Nuyiwa Homẹdagbe Tọn Klistiani Tọn De
TO VIVỌNU owhe 1950 lẹ tọn, to tòpẹvi Gujerat tọn de mẹ to Inde, otọ́ John tọn yí baptẹm bo lẹzun Kunnudetọ Jehovah tọn de. Na John, nọvisunnu etọn lẹ po nọviyọnnu etọn lẹ po gọna onọ̀ yetọn yin Katoliki akonka wutu, yé diọnukunsọ sinsẹ̀n otọ́ yetọn tọn.
To gbèdopo, otọ́ John tọn do e hlan họntọn agun tọn etọn de dè nado yì ze wepò de jo na ẹn. Ṣigba to afọnnu enẹ, John gbleawu taun do fẹ̀nvi dile e to tintẹnpọn nado hùn gàngbá daho de. Etomọṣo, na e jlo na setonuna otọ́ etọn wutu, e blá avọ̀kija do fẹ̀nvi he gbẹ́ to ohùn tọ́n lọ bo zọ̀nafọ nado yì ze wepò lọ jo.
To whenue John jẹ dọ́n, asi mẹhe e dona dowẹn na lọ tọn he yin Kunnudetọ Jehovah tọn de wẹ yí wepò lọ to e si. Nawe lọ doayi e go dọ John gbleawu sọn fẹ̀nvi bo dọna ẹn dọ emi na gọalọna ẹn. E de apà-blanú lẹ tọ́n bo yí apà-hùnú do súnsún apà lọ, bosọ blanú do fẹ̀nvi lọ. Enẹgodo, e bayi tii miyọ́nawu na John, bo to hodọna ẹn to aliho he jọmẹ de mẹ gando Biblu go to ojlẹ ehe lẹpo mẹ.
To whenẹnu, pọndohlan agọ̀ John tọn gando Kunnudetọ lẹ go jẹ didiọ ji, enẹwutu e kàn kanbiọ awe sè nawe lọ gando nuyise otọ́ etọn tọn he gbọnvona etọn lẹ go, enẹ wẹ vlavo eyin Jesu wẹ Jiwheyẹwhe podọ eyin Klistiani lẹ dona nọ hodẹ̀ na Malia. Na nawe lọ sè Gujarati-gbè he John nọ do wutu, e na ẹn gblọndo sọn Biblu Gujarati-gbè tọn mẹ, bosọ na ẹn alọnuwe apòmẹ tọn lọ “Cette bonne nouvelle du royaume” do ogbè enẹ mẹ.
To nukọn mẹ, dile John to alọnuwe apòmẹ tọn lọ hia, e taidi na ẹn dọ whla tintan die he e sèhó gando nugbo Biblu tọn go. E yì yẹwhenọ etọn dè bo kàn kanbiọ dopolọ lẹ sè ewọ lọsu. Homẹgble yẹwhenọ lọ sinsinyẹn bọ e dlan Biblu do e bo dawhá deji dọ: “A ko lẹzun Satani! Dohia mi fie Biblu dọ te dọ Jesu ma yin Jiwheyẹwhe. Fitẹ e dọ te dọ yè ma dona sẹ̀n Malia? Dohia mi!” Nuyiwa yẹwhenọ lọ tọn vẹna John sọmọ bọ e dọna ẹn dọmọ, “N’ma nasọ tafọ ṣọṣi Katoliki tọn de mẹ gbede ba.” Podọ e masọ wàmọ nugbo!
John jẹ nuplọn hẹ Kunnudetọ lẹ ji, bo basi dide nado nọ adà sinsẹ̀n-bibasi nugbo tọn mẹ, podọ e jẹ Jehovah sẹ̀n ji. Dile ojlẹ to yìyì, hagbẹ whẹndo lọ tọn devo lẹ hopódona ẹn. To egbehe, John gbẹ́ tindo ohia de to alọvi adusi tọn lọ go, yèdọ fie e gbleawu sọn to nudi owhe 60 die. Amọ́, po ayajẹ po wẹ e nọ flin nuyiwa homẹdagbe tọn Klistiani tọn de he whàn ẹn nado kẹalọyi sinsẹ̀n-bibasi wiwe-ṣeke lọ.—2 Kọl. 6:4, 6.
