Nünülia. Müsü nünüiki: «Taya chi kanüliakai Jeʼwaa» (Isaías 42:8). Ashajünüsü 7.000 sukua tü nünüliakat Maleiwa suluʼu tü Wiwüliakat. Eʼitaanapejeʼe neʼe tü pütchikat Senyotkai shiiʼiraka tü nünüliakat Maleiwa suluʼu waneirua Wiwülia, tia makat nünüliasü neʼe atumawaa. Nücheküin Maleiwa paʼaleewain nia otta puchuntuin tü nünülia shiimainsükat (Salmo 105:1).

Tü nünüliakat atumawaa. Suluʼu tü Wiwüliakat wainma tü nünüliakat Jeʼwaa atumawaa. Maleiwakai münüshi, chi Pülashikai maʼin, chi Kakumalakai kasa süpüshuaʼa, chi Washikai, Senyotkai otta Laülaashikai saaʼu kasa süpüshuaʼa, münüshi. Nachuntuin tia noʼuraajapa nümüin Jeʼwaa na aʼyataakana nümüin sümaiwa otta nuchuntuinya tü nünüliakat (Daniel 9:4).

 Nukuwaʼipa Maleiwa. Meʼrujusai chi Maleiwakai (Juan 4:24). «Nnojotsü wayuu eekai shiʼrüichin Maleiwa», müsü tü Wiwüliakat (Juan 1:18). Süküjain tü Wiwüliakat jamüin naaʼin Maleiwa sünainjee wanee kasa. Eeshi süpüla talatüin nia sümaa tü kasa waaʼinrakat jee shiale mojuin naaʼin sutuma (Salmo 78:40, 41; Proverbios 27:11).

Tü nukuwaʼipa anakat maʼin. Wanaawasü wayuu nümüin Maleiwa, jaʼitairü jamapuʼuin nakuwaʼipa jee naatain noumain (Aluwataaushikana [Hechos] 10:34, 35). Amüliajüin nia wayuu, akaalinjai nia, nnojoishi kaashichijaaralin, aipürai nia otta matüjainsai aküjaa alawaa (Éxodo 34:6, 7). Eepejeʼe pienchisü akuwaʼipaa jaʼyakat maʼin nünain.

Pülashi nia. Niakai, nia «chi Maleiwa Pülashikai maʼi». Sutuma pülain nia, nuuntuin naainjain süpüshuaʼa tü kasa nüküjakat achiki (Génesis 17:1).

Kekiishi nia. Nnojoishi eein wanee wayuu kekiikai maʼin nuulia Maleiwa. Saashin tü Wiwüliakat, nia neʼe waneeshikai sünain kekiin maʼin nia (Roma 16:27).

Lotusü nukuwaʼipa. Loto akuwaʼipachi nia waneepia. Matüjainsat mojuu tü naaʼinrakat jee lotusü sukuwaʼipa wanee kasa naainjapa shia (Deuteronomio 32:4).

Aipürai maʼin. Aipürai wayuu Maleiwa saashin tü Wiwüliakat (1 Juan 4:8). Aipürai nia wayuu, shiaʼaya maʼin nukuwaʼipaka tia. Wayaawatüin aishaatain waya nüpüla sünainjee tü naaʼinrakat jee anashii waya sünainjee tia.

Aleewashi wamaa. Nia Maleiwa chi Washi chakai iipünaa (Mateo 6:9). Aleeweena waya nümaa kanourale waya nünain (Salmo 25:14). Jülüjashii maʼin waya naaʼin makalaka nücheküin warütkaain nünainmüin, woʼuraajüin nümüin jee waküjain süchiki tü kasa alatakat wamüin (Santiago 4:8; 1 Pedro 5:7).

Nnojoishi niain Jesuu chi Maleiwakai. Waneeshia Jesuu sünain nukumalain Maleiwa. Müshijeseʼe Nüchon Maleiwa nümünüin amüin suluʼu tü Wiwüliakat (Juan 1:14). Akumajuushi Jesuu nutuma Jeʼwaa, niakalaka niʼirumain. Nuluwataain nia Jeʼwaa süpüla niainjachin akumajaka tü kasa eekat otta na katakana oʼu (Proverbios 8:30, 31; Colosas 1:15, 16).

 «Tayaʼaya Maleiwakai», nnojoishi müin Jesuu. «Teʼraajüin nia süka chajeejachin taya nümaʼanajee je süka nuluwanaajalain taya», müshi Jesuu nüchiki Maleiwa (Juan 7:29). Müsü nünüiki mayaa sümüin wanee nikirajüin: «Chi Tashikai, chi Jüshikai wanaa tamaa» otta «Chi Tamaleiwasekai, chi Jümaleiwasekai wanaa tamaa» (Juan 20:17). Süchikijee outuin nia, nüsoʼirüin Jeʼwaa naaʼin süpüla chainjachin nia nümaa iipünaa, naapüin laülawaa nümüin otta niʼitaain nia süpüla nuluwataain nikialuʼujee (Mateo 28:18; Aluwataaushikana 2:32, 33).

Eeshi süpüla nükaalinjain pia Jesuu süpüla pürütkaain nünainmüin Maleiwa

Antüshi Jesuu süpüla nüküjain wamüin nukuwaʼipa chi Nüshikai. Müsü mayaa nünüiki Jeʼwaa nüchiki Jesuu: «Anii chi Tachonkai aishikai tapüla. Jüüjüü jümata sümüin nünüiki» (Marcos 9:7). Nia Jesuu chi eʼraajakai maʼin Maleiwa. Müshi Jesuu mayaa: «Chi eʼraajakai chi Tashikai, taya neʼe ooʼulaka tü wayuukolüirua eekai teeʼiyatüin nia sümüin» (Lucas 10:22).

Nüshatüin maʼin Jesuu nukuwaʼipa Maleiwa. Mashaatasü nukuwaʼipa Jesuu maʼaka nukuwaʼipa chi Nüshikai. Anuukalaka nünüiki: «Chi eekai niʼrüin taya, niʼrüin chi Tashikaʼiya» (Juan 14:9). Nükaalinjain wayuu Jesuu süpüla neʼraajüin Maleiwa, jama niiʼiyatüin namüin süka tü naaʼinrakat otta tü nüküjakat, alin maʼin naya nüpüla chi Nüshikai. Müsü nünüiki Jesuu mayaa: «Taya neʼe chi süntajachikai akajee wayuu nünainmüin Maleiwa, aküjakai sümüin wayuu tü shiimainkat otta chi katakai atuma soʼu wayuu. Taya neʼe tayakai chi süntajachikai akajee wayuu nünainmüin chi Tashikai» (Juan 14:6, TNM). Anuu süpüshi nünüiki: «Naʼwaajüinjachi chi tashikai süka naaʼin otta süka tü shiimainkat, süka nüchajaain achiki chi tashikai wayuu eeka müin aka naya süpüla naʼwaajüin nia» (Juan 4:23, TNM). ¡Anakatche maʼin tia! Shia nücheka Jeʼwaa nanoujain nünain na wayuu makana aka paaʼin. Wayuu atüjaweekana saaʼu tü shiimainkat nüchiki.