OSẸ́N MOSE tọn ma jẹagọdo whiwhle. Ṣigba, mẹhe nọgbẹ̀ to azán Jesu tọn gbè lẹ wá yí whiwhle do dó aṣa to nuwiwa egbesọegbesọ tọn yetọn lẹ mẹ sọmọ bọ diblayin nuhe yé dọ lẹpo wẹ yé nọ jlo na yí whiwhle do nọgodona. Yé nọ whlé domọ poun na mẹdevo lẹ nido yí nuhe dọ yé te sè; ṣigba whla awe wẹ Jesu gbẹnuna yé gando aṣa ehe go. Amọ́ e plọn yé dọ: “Mì kúkú gbọ hogbe mìtọn ‘Mọwẹ’ ni yin mọwẹ, podọ ‘Lala’ mìtọn ni yin lala.”—Mat. 5:33-37; 23:16-22.

Sọgbe hẹ owe dodinnanu tọn lọ Theological Dictionary of the New Testament, “Ju lẹ tindo aṣa lọ nado nọ yí whiwhle do nọgodona diblayin nuhe yé dọ lẹpo,” podọ aṣa ehe sinyẹn na yé taun vlavo na owe lọ Talmud yiagbọji bo slẹ whiwhle he yin dandan tọn po dehe ma yin dandan tọn lẹ po wutu.

E ma yin Jesu kẹdẹ wẹ gblewhẹdo pọndohlan agọ̀ ehe. Di apajlẹ, whenuho-kantọ Ju lọ Flavius Josèphe dọ gando sinsẹ̀n klandovo Ju lẹ tọn de go dọmọ: “Yé nọ dapana whiwhle bo nọ pọ́n ẹn hlan di nuhe ylanhu lalodido, na yé dọ dọ mẹhe dona yí Jiwheyẹwhe do whlé whẹpo yè nido yí ohó etọn sè ko yin whẹgbledo dote.” Mọdopolọ, kandai Ju lẹ tọn he ma yin gbigbọdo de he nọ yin yiylọdọ la Sagesse de Sirach kavi l’Ecclésiastique (23:11) dọmọ: “Sẹ́nhẹngbatọ godo tọn wẹ mẹhe tindo aṣa lọ nado nọ whlé.” Enẹwutu, Jesu gblewhẹdo aṣa lọ nado nọ whlé do jẹhọn mẹ poun. Eyin mí nọ dọ nugbo to whelẹponu, e ma na yin dandan dọ mí ni nọ whlé whẹpo mẹdevo lẹ nido yí mí sè.