Dagbe tẹwẹ to e mẹ, eyin mẹhe to yaji lọ ma tlẹ gán flindọ emi ko ṣì nudelẹ wà wayi?

• Be e ma yin nulunu wẹ e yin dọ mí ni nọ jẹtukla nado nọ ganji bo nọ dapana asidan lẹ to whenue e yindọ nudepope wẹ gán jọ do mí go, na nuhe mí ko ṣiwà wayi lẹ wutu ya?

  DINDONA DOGỌ

  Pọ́n video lọ Naegbọn Jiwheyẹwhe Do Jotẹnna Yajiji? to jw.org ji.

Oyà mítọn ma sọn Jiwheyẹwhe go.

Kakatimọ, kosọ lọsu nọ zọ́n to ninọmẹ susu mẹ, e gán yindọ mẹde to fihe nuylankan na jọ te to ojlẹ he mẹ e ma dona to finẹ.

“E ma yin awuyatọ lẹ wẹ nọ duto wezundido ji to whepoponu, kavi huhlọnnọ lẹ to avùn ji, podọ e ma yin nuyọnẹntọ lẹ wẹ nọ tindo núdùdù to whepoponu, podọ e ma yin mẹhe tindo zinzin lẹ wẹ nọ jẹ adọkun to whepoponu, mọjanwẹ e ma yin mẹhe tindo oyọnẹn lẹ wẹ nọ tindo kọdetọn dagbe to whepoponu, na yemẹpo ji wẹ ojlẹ po kosọ po nọ wá.”​—YẸWHEHODỌTỌ 9:11.

Ylando he mí dugu etọn sọ nọ hẹn yajiji wá.

Mẹlẹ nọ zan hogbe lọ “ylando” nado dlẹnalọdo nuylankan he mẹde wà. Amọ́, Biblu sọ nọ yí hogbe lọ zan nado dlẹnalọdo nuhe gbẹtọvi lẹpo ko dugu etọn, vlavo yé yin mẹdagbe kavi mẹylankan.

“Ylanwiwa mẹ wẹ yẹn yin jiji te, podọ ylando mẹ wẹ onọ̀ ṣie mọhò ṣie te.”—SALMU LẸ 51:5.

Ylando nọ hẹnnugble to gbẹtọvi lẹ go.

Gbọnvona dọ e zọ́n bọ mí nọ vẹtolina Jiwheyẹwhe, e sọ nọ bẹpla nuyiwa mítọn hẹ hatọ mítọn lẹ kakajẹ kanlin lẹ po aigba lọ blebu po ji. Enẹ ko hẹn yajiji susu wá.

“Whenue yẹn jlo nado wà nuhe sọgbe, nuhe ylan wẹ nọ tin to dè e.”—LOMUNU LẸ 7:21.

“Nudida lẹpo wẹ to hunwẹn dopọ bo tin to awufiẹsa mẹ dopọ kakajẹ din.”—LOMUNU LẸ 8:22.