Sutuma tü Nuluwataayakat Maleiwa, nnojoleerü eein suluwataaya wayuu, shieerü eeka neʼe saaʼu tü mmakat Nuluwataaya Maleiwa (Daniel 2:44; Alateetkat Mapeena [Apocalipsis] 16:14). Kettaapa tia, anuu tü eeinjatkat sutuma Nuluwataaya Maleiwa:

•   Nnojoleerü eein wayuu mojulaasü. «Na mojulaashiikana, ajalajeʼennüinjana saaʼujee tü mmakat» (Proverbios 2:22).

•   Nnojoleerü eein atkawaa. Najaʼttireerü Maleiwa «tü atkawaakat sainküin tü mmakat» (Salmo 46:9).

•   Aneerü sukuwaʼipa wayuu. «Shiimain maʼin nojoyoloweenain suupünaa suuʼulia uuwa otta higuera, nnojoleena eimmolojunuin» (Miqueas 4:4).

•   Paʼaraiiseerü tü Mmakat. «Wüittuuijeerü otta kasiijeerü maʼin wunuʼulia süpaʼapünaa tü anouishiikat otta tü isashiipaʼakat» (Isaías 35:1).

•   Talateerü saaʼin wayuu sünain aʼyatawaa. «Talateerü naaʼin sünain aʼyatawaa na wayuu taneekajalakana. Nnojoleerü kasain nashapajaain achiirua» (Isaías 65:21-23).

•   Nnojoleerü ayuulii. «Nnojoleechi eein wanee wayuu eekai ‹ayuuishi taya› nümeechin» (Isaías 33:24).

•   Nnojoleerü laülaain wayuu. «Nnojolinjachi laülaain, jimaʼalinjachi nüchikuaʼa» (Job 33:25).

•   Asoʼiraajeerü naaʼin na outushiikana. «Soʼuweena wane kaʼi, saapeerü [nünüiki Jesús] süpüshua tü wayuu ouktüsükalüirua sümaa sujuitteerüin mmaapüjee» (Juan 5:28, 29).