Tü nüshajalakat Juan 8:12-59
8 12 Naashajaaka nüchikuaʼa Jesús namaa, nümakalaka namüin: «Müshi taya maʼaka saaʼin wanee luusa naʼaka na wayuukana. Chi wayuu oushikajaakai süchiirua takuwaʼipa nnojoleechi saʼakain piʼyuushi. Shieerü aapünaka nümüin tü luusa katakalü atuma soʼu wayuu».
13 Nasoutakalaka na fariseokana nümüin: «Anasü neʼe pünüiki püchikijiraa, nnojotsüjaʼamata shiimain tü pümakat».
14 Nusoutakalaka Jesús namüin: «Mayaainjeʼe anain tanüiki tachikijiraa, shiimain tü tamakat süka tatüjaain saaʼu jalejeʼewalin taya otta jalaʼwalin taya. Akaajasaʼa jiakana nnojotsü jütüjaain saaʼu jalejeʼewalin taya otta jalaʼwalin taya.
15 Kasalajanasü saainjala wayuu jutuma sünainjee neʼe tü sukuwaʼipakat juʼupala, nnojotpejeʼe kasalajanain saainjala wayuu tatuma.
16 Kasalajanainjatüle saainjala tatuma lotusüjeʼe sukuwaʼipa tatuma, jama nnojolin tamüiwaʼain taya, eeshi chi Tashikai tamaa, chi Kajünalakai taya.
17 Mataasü sümakai tü Pütchi Aluwataanakalü anain jia: ‹Shiimain tü namakat piamashii wayuu pansaale tü namakat süchiki wanee kasa›.
18 Taya chi anakai anüiki tachikijiraa otta anasiaʼaya nünüiki chi Tashikai tachiki, chi Kajünalakai taya».
19 Nüsakinnaka Jesús natuma: «¿Jalakaʼa chi Püshikai?». Nusoutakalaka Jesús namüin: «Nnojoishi taya jiʼraajüin otta nnojoishi jiʼraajüin chi Tashikaiya. Jiʼraajülejeʼeya taya, jiʼraajüinje chi Tashikai».
20 Nüküjain Jesús tia, wanaa sümaa yalajachin nia peje sünain tü kojon eere shijitünüin tü nneetkat, soʼu chajachin nikirajüin suluʼu tü aʼwaajüleekat. Nnojotpejeʼe jaralin ataʼülüin nia süka isayülüin nükalia.
21 Nümakalaka Jesús nüchikuaʼa namüin: «Oʼunajachi taya, jüchajaajeechi achiki taya, outeenapejeʼeya neʼe jia saaʼu jaainjala. Nnojoishii süpüla jüntajanain chaa eeinjachire taya».
22 Yootiraaka na judíokana sünain maa: «¿Oʼuniraainjaiche naaʼin chi makai? ‹Nnojoishii süpüla juʼunajanain chaa eeinjachire taya›, ¿jamakaʼa nümaka?».
23 Anuukalaka sooʼomüin nünüiki Jesús namüin: «Yaajeʼewalii jia saaʼu tü mmakat, chejeʼewaisa taya iipünaajee. Yaajeʼewalii jia saʼaka wayuu, nnojoipejeʼe yaajeʼewalin taya.
24 Müshijeseʼe tamayülin jümüin, ‹Outajanaʼaya jia saaʼu jaainjala›. Nnojoliirejeʼe junoujain sünain tayain chi antajachikai anülia, outeenaʼaya neʼe jia saaʼu jaainjala».
25 Nüsakinnakalaka Jesús natuma: «¿Jaraikaʼa maʼin pia?». Nusoutakalaka Jesús: «Jiyaawateetche aaʼu, jaʼitayaain taküjain shia jümüin.
26 Wainma tü kasa taküjainjatkat jüchiki otta wainma tü kasa kasalajanainjanakalü anainjee jia tatuma. Chi Kajünalakai taya nüküjain waneepia tü shiimainkat otta shia taküjaka namüin na wayuukana tü kasa nüküjakat tamüin».
27 Nnojotpejeʼe nayaawatüin saaʼu niain naashajaain achiki chi Nüshikai.
28 Nümakalaka Jesús namüin: «Jükacherapa chi Süchonkai Wayuu, jiyaawateechi aaʼu tayain chi antajachikai anülia otta jiyaawateerü aaʼu nnojoluin taaʼinrüin wanee kasa süka taaʼin tamüiwaʼa. Shia taküjaka tü nikirajakalü anain taya chi Tashikai.
29 Eeshi tamaa waneepia chi Kajünalakai taya. Nnojoishi nüpütüichin taya tamüiwaʼa süka taaʼinrüin waneepia tü kasa anashiikat nümüin».
30 Wattaka naalii na wayuu anoujakana nünain Jesús naapaiwaʼaya tü nümakat.
31 Nümakalaka Jesús namüin na judío anoujakana nünain: «Ayatüle jaaʼinrüin tü kasa tekirajakalü anain jia, shiimainjaʼamata tekirajanain jia.
32 Jiyaawateerü saaʼu tü shiimainkat otta taasheena jia suluʼujee tia».
33 Nasoutakalaka nümüin: «Nüikeyuu waya Abrahán otta nnojoishii waya süchepchiainnain wayuu. ¿Jamakaʼa ‹Taasheena jia›, pümakaʼa wamüin?».
34 Nusoutakalaka Jesús namüin: «Shiimain tanüiki jümüin, chi wayuu aaʼinrakai kasa mojusü süchepchiashi nia naainjala.
35 Nnojoishi nipiajachireeinña wanee achepchiee nümaʼana chi nülaamainkai. Nia nipiajachireeka nüchon chi nülaamainkai.
36 Taashire jia nutuma Nüchon chi Maleiwakai, shiimainjaʼa maʼin taashin jia.
37 Tatüjaa aaʼu nüikeyuuin jia Abrahán, juʼuteepejeʼe taaʼin süka nnojoluin sütanalüin jaaʼin tü tamakat jümüin.
38 Shia taashajaaka achiki tü kasa teʼrakat chaiwaʼaya taya nümaa chi Tashikai, akaajasaʼa jiakana shia jaaʼinraka tü nümakat chi jüshikai».
39 Anuujeseʼe nanüiki nümüin Jesús: «Nia washikaʼaya Abrahán». Nusoutakalaka Jesús namüin: «Nialejeʼe jüshin Abrahán, jaaʼinrüinje tü kasa naaʼinrakat.
40 ¿Jamakaʼa juʼuteeka taaʼin, eerejeʼe taküjain jümüin tü shiimain nüküjakat Maleiwa tamüin? Nnojotsüsaʼa müin naaʼinrala Abrahán.
41 Shia neʼe jaaʼinraka tü naaʼinrakat chi jüshikai». Nasoutakalaka nümüin Jesús: «Niaʼala neʼe Washika Maleiwa nümüiwaʼa, nnojoishiisa ojulijuushin waya ».
42 Nusoutakalaka Jesús namüin: «Nialejeʼe Maleiwa Jüshin, aishije taya jüpüla. Nüjünala taya Maleiwa, müshijeseʼe yaain taya. Nnojoishi antüshin neʼe taya süka taaʼin tamüiwaʼa, nia kajünalaka taya.
43 Nnojotsü jiyaawatüin saaʼu tü tamakat jümüin süka nnojoluin kapülain jaaʼin tanüiki.
44 Nüchooin jia chi Yolujaakai, shia jaaʼinreeka amüin tü nüchekakalü achiki chi jüshikai, jamüshijaʼa nia uwomuyuushi soʼujeʼereeya nüküjain alawaa nüchiki Maleiwa. Niyouta achikit tü shiimainkat süka shiainjaʼa jülüjain naaʼin waneepia tü alawaakat. Nüküjale wanee alawaa, jaʼyasü saaʼu nukuwaʼipa alaain nia, jama niain shikiishin tü alawaakat.
45 Nnojotpejeʼe junoujain tanüiki eerejeʼe shiimain tü taküjakat jümüin.
46 Nnojoishi eein wanee wayuu jaʼakajee aküjai kaainjaralin taya. Shiimain tü taküjakat jümüin, ¿jamakaʼa nnojotka junoujain tanüiki?
47 Chi wayuu nüchonkai Maleiwa, kacheʼeshi sümüin tü nümakat Maleiwa. Nnojoliipejeʼe jia kacheʼein sümüin tü nümakat Maleiwa, jama nnojoliin nüchooin jia».
48 Naapaiwaʼaya tia na judíokana, namakalaka nümüin Jesús: «¿Nnojotsüjasaʼa pansaain wanüiki wanaa sümaa wamüin pümüin ‹Wayuu samariajeʼewai pia otta yolujaashi neʼe pia›?».
49 Nusoutakalaka Jesús namüin: «Nnojoishi yolujaashin taya. Nia kojutuka tatuma chi Tashikai, mojutupejeʼe taya jutuma.
50 Nnojoishi taya shiiʼireeshin kojutaa sutuma wayuu, niapejeʼe Maleiwa acheküin süpüleerua kojutuin taya atumawaa otta nieechi kasalajanaka atuma saainjala wayuu.
51 Shiimain tanüiki jümüin, chi wayuu oonookai sümaa tanüiki, nnojoleechi outuin».
52 Namakalaka na judíokana nümüin Jesús: «Shiimainjaʼaya maʼin yolujaashin pia, mataashi outakai Abrahán otta outushii na nünüikimaajanakana Maleiwa, ¿jamakaʼa pümakaʼa: ‹Chi wayuu oonookai sümaa tanüiki, nnojoleechi outuin›?
53 Outushii na nünüikimaajanakana Maleiwa, outushiaʼaya chi washikai Abrahán, ¿piataale miyoʼuleeinña nuulia? ¿Kasashikai maʼin pia paajüin?».
54 Nusoutakalaka Jesús namüin: «Nnojotsü kasain saamüin tamüin taʼwaataale suluʼu takuwaʼipa. Nia kojutuka atuma taya chi Tashikai, chi Jümaleiwasekai jaashin.
55 Nnojoipejeʼe nia jiʼraajüin, teʼraajüinsaʼa nia. Taküjalejeʼe nnojolin teʼraajüin nia, wayuuje alaa taya wanaa jümaa. Teʼraajapejeʼe nia otta taaʼinrüin tü nümakat tamüin.
56 Talatapuʼusü maʼin naaʼin chi jüshikai Abrahán sutuma niʼreein tü kasa taaʼinrajatkat. Niʼrüinjaʼaya shia otta talatüsü naaʼin sutuma».
57 Anuujeseʼe nanüiki na judíokana nümüin: «¿Jamakuwaʼipai süpüla piʼraajüinjachin nia, eetaayaai jaʼraliirüin shikii puuyase?».
58 Nusoutakalaka Jesús namüin: «Shiimain tanüiki jümüin, eetüjüiya taya nnojoiwaʼaya joʼuuin Abrahán».
59 Naapaayaa namaka ipa süpüla naʼinaʼalajachin Jesús, ounjulaapejeʼe nia noulia. Nujuʼitakalaka suluʼujee tü aʼwaajüleekat.
