Anase vaʼekue peteĩ siuda de Hungría héravape Székesfehérvár, orekóva mas de 1.000 áño. Pe segunda gérra mundiál rire ningo umi hénte upepegua heta osufri, ha koʼág̃a peve ndaikatúiti cheresarái umívagui.

Akakuaa vaʼekue che avuelokuérandi. Che ningo ahayhueterei chupekuéra ha koʼag̃aite peve chemanduʼa porã hesekuéra. Che avuéla Elisabeth chemboʼe vaʼekue ajerovia hag̃ua Ñandejárare. Ha areko guive tres áño haʼe chembojepokuaa kuri añemboʼe hendive káda pyhare pe padrenuéstro. Péro arekópe 30 áñorupi ae antende mbaʼépa heʼise umi mbaʼe ojejeruréva pe ñemboʼépe.

Chemitãʼípe, che túva umía ombaʼapo vaʼekue tódo el diaite ojogua hag̃ua ore rogarã iporãmíva, upévare che avuelokuéra okuidámi cherehe. Péro sabadokue, káda 15 día, roñembyatými vaʼerã la família kompletoite rokaru hag̃ua. Ha che avyʼaiterei vaʼekue umícha jave.

Áño 1958-pe, hasýpe che tuvakuéra ojogua ore rogarã, ha ikatúma aiko hendivekuéra. ¡Avyʼaiterei ningo upérõ! Péro seis mése haguépe, che túva ou omano kánsergui, ha upéva ijetuʼueterei oréve g̃uarã.

Apyta ningo yvýre. Chemanduʼa añemboʼémi vaʼerãha Ñandejárape: “Hetaite ningo ajerure asy kuri ndéve Ñandejára remonguera hag̃ua papápe. ¿Mbaʼére piko reheja omano? ¡Aikotevẽterei ningo hese koʼág̃a!”. Ajedesespera aikuaaségui moõpa oĩ che túva, ha añeporandu: “¿Oime piko oho yvágape térãpa ja ndoexistivéima?”. Ha ahechávo umi ótro mitã orekoha gueteri itúvape, aenvidia chupekuéra.

Heta áñore aha vaʼekue káda día lénto pe sementériope. Añesũ pe panteón renondépe ha añemboʼe: “Ñandejára, ¿moõ piko oĩ che túva? Aikuaaseterei ningo”. Avei ajerurémi chupe tachepytyvõ antende hag̃ua maʼerãpa okrea vaʼekue yvyporakuérape.

Idióma alemánpe oĩ hetaiterei lívro ha informasión, upévare apensa umívape ikatutaha oñekontesta chéve umi mbaʼe aikuaase vaʼekue. Upémarõ, arekópe 13 áño ajedesidi aaprendetaha  alemán. Ha upéi áño 1967-pe aha vaʼekue astudia Jénape, peteĩ siuda opytáva Alemániape. Alee umi lívro oskrivi vaʼekue umi filósofo alemán, koʼýte umi oexplikáva maʼerãpa oexisti yvyporakuéra. Ha atopáramo jepe heta mbaʼe iñinteresánteva, ni peteĩva nachekonvenséi vaʼekue. Upévare asegi ajerure Ñandejárape ombohovái hag̃ua chéve umi mbaʼe aikuaaséva.

Áño 1970-pe, aha jey Hungríape, upépe aikuaa kuri che rembirekorãme, hérava Rose. Upérõ Hungría oĩ vaʼekue pe komunísmo poguýpe, upévare romenda riremi, Rose ha che rosẽ roho Áustriape. Péro ore idéa kuri roho upe rire Sýdneype, oĩva Austráliape, peteĩ che tio rendápe.

Tiémpo riremi atopa che travahorã Áustriape. Ha peteĩ díape, che kompañéro de traváho heʼi chéve la Biblia ikatuha ombohovaipaite umi mbaʼe aikuaaséva, ha omeʼẽ chéve mokõi lívro oñeʼẽva la Bíbliare, ojapóva umi testígo de Jehová. Sapyʼaitépe aleepaite umi lívro ha apyta aikuaaseve heta mbaʼe, upémarõ askrivi chupekuéra ajerureve hag̃ua peichagua puvlikasión.

Rokumpli javete un áño romenda hague, orevisita peteĩ kariaʼy haʼéva testígo de Jehová. Haʼe ogueru chéve umi puvlikasión ajerure vaʼekue, ha oporandu chéve ndastudiaséipa la Biblia. Che upepete voi aasepta. Aikuaase vaʼekue hetaiterei mbaʼe, upévare astudia hendive dos vése por semána, ¡ha 4 óra voi rostudia káda ke oho!

Amombaʼeterei ningo umi mbaʼe chemboʼe vaʼekue umi Testígo. Ha ni ndaroviaséi ohechaukárõ guare chéve Ñandejára heraha Jehová, hiʼárive olee chéve hikuái che Bibliaitépe oĩva úngarope. Upérõ ojapóma 27 áño aha hague misahápe ha ni una ves nahendúi vaʼekue Ñandejára réra. La Biblia okontesta chéve umi mbaʼe aikuaaséva, ha ahecharamoiterei mbaʼéichapa isentído ha ifásil oñembohovái lája umi mbaʼe. Por ehémplo, aaprende ke umi omanóva noñanduveimaha mbaʼeve, haʼete ku oke manóva mbaʼe hikuái (Eclesiastés 9:5, 10; Juan 11:11-15). Avei aikuaa la Biblia oprometeha ko yvýgui oiko jeytaha peteĩ hardín neporãmba jepéva, ha upépe “ndaiporimoʼãvéima omanóva” (Apocalipsis 21:3, 4). Che ajerovia umi omano vaʼekue “oñemoingove jeytaha”, ha aikuaa porã ahecha jeytaha che túvape (Hechos 24:15).

Rose cheapoja ha ostudia avei la Biblia, ha pyaʼe roprogresa rupi, rotermina dos mésepe pe lívro rostudiáva kuri. Ndorofaltái vaʼekue ni peteĩ rreunión ojapóvape umi testígo de Jehová. Ha rohecharamoiterei mbaʼéichapa haʼekuéra ojoayhu, imbaʼeporã ha oiko peteĩ ñeʼẽme (Juan 13:34, 35).

Áño 1976-pe oñemeʼẽ oréve permíso roike hag̃ua Austráliape. Rog̃uahẽre voi rohekáma umi testígo de Jehovápe ha haʼekuéra oretrata voi roĩramoguáicha ore rogaitépe. Ha áño 1978-pe rojevautisa kómo testígo de Jehová.

Koʼág̃a aikuaáma umi mbaʼe hetaite tiémpore añeporandu vaʼekue. Ha amasdía añemoag̃uive rupi Ñandejára Jehováre, ahecha chupe che túvaramo (Santiago 4:8). Ha areko pe esperánsa ahecha jeývo che túvape pe paraíso Ñandejára oprometévape (Juan 5:28, 29).

Áño 1989-pe rodesidi roho jey Hungríape, ikatu hag̃uáicha romombeʼu umi mbaʼe roaprende vaʼekue la Bíbliagui ore hentekuérape, ore amigokuérape ha hetave héntepe. ¡Rovyʼaiterei ikatu haguére romboʼe la Biblia hetaiterei persónape upépe! Ha iporãveha katu mas de seténtagui oiko testígo de Jehová, umíva apytépe oĩ che sy.

Che ningo 17 áñore añemboʼe vaʼekue Ñandejárape ha ajerure chupe tokontestami chéve umi mbaʼe aikuaaséva. Ha ojapóma 39 áño haʼe ombohovái hague chéve umíva. Koʼag̃aite peve añemboʼe Ñandejárape, péro haʼe hag̃ua chupe: “Aagradese ndéve che Ru, rekontesta haguére chéve umi mbaʼe aikuaase vaʼekue chemitãʼi guive”.