Apocalipsis 16:1-21
-
Tü kasa eekat sutuma jashichin Maleiwa, tü eekat suluʼu tü akaratshisükat iita (1-21)
-
Oʼyotunüsü tü kasa eejatkat suluʼu tü iitakat saaʼu tü mmakat (2), shiroku tü palaakat (3), shiroku tü süchikat jee eejeere süparalüin wüin (4-7), naaʼu chi kaʼikai (8, 9), saaʼu tü einasee suluwataakalü aaʼu tü wüchii wünaʼapüjatkat (10, 11), shiroku tü süchi kanüliakalü Éufrates (12-16) jee oʼyotunüsü shia iipünaamüin (17-21)
-
16 Taapüin wanee pütchi emetutsü maʼin eejee tü aʼwaajüleekat jee sümakalaka namüin na akaratshishiikana aapiee: «Juʼuna mmapaʼamüin, meetkalaka jiʼyotokoi saaʼin saaʼu tü mmakat tü kasa eekat sutuma jashichin Maleiwa, tü eekat suluʼu tü akaratshisükat iita».
2 Nuʼunakalaka chi palajachikai aapiee jee niʼyotoko saaʼu tü mmakat tü kasa eejatkat suluʼu tü iita najapulujutkat. Yooijasü nata na wayuukana sutuma wanee ayuulii mepisat jee müliashii maʼin naya sutuma, naya müliakana maʼin sutuma na kanainkana sejeetse tü wüchii wünaʼapüjatkat jee na aʼwaajakana shiyaakua tia wüchiikat.
3 Chi wane aapieekai, niʼyotuin shiroku tü palaakat tü kasa eejatkat suluʼu tü iita najapulujutkat. Ishajaaka tü palaakat maʼaka nüsha wanee wayuu eekai nuʼutuushin aaʼin, outakalaka süpüshuaʼa seʼe tü palaakat.
4 Niʼyotuin chi wane aapieekai tü kasa eejatkat suluʼu tü iita najapulujutkat, niʼyotuin shia shiroku tü süchikalüirua jee shiroku eejeejatüle süparalüin tü wüinkat, ishajaakalaka shia.
5 Anuujeseʼe nünüiki chi aapiee laülaashikai saaʼu tü wüinkat: «Pia chi eekai maaʼulu, chi eetüjüikai sümaiwa paala jee chi Waneepiakai sümaa wayuu, lotusü pukuwaʼipa süka püküjain sülatüinjatüinña tia.
6 Amülasü nasha na aneekuushikana natuma naya wayuukana otta nasha na pünüikimaajanakana, müshiijeseʼe püsiʼrüin naya isha. Nachajaalaʼaya tia nooʼomüin».
7 Taapakalaka wanee pütchi eejee saʼajünüin wanee kasa nümüin Maleiwa sünain maa: «Maleiwakai Jehová,* chi Pülashikai maʼin, shiimain sümaa lotuin sukuwaʼipa tü kasa alatajatkat paashin».
8 Niʼyotoko chi wane aapieekai tü kasa eejatkat suluʼu tü iita najapulujutkat, niʼyotuin shia naaʼu chi kaʼikai. Suuʼulaanaka jotuinjatüin wayuu nutuma chi kaʼikai.
9 Jotoko naya wayuukana sutuma jaʼin maʼin chi kaʼikai, mojupejeʼe nanüiki nüchiki chi Maleiwakai* jee nnojoishii naya ayaawajaain suulia naainjala sümaa naʼwaajüin chi Maleiwakai, chi laülaakai saaʼu tü kasa mojusü eekalü atuma müliaa.
10 Niʼyotoko chi wane aapieekai saaʼu tü einasee suluwataakalü aaʼu tü wüchii wünaʼapüjatkat tü kasa eejatkat suluʼu tü iita najapulujutkat, shipiʼyuushijaaka eere suluwataain, müsü sojolojiraakai saaʼin shiyee wayuu saaʼujee alin sümüin tü kasa alatakat,
11 mojupejeʼe nanüiki nüchiki chi Maleiwa sirumatuʼujeʼewaikai sutuma müliain maʼin naya jee sutuma yoolin nata, nnojoliika naya ayaawajaain suulia tü kasa naaʼinrakat.
12 Niʼyotoko chi wane aapieekai tü kasa eejatkat suluʼu tü iita najapulujutkat, niʼyotuin shia shiroku tü süchi miyoʼukat maʼin kanüliakalü Éufrates. Itakalaka tü wüinkat süpüla nalatüinjanain na aluwataashii sejenakana wüinpüjee.
13 Teʼrakalaka chi wüi miyoʼukai maʼin, tü wüchii wünaʼapüjatkat jee chi nünüikimaajachiaakai Maleiwa. Nojuʼitiraka wanee pütchi müsü nümaʼanajeejatiaakai saaʼin Maleiwa jee yarüttüsü maʼin shia, mataalasü aka saaʼin ipet.
14 Tia pütchikat sümaʼanajeejatü Yolujaa jee naapaa amaalü shia na sülaülashiikana mma, eesü kasa pülasü sutuma tia pütchikat süpüla noutkajeʼennüinjanain na sülaülashiikana mma sünain tü atkawaa eejeetkat soʼu tü nükaliakat chi Maleiwa Pülashikai maʼin.
15 «Jülüja paaʼin tü taküjainjatkat pümüin, anteechi taya maʼaka naaʼin wanee kaʼruwarai antakai sünain aʼluwajaa. Anataʼaleeshijaʼa chi wayuu eejakai aaʼin sümaa naʼatüin nüsheʼin nünain, nnojoleechikalaka nia masheʼinkuʼu müin jee nnojoleechi nia eʼrüin japülii suʼupala wayuu».
16 Noutkajeʼennaka na aluwataashiikana suluʼu tü mma kanüliakalü Armagedón suluʼu hebreo.
17 Niʼyotoko chi chiiruaajachikai aapiee tü kasa sulujutkat tü iita najapulujutkat, niʼyotuin shia mmapaʼamüin. Taapakalaka wanee pütchi emetutka maʼin eejee tü aʼwaajüleekat wanaapünaa sümaa tü einasee süpülajatkalü aluwatawaa, «¡Kettaaitpan!», müsü.
18 Kayaaka maʼin tü juyakat, saapünakalaka sünüiki wayuu, atüttüsü tü juyakat jee akutkujaasü tü mmakat sümaa emetuluin maʼin shia, nnojotsü eein wanee kasa eekai müin aka saaʼin tia soʼujeʼereeya sukumajünüin wayuu yaa saaʼu tü mmakat. Wattakuatsü akutkujaain tü mmakat sümaa emetuluin maʼin shia.
19 Apünüinkalaka shiʼipapaʼa tü pueulo miyoʼukat, sujuttakalaka tü pueulo sainküinkat tü mmakat. Sotoko naaʼin Maleiwa Babilonia tü Kojutukalü Atumawaa süpüla müinjatüin nüsiʼrakai saaʼin tü wiino sulujutkat tü iita jashieemaajatkat nutuma Maleiwa.
20 Emeʼrojoosü süpüshuaʼa tü mma pasanainkat sünain palaa jee nnojorülaʼa müsü tü uuchikalüirua.
21 Sujunuujaakalaka saaʼu wayuu shiʼichiise juya, miyoʼuyuu maʼin shia, eesü maʼaka saaʼin piama shikii kilo* saawain waneʼewai sukua. Mojupejeʼe sünüiki wayuu nüchiki Maleiwa saaʼujee nuluwataain namüin tü shiʼichiisekat juya, jama wattain maʼin saalii kasa ajaʼttaka sutuma.
Noota
^ Pünaʼla tia suluʼu tü kanüliakat «Sooʼomüin pütchi A5».
^ «Mojusü nanüiki süchiki tü nünüliakat Maleiwa» maluʼulu tia suluʼu griego.
^ «Müsü saawain maʼaka saawain wanee talento» maluʼulu tia suluʼu griego. Pünaʼla tia suluʼu tü kanüliakat «Sooʼomüin pütchi B14».
