YOMARA ha iñermáno Marcelo ha Hiver oiko peteĩ puevloʼi oĩvape Guatemálape. Yomara oñepyrũ vaʼekue ostudia la Biblia umi testígo de Jehovándi, ha tiémpo riremi umi iñermanokuéra oñepyrũma avei ostudia. Péro oĩ kuri peteĩ provléma, koʼã mbohapy oñoermáno ningo siégo ha ndoleekuaái braille. Ha upévare pe ombostudiáva chupekuéra la Biblia, olee chupekuéra umi puvlikasión ostudiáva hikuái ha avei olee umi téxto de la Biblia.

Chupekuéra ningo ijetuʼueterei vaʼekue oho hag̃ua rreunionhápe. Pe salón ningo opyta vaʼekue 40 minúto pe haʼekuéra oikohágui, upévare haʼekuéra añónte ndaikatumoʼãi kuri oho upe peve. Péro umi ermáno oĩva pe kongregasiónpe ojapo umi arréglo ogueraha hag̃ua chupekuéra káda rreuniónpe. Ha koʼã mbohapy oñoermáno oñepyrũrõ guare oreko párte pe rreunión éntre semanaguápe, umi ermáno oipytyvõ chupekuéra ikatu hag̃uáicha omemorisa pe párte ojapótava.

Mayo de 2019-pe oñepyrũma avei ojejapo umi rreunión pe puevloʼi haʼekuéra oĩháme. Ha upérõ peteĩ matrimónio oservíva de prekursór rregulár ova pe haʼekuéra oĩháme. Ko matrimónio oipytyvõseterei kuri koʼã mbohapy ermánope olee ha oskrivikuaa hag̃ua bráillepe. Ha haʼekuéra ndoleéi ha ndoskrivikuaáirõ jepe bráillepe, oho peteĩ vivliotékape oaprende ha ostudia hag̃ua mbaʼéichapa ojelee ha ojeskrivi vaʼerã bráillepe. Upéi ikatu hag̃uáicha omboʼe chupekuéra.

Unos kuánto mésepente, koʼã mbohapy ermáno oleekuaáma kuri bráillepe. Upéicha rupi, haʼekuéra ikatúma kuri omombareteve pe amista oguerekóva Jehovándi. a Upévare koʼág̃a Yomara, Marcelo ha Hiver oservíma kómo prekursór rregulár. Ha Marcelo katu oservi kómo siérvo ministeriál. Haʼekuéra ningo iguapoiterei oservívo Jehovápe ha oipurupaite voi la itiémpo ojapo hag̃ua upéva hikuái káda semána. Haʼekuéra ikyreʼỹeterei rupi oservívo Jehovápe, omokyreʼỹ avei umi ótro ermánope.

Koʼã mbohapy oñoermáno ningo oagradeseterei pe mborayhu ohechaukáva chupekuéra umi ermáno oĩva ikongregasiónpe. Yomara heʼi: “Roikuaa ypy guive umi Testígope ohechauka oréve orerayhu añeteha hikuái”. Ha Marcelo heʼive: “Ore ningo koʼág̃a roguereko umi amígo ikalidaitereíva oĩva kongregasiónpe. Avei koʼág̃a roiméma pe Jehová família tuichaitévape oĩva ko yvy tuichakuére, oikóva en unida ha ojoayhu añetéva”. Yomara ha iñermanokuéra ohaʼarõitereíma og̃uahẽ pe día ohecha hag̃ua ko yvýgui oikomaha peteĩ paraíso (Sal. 37:10, 11; Is. 35:5).