Umi túa omeʼẽva ehémplo porã ojapo la omboʼéva ifamíliape. Por ehémplo ndaikatúi rehaʼarõ ne família heʼi siémpre la verda oimérõ nde remanda jepi chupe teʼi nereimeiha ou jave nde rógape álgien nereñeʼẽséivandi.

“Oĩ peteĩ fráse heʼíva: ‘Ejapo la che haʼéva, péro ani la che ajapóva’. Péro upéva ndoikoiete ñamboʼe jave ñane famíliape. Umi mitã ningo ojogua espónhape, oipytéva entéro mbaʼe jajapóva ha jaʼéva. Oimérõ ñande ñamboʼe chupekuéra una kósa péro jajapo ótra kosaite, opilláta hikuái ha heʼíta ñandéve” (David).

¿MBAʼÉPA HEʼI LA BIBLIA? “Nde reikóva repredika ha ere: ‘Aníke remonda’, ¿mbaʼére piko nde remonda?” (Romanos 2:21).

Umi mitã omañaiterei la ojapóvare ituakuéra, umi mitãrusukuéra jepe ojesarekove ituakuéra ojapóvare, ikompañerokuéra ojapóvare rangue. Upéva heʼise peẽ pemoĩ vaʼerãha la ehémplo iporãvéva chupekuéra g̃uarã, péicha ikatúta oho hikuái tape porãre.

“Ikatúngo jarrepeti álgo ñane membýpe 100 vése, ha ndajaikuaamoʼãi jey ñanerendúpa raʼe, péro nañakumplíriramo la jaʼéva, upepete heʼíta ñandéve ñande rovaitépe. Haʼekuéra ohechapaite la jajapóva, haʼetéramo jepe la nopenaguasúiva ñanderehe” (Nicole).

¿MBAʼÉPA HEʼI LA BIBLIA? “Pe persóna orekóva pe arandu oúva yvágagui [...] ndahovamokõiri” (Santiago 3:17).

Eñeporandumína. “¿Mbaʼeichagua prográmapa ahecha televisiónpe? ¿Mbaʼéichapa atrata che ména térã che rembirekópe ha che famíliape? ¿Mbaʼeichagua amígopa areko? ¿Ajepyʼapýpa che rapicháre?”. Epensa vaʼerã rejapópa hína umi mbaʼe reipotáva ne familiakuéra oaprende ha kon el tiémpo ojapo avei.

“Che ména ha che ndorojeruréi umi mitãme ojapo hag̃ua álgo ore voi ndorojapóiva” (Cristina).

Ejerure perdón. Umi mitã oikuaáma ituakuéra ndahaʼeiha perfékto. Upévare rejavy jave rejerurérõ perdón ne rembiayhúpe ha ne familiakuérape, remboʼe hína chupekuéra isinséro ha iñumílde hag̃ua.

“Ñane família ohendu vaʼerã ñande ñarrekonoseha jajavy jave ha jajerureha perdón, ndajajapóiramo upéva haʼekuéra ndojapomoʼãi avei” (Rita).