Umi omendáva oñopytyvõramo ojoguáta peteĩ pilóto ha ikopilótope oikuaa porãva moõpa ohose. Oĩ ramo jepe provléma haʼekuéra nopensái ijehénte, síno ohecha mbaʼépa ou porãvéta mokõivévape g̃uarã.

¿MBAʼÉPA HEʼI LA BIBLIA? “Haʼekuéra ndahaʼevéima mokõi, síno peteĩntema” (Mateo 19:6).

“Ména ha tembireko oñopytyvõ vaʼerã ikatu hag̃uáicha osẽ porã hikuái” (Christopher).

Umi omendáva ohasa jave peteĩ situasión ijetuʼúva ha noñopytyvõiramo ikatu hína oñepyrũ ojokulpa, ohecha rangue mbaʼéichapa osolusionakuaa la provléma. Upévare umi provléma michĩva jepe ikatu tuichave rei.

“Umi omendáva oñopytyvõmante vaʼerã. Che ména ha che ndorojapóiramo péicha haʼetéta mokõi persóna oikónteva el mísmo ógape ha ni nopenáiva ojuehe ojedesidíta jave peteĩ mbaʼe iñimportánteva” (Alexandra).

EJEPYʼAMONGETA HAG̃UA

• ¿Apensápa la pláta aganáva chembaʼenteha?

• ¿Aĩmante vaʼerãpa cheaño aĩ hag̃ua trankílo?

• ¿Ndatrataguasúipa ihentekuérandi ahecháramo jepe haʼekuéra iñunidoha?

PEÑEMONGETA HAG̃UA OÑONDIVE

• ¿Mbaʼéicha javépa ñañopytyvõ porã jepi?

• ¿Mbaʼépepa ikatu jajoapojave hína?

• ¿Mbaʼépa ikatu jajapo ñañopytyvõve hag̃ua?

¡ETANTEAMÍNA!

• Epensami la ne matrimónio haʼeha peteĩ partído de ténis, ¿mbaʼépa rejapo vaʼerã pehuga hag̃ua oñondive peteĩ ekípoicha pehuga rangue oñokóntrape?

• Epensa rangue mbaʼéichapa ikatu nde regana, epensa vaʼerã mbaʼéichapa ikatu mokõivéva pegana.

“La iñimportantevéva ningo ñaime unído ha pyʼaguapýpe, ndahaʼéi mávapa irrasón” (Esteban).

MBAʼÉPA HEʼI LA BIBLIA: “Ani pejepyʼapy umi mbaʼe peẽme okonvenívarente, síno pejepyʼapy vaʼerã avei umi ótrore” (Filipenses 2:​3, 4).