¿Kapüleesüche maʼin wayaawatüin saaʼu tü shiimainkat suulia tü alawaakat? Maaʼulu yaa sunouja anainrü wayuu tü anakat neʼe saaʼin sümüin jee jamüin saaʼin sutuma, nnojotpejeʼe jamajatüin namüin tü pütchi shiimainkat jee kasain ayaawatünüin anainjee shiimain shia. Saashin wainma wayuu maaʼulu nnojotsü eein wanee kasa eekai shiimain.

 Nnojotsü eiwaʼalüin müin tü jülüjakat naaʼin na wayuukana. Alatüirü 2.000 juya süchikijee nüsakinnüin Jesús nutuma Poncio Pilato, müsü nünüiki nümüin sümaa manoulayaain nia: «¿Kasa wayu tü shiimainkat?» (Juan 18:38). Mayaainjeʼe nnojoluin nütüjaweein saaʼu Pilato susoutia tia, anasü maʼin tü nüsakirakalü anain. Aküjünüsü suluʼu tü Bibliakat kasain alawaain jee kasain shiimain, nnojotsü sütüjaain aaʼu wayuu tia süka nnojoluin shiyaawatüin saaʼu wanee kasa.

¿Kasa wayu tü shiimainkat?

 «Shiimain» münüsü wanee kasa suluʼu tü Bibliakat süka eein tü kasa shiimainkalü anainjee shia jee nnojotsü shiain wanee kasa eekai yarüttüin. Aküjünüsü suluʼu tü Bibliakat niain Jehová a chi kanainjeejachikai tü pütchi shiimainkat, «chi Maleiwa aküjakai tü shiimainkat» müsü (Salmo 31:5). Aküjünüsü suluʼu tü Bibliakat tü shiimainkat nüchiki Maleiwa otta süküjain müin shia aka saaʼin wanee luusa oʼuniraka wakuwaʼipa maaʼulu, mayaainjeʼe naʼakain waya na wayuu mayaawatüinkana saaʼu wanee kasa (Salmo 43:3; Juan 17:17).

¿Kasa paaʼinrajatka süpüla piyaawatüin saaʼu tü pütchi shiimainkat?

 Nnojotsü anain nümüin Maleiwa waapaale sümaa tü shiimainkat sümaa nnojoluin wayaawatüin saaʼu. Nüküjain wamüin wekirajaainjanain sünain tü pütchi shiimainkat sükajee wasakireʼerüin waaʼin sünain, nnojotsü waapaainjatüin amaa tü anakat neʼe saaʼin wamüin (Roma 12:1). Shia nüchekaka Maleiwa weʼraajüin nia jee alin nia wapüla, jülüjainjachi nia waaʼin waneepia otta nüküjain wamüin wapansaajüinjatüin shiimainrejeʼeya tü pütchi wekirajaakalü anain suluʼu tü Bibliakat (Mateo 22:37, 38; Aluwataaushikana 17:11).

¿Jarai chi eekai atuma tü alawaakat?

 Süküjain tü Bibliakat eein tü alawaakat nutuma wanee nüʼünüü Maleiwa, nia Satanás chi Yolujaakai, shikiishikai tü alawaakat saashin tü Bibliakat (Juan 8:44). Aküjashi alawaa nüchiki Maleiwa namüin na palajannuukana wayuu (Génesis 3:1-6, 13, 17-19; 5:5). Sünainjee tia, ayatayüiya Satanás nüküjain naʼalain otta nnojotsü nüküjain tü shiimainkat nüchiki Maleiwa (Apocalipsis 12:9).

¿Jamüsü süküjaka alawaa wayuu maaʼulu?

 Süka sülüʼülüin maaʼulu «sükalia süpüla sajaʼttüin kasa mojusü», nootuin Satanás na wayuukana otta nimeejüin maʼin naya. Wainma wayuu aküjaka alawaa süpüla nemeejüin na waneinnua otta anain neʼe nakuwaʼipa nanainjee (2 Timoteo 3:1, 13). Akaʼaya suluʼu wainma iküleesia maaʼulu ekirajünüsü maʼin alawaa nüchiki Maleiwa. Süküjatüjülia tü Bibliakat eejeerüin wayuu aapaaka sümaa nanüiki «na wayuu ekirajakana naya sünain tü pütchi kamalainkat neʼe namüin» otta nayouteerü «tü pütchi shiimainkat» (2 Timoteo 4:3, 4).

¿Jamüsü choʼujaakaʼa maʼin wayaawatüin saaʼu tü pütchi shiimainkat?

 Süpüla nunoujain wanee wayuu sünain tü münakat nümüin, acheküsü niyaawatüin saaʼu shiimain tü aküjünakat nümüin. Amojujaajeerü nukuwaʼipa wanee wayuu namaa na naʼaleewainyuukana jee nnojoleerü anain sukuwaʼipa wayuu maʼleekalia sünainjee tü alawaa aküjünakat. Süküjain tü Bibliakat nücheküin Maleiwa waʼwaajüin nia süka watüjaain saaʼu tü shiimainkat nüchiki. Anuu sünüiki: «Na wayuu aʼwaajakana [Maleiwa], naʼwaajüinjachi sükajee tü nüpülainkat otta sükajee tü shiimainkat» (Juan 4:24). Süpüla pütüjaain saaʼu tü shiimain aküjünakat suluʼu tü Bibliakat süchiki tü paaʼinrajatkat süpüla piyaawatüin saaʼu tü iküleesia aküjakat alawaa jee pükatalaain suulia, paashajeʼera suluʼu Aapiria Wayuu tü pütchi kanüliakat «Alawaa akayaleʼeraka wayuu nuulia Maleiwa».

Nücheküin Maleiwa piyaawatüin saaʼu tü pütchi shiimainkat

 Shia nüchekaka Maleiwa katüin poʼu waneepia, pütüjaainjatü aaʼu tü shiimainkat nüchiki süpüla puuntuin tia (1 Timoteo 2:4). Piyaawatüle saaʼu tü anakat jee tü mojukat nümüin Jehová jee poonoole sümaa nünüiki, aleeweechi maʼin pia nümaa (Salmo 15:1, 2). Süpüla natüjaain saaʼu na wayuukana tü shiimainkat, nuluwataain Maleiwa Jesús yaa mmapaʼa. Shia nüchekaka Maleiwa waapajüin tü nikirajakalü anain Jesús (Mateo 17:5; Juan 18:37).

¿Nuuʼuleʼereetche Maleiwa wayuu suulia aküjaa alawaa?

 Aa. Mojusü maʼin nümüin Maleiwa tü naainjakat na wayuu aküjakana alawaa namüin na waneinnua süpüla nemeejüin naya. Nüküjain Maleiwa najaʼlajeʼereenain saaʼujee tü mmakat na wayuu aküjakana alawaa (Salmo 5:6). Naaʼinrapa tia Maleiwa ekeraajeerü pütchikat tüü: «Na wayuu aküjakana waneepia tü shiimainkat eejeena naya waneepia» (Proverbios 12:19).