Shiimain eein nia sümaa meʼrujuin nia, eʼrüi wayumüin nia nümüin Maleiwa «nia chi aluwataakai saaʼu wayuu» (Juan 14:30; Éfeso 6:11, 12). Süküjain tü Bibliakat tü nünüliayaasükat chi Yolujaakai, müsüjeseʼe wayaawatüin tü nukuwaʼipakat. Anuu soʼutku tü nünüliayaasükat:

•   Satanás, «nüʼünüü Maleiwa» maluʼulu (Job 1:6).

•   Yolujaa, «aküjai alawaa» maluʼulu (Alateetkat Mapeena 12:9).

•   Wüi, süküjain tü Bibliakat «emeejülüin» maluʼuluin shia (2 Corinto 11:3).

•   Chi emeejüikai (Mateo 4:3).

•   Chi aküjaikai alawaa (Juan 8:44).

Nnojoishi shiyaakuayaain tü kasa mojusü eekat jee tü mojusü saaʼinrakat wayuu

 Eeshii eekai nanoujain shiyaakuayaain chi Yolujaakai tü kasa mojusü naleʼeruʼukat napüshuaʼa na wayuukana nümaʼaleeya Maleiwa. Nnojoishi kaleʼeruʼuin süchiki kaainjalaa Maleiwa, ¿jamataalakaʼa süpüla mojulaainjachin nia? (Deuteronomio 32:4; Job 2:1-6). Süküjain tü Bibliakat süchiki nuuʼulakünüin aaʼin Jesús nutuma chi Yolujaakai (Mateo 4:8-10; 1 Juan 3:5). Sükajee tü süküjakat tü Bibliakat wayaawatüin saaʼu shiimain eein chi Yolujaakai. Nnojoishi niain wanee shiyaakuayaa wanee kasa mojusü.

 Wainma na wayuu anoujakana nnojoluin eein chi Yolujaakai. ¿Ponuinjatche waaʼin tü nanoujakalü anain? Nnojo. Saashin tü Bibliakat nimeejüin Satanás na wayuukana süpüla naaʼinrüinjatüin tü keeʼireekat naaʼin (2 Tesalónica 2:9, 10). Nuuntuin nunoujirüin tü wayuukalüirua sünain nnojoluin eein nia (2 Corinto 4:4).

  Alawaa: Lucifer shia wanee suwalaʼata nünülia chi Yolujaakai.

 Tü shiimainkat: Tü pütchikat Lucifer ashajuushikat suluʼu hebreo «kawaralain» maluʼulu (Isaías 14:12). Pütchikat tüü, ekeraajüsü nanain na aluwataalii chajanakana Babilonia. Süsalashii naya naainjala nutuma Maleiwa saaʼujee neʼrüin wayumüin (Isaías 14:4, 13-20). Najaʼlajeʼennapa na aluwataalii chajanakana Babilonia müsü pütchi nachiki «na warattakana».

  Alawaa: Aʼyataashi chi Yolujaakai nümüin Maleiwa.

 Tü shiimainkat: Chi Yolujaakai nüʼünüü nia Maleiwa. Nnojoishi nia aʼyataain niʼipajee jee nüʼünüü nia na aʼyataakana nümüin Maleiwa. Müshijeseʼe nüküjain alawaa nachiki jee napüleeruain naaʼin (1 Pedro 5:8; Alateetkat Mapeena 12:10).