Yehowa a Naayinɛ n basɛ ti pɔɣedire bɔna. Baabule la yeti, eŋa n yuun naam pɔka la nyaa “tare ka wa’an boraa la zen’an na.” Ti Adam puurɛ pee ti a yeti: “Mam kɔnberɛ n wana, mam iŋganɛ n wana.” (Pin’ileŋɔ 2:22, 23) Yehowa kelum bɔta ti nɛra la a pɔɣa tara pupeelum.

Ho san di pɔɣa bii ele sira, ho ta’an ti’isa ti sɛla woo wan ana soŋa. Hali nɛra la a pɔɣa san puɣum nɔŋɛ taaba la se’em me, yeledaaŋɔ wan kelum bɔna. (1 Korint 7:28) Baabule naresum yɛla n boi gɔnlɛmlɛm wa poan, ti ho san dekɛ a tum tuuma ho wan tara pupeelum ho pɔɣedire poan.​—Yooma 19:8-11.

BAABULE LA N YELE SE’EM: Sira n de deodoma zuo daana.​—Epesus 5:23.

Ho san dɛna sira, Yehowa boti la ho nɔŋɛ ho pɔɣa. (1 Peter 3:7) A naam pɔka ti a soŋera la a sira ge bɔta ti sira me tara nɔŋerɛ la gilema bɔ’ɔra a pɔɣa. (Pin’ileŋɔ 2:18) La dela ho nɔŋɛ ho pɔɣa hali ita sɛla ti a bɔta gana sɛla ti homea bɔta.​—Epesus 5:25-29.

Ho san dɛna pɔka, Yehowa boti la ho na’asa ho sira ge soŋera en. (1 Korint 11:3; Epesus 5:33) Ho soŋera en sɛla woo ti a ita. (Kolose 3:18) Ho san ita bala, ho wan dɛna pɔɣesonkɔ ho sira la Yehowa nɛŋan.​—1 Peter 3:1-6.

SƐLA N NARI TI HO EŊƐ:

• Soke ho sira bii ho pɔɣa sɛla ti ho wan ita ti a puurɛ peera. Kelese soŋa ge tiregɛ eŋɛ n yele ho sɛla la

• Diti ya sugurum. La wan yue fii ge ti ya baŋɛ ya wan tara taaba se’em ti ya puurɛ peera

BAABULE LA N YELE SE’EM: La dela ho ita sɛla ti ho sira bii ho pɔɣa bɔta. (Filipi 2:3, 4) Nɔŋɛ ho sira bii ho pɔɣa yele ge mina ti Yehowa ka boti a yamesi “gangara la nɛreba.” (2 Timoti 2:24) “Nyabega ane mɛ wo su’a n bote la, ge yamdoma zɛleŋa bo’ore la tebegɔ.” Mina yetɔɣum. (Magaha 12:18) Yehowa vo’osum la wan soŋɛ hɔ ti ho mina yetɔɣum.​—Galatia 5:22, 23; Kolose 4:6.

SƐLA N NARI TI HO EŊƐ:

• Zusɛ Naayinɛ ti a soŋɛ hɔ ti ho ta’an nyɔkɛ homea hon la ho sira bii ho pɔɣa san sɔsa ninmɔ’ɔrɛ yele

• Mina yetɔɣum ge ti’isa paara ho sɔsega woo poan

BAABULE LA N YELE SE’EM: Ho san di pɔɣa bii ho ele la sira, hon la eŋa nyaa dela “boyena.” (Matu 19:5) La bala za’a, ya mina ti ya boi la tɔka tɔka ge ti ya ti’isegɔ me daɣɛ buyina. Denɛ zuo, la dela ya nana taaba ge tara putɛyinɛ. (Filipi 2:2) Nɔyinɛ n ani soŋa ya san yeti ya geele yele. Baabule la yeti: “Kelehe kan’aŋɔ ge baŋɛ hon wan eŋɛ se’em.” (Magaha 20:18) Basɛ ti Baabule naresum yɛla soŋɛ ya se’em ma’a ti ya yeti ya geele ninmɔ’ɔrɛ yele.​—Magaha 8:32, 33.

HON WAN TA’AN EŊƐ SƐLA:

• Da yɛta ho pɔɣa bii ho sira sɛla ti hon bɔta ma’a ge basɛ ti a baŋɛ sɛla n boi ho suuren

• Ho san yeti ho eŋɛ sɛla, ni deŋɛ nɛŋa sɔsɛ la ho pɔɣa bii ho sira