Ore testígo de Jehová roñehaʼã rosegi pe konsého la Biblia omeʼẽva, upévare heta vése rokirirĩnte oĩramo oñeʼẽ vaíva térã oñembohoryséva orerehe. La Biblia heʼi voi: “Rekorrehíramo umi oñembohorývape, ndénte reñemotĩta” (Proverbios 9:7, 8; 26:4). Ojeʼéramo orerehe peteĩ mbaʼe ndahaʼéiva siérto, ndoroikói rojodiskuti ni roiko vai roaklaraségui la oikóva. Oréve g̃uarã iñimportanteve roguerohory Ñandejárape (Salmo 119:69).

 Péro la Biblia heʼi avei oĩha “tiémpo ñakirirĩ hag̃ua, ha tiémpo ñañeʼẽ hag̃ua” (Eclesiastés 3:7). Upévare heta vése rombohovái umi persóna añetehápe oikuaasévape, péro ndorojodiskutíri hendivekuéra. Upéicha rosegi Jesús ha umi kristiáno ypykue ehémplo.

•  Jesús okirirĩnte vaʼekue ojeakusárõ guare chupe Pilato renondépe (Mateo 27:11-14; 1 Pedro 2:21-23). Avei haʼe ndeʼíri vaʼekue mbaʼevete ojeʼérõ guare hese ikaʼu ha okaruhárente voi oikoha. Upéva rangue ikondúkta rupive ohechauka ijapu hague hikuái. Peteĩ konsého oĩva la Bíbliape heʼi voi: “Jajapóvare ojekuaa ñanearandúpa” (Mateo 11:19). Péro oiméramo tekotevẽ, haʼe ombohovái vaʼekue oĩrõ guare otakýva hese (Mateo 15:1-3; Marcos 3:22-30).

   Jesús omboʼe vaʼekue idisipulokuérape ani hag̃ua ikangy hikuái oiméramo oñeñeʼẽ rei hesekuéra. Haʼe heʼi: “Pevyʼa oĩramo otakýva penderehe, pendepersegíva, ha oikóva heʼi rei penderehe opaichagua mbaʼe vai che káusare” (Mateo 5:11, 12). Jesús heʼi avei idisipulokuérape upéva ikatuha omeʼẽ chupekuéra oportunida opredika hag̃ua. Haʼe opromete vaʼekue chupekuéra: “Ameʼẽta peẽme arandu ha poipytyvõta peñeʼẽkuaa hag̃ua, ha pene enemigokuéra ndaikatumoʼãi heʼi mbaʼeve penembohovái hag̃ua” (Lucas 21:12-15).

•   Apóstol Pablo heʼi umi kristiánope ani hag̃ua ojodiskuti rei, pórke “umíva ndovaléi mbaʼeverã ha ndaideprovéchoi avavépe” (Tito 3:9; Romanos 16:17, 18).

•   Apóstol Pedro katu omokyreʼỹ umi kristiánope odefende hag̃ua umi mbaʼe ogueroviáva otoka porã jave chupekuéra (1 Pedro 3:15). Haʼe ohechakuaa vaʼekue umi mbaʼe jajapóva ipoderosoveha umi mbaʼe jaʼévagui. Upévare heʼi vaʼekue: “Ñandejára oipota peẽ pejapo iporãva ikatu hag̃uáicha pemokirirĩ umi kuimbaʼe ndoikuaáivape mbaʼeve ha oñeʼẽreívape” (1 Pedro 2:12-15).