BƆBERƐ 3
Ya Wan Maala Ya Yɛla Se’em
“Sɛla n gane zan’an dela ya nɔŋɛ taaba. Se’ere n sɔe la, nɔŋerɛ zuo te to dita suguru bɔ’ɔra taaba yɛla zo’e zo’e poan.”—1 Peter 4:8
Nɛra la a pɔɣa zi’irego poan, yeledaaŋɔ wan ba’asum bɔna. Yeledaaŋɔ la ta’an dɛna ya geeli yɛla se’em bii ya puti’ira n boi tɔka tɔka la zuo. Yɛla a se’a bii yeledi’ima me ta’an dɛna daaŋɔ mɛ bɔ’ɔra ya.
La ta’an kpe’em ti to nam to de mina ge Baabule la ka’ani tɔ ti to maala to yɛla. (Matu 5:23, 24) Ho san dekɛ Baabule naresum yɛla tum tuuma, ho yɛla wan maalɛ soŋa.
1 SƆSƐ YA YELE LA
BAABULE LA N YELE SE’EM: “Sɛla woo tare . . . tɔgom saŋa” mɛ. (Pa’ala 3:1, 7) Tiregɛ ya nyɛ tɛm sɔsɛ yele la. Kɔ’ɔn tɔɣɛ yelemɛŋɛrɛ ge basɛ ti ho pɔɣa bii ho sira baŋɛ ho puti’irɛ n de se’em yele la poan. ‘Tɔɣera yelemɛŋɛrɛ’ bɔ’ɔra ho pɔɣa bii ho sira tɛm woo. (Epesus 4:25) Hali ho sunsɔa san puɣum nyie, la ka nari ti ho zabɛ. Ho san lebese bãalam zaberɛ kan bɔna.—Magaha 15:4; 26:20.
Hali la san dɛna sɛla ti ho ka sakɛ, dĩ’ise suure ge tara nɔŋerɛ la gilema bɔ’ɔra ho pɔɣa bii ho sira. (Kolose 4:6) Tiregɛ ya maalɛ yele la kalam ge da gĩ’ira.—Epesus 4:26.
HON WAN TA’AN EŊƐ SƐLA:
-
Ee tɛm n makɛ bo ho sɔsɛ yele la
-
A san tɔɣera ho kɛlesa, da kɔɣesa a nɔɔrɛ. Mina ti a wan go’e ti ho me tɔɣɛ
2 KELESE SOŊA GE BƆKƐ EN
BAABULE LA N YELE SE’EM: ‘Nɔŋɛ ya taaba wuu suurɔ n nɔŋɛ taaba se’em la. Ge me kɔ’ɔn bo’ori ya taaba na’asegɔ.’ (Arom 12:10) Ho kelesego dela ninmɔ’ɔrɛ. Bɔkɛ ho pɔɣa bii ho sira puti’irɛ ge mina ti “la sontii ya zan’an lagom tara nɔyenɛ . . . ge sirihe ya ya mɛhe bɔ’ɔra taaba.” (1 Peter 3:8; Yames 1:19) Da eŋɛ wuu ho keleseri mɛ ge ka kɛlesera. Hali ho ta’an basɛ hon iti sɛla la ge kelese bii ho yele ho pɔɣa bii ho sira ti ya sɔsɛ pooren. Ho san tɛra ti ho pɔɣa bii ho sira dela mina n soŋeri hɔ ge daɣɛ se’em n ka boti ho yele, la kan basɛ ti ho “eŋɛ suunre.”—Pa’ala 7:9.
HON WAN TA’AN EŊƐ SƐLA:
-
Hali ho puurɛ san ka pee sɛla ti a tɔɣera bɔ’ɔra ho la, basɛ ti ho puti’irɛ bɔna sɛla ti a yɛta ho la
-
Kelese soŋa ge ta’an bɔkɛ eŋa n yeti sɛla la. Bisɛ a yetɔɣum la a itigɔ n ani se’em
3 KƆ’ƆN TUM DƐ NIMA NIMA
BAABULE LA N YELE SE’EM: “Toonɛ woo tare yɔɔrɔ mɛ, ge yetɔgɔwɔgɔrɔ yoo bo’ore la nɔŋɔ.” (Magaha 14:23) Ho san nam ti ho wan tum tuunɛ la ka seke, see ho tum dɛ wuu ya za’a n sakɛ se’em la. Wana daɣɛ naana ge nyuurɔ boi bim mɛ. (Magaha 10:14) Ya san laɣum tum tuunɛ la, la wan tara ‘nyuurɔ’ bɔ’ɔra ya.—Pa’ala 4:9.
HON WAN TA’AN EŊƐ SƐLA:
-
Ti’isɛ bisɛ sɛla ti ya wan eŋɛ ti yele la maalɛ
-
Ni makɛ geele bisɛ ya tum paɛ se’em beene
