Eesü tü mojujiraakalü aaʼujee wanee wayuu sümaa nuʼwayuuse kasaatpa naya, alatüsü tia sutuma naatain tü jülüjakat naaʼin, naatain nakuwaʼipa jee naatain nepijia. Otta eeshii mojujiraale naya saaʼujee sünüiki napüshi, naʼaleewainyuu jee shiale sutuma wanee kasa alatalaʼa maka namüin.

Eesü nnojorüle kachipünaain naaʼin nanouktüin tia, nanouktajatpajaʼa shia saashin tü Wiwüliakat (Mateo 5:23, 24). Nounteerü tia naainjüle tü sümakat tü Wiwüliakat.

TÜ SÜMAKAT TÜ WIWÜLIAKAT: «Eesü kaʼi süpüla [...] aashajawaa» (Eclesiastés 3:1, 7, TNM). Pükatala kaʼi süpüla paashajaain sümaa puʼwayuuse süchiki tü mojujiraakalü aaʼujee jia, püküja sümüin jamüin maʼin paaʼin otta jamüin pünüiki süchiki tü kasa alatakat sümüin. Püküja tü shiimainkat sümüin (Éfeso 4:25). Püchechera paaʼin suulia atkawaa, jaʼitashi jashichin maʼin pia. Nnojoleechi pia atkaain sümaa puʼwayuuse anale sukuwaʼipa pünüiki sümüin (Proverbios 15:4; 26:20).

Ayata kamaneein pia sümüin puʼwayuuse, jaʼitairü nnojoluin wanaawain sünüiki pümaa süchiki wanee kasa, piiʼiyata sümüin alin shia püpüla otta kojutüin shia pümüin (Colosas 4:6). Punouktamaata sukuwaʼipa tü mojujiraakalü aaʼujee jia otta nnojo manüijiraain jia (Éfeso 4:26, 27).

TÜ EEKAT SÜPÜLA PAAINJÜIN:

• Püneeka wanee kaʼi süpüla paashajaain süchiki tü mojujiraakalü aaʼujee jia

• Nnojo pusounnajaain saashajaapa puʼwayuuse. Asoukteechi pia keraapa sünüiki

TÜ SÜMAKAT TÜ WIWÜLIAKAT: «Anakaja müleka aijiraale jia jüpüla, [...] jiiʼiyata nojut napüshua na juwalayuukana» (Roma 12:10). Atüjeeshi pia aapajaa otta piyaawateein saaʼu jamüin maka sünüiki puʼwayuuse. Alinjatü püpüla maʼaka naaʼin wanee wayuu sünain alin nüpüla nuwala otta «nnojoliijana jia pülajiraain aaʼin» (1 Pedro 3:8; Santiago 1:19). Nnojo paapajayaain sünüiki. Puuʼulaa tü piʼyataakalü anain süpüleerua paapajüin tü sümakat pümüin jee shiale püsakirüin shia eere süpüla jaashajaain süchiki tia mapa. Nnojoleechi pia jashichijaain sümüin puʼwayuuse jülüjüle paaʼin piʼipajanain shia (Eclesiastés 7:9).

TÜ EEKAT SÜPÜLA PAAINJÜIN:

• Paapajachoinjatü maʼin sünüiki puʼwayuuse jaʼitairü mojushiin pümüin tü sümakat

• Piyaawatüinjatü aaʼu jamaluʼuluin sünüiki pümüin. Jülüja paaʼin jamüin suʼupünaa otta jamüin sukuwaʼipa sünüiki

TÜ SÜMAKAT TÜ WIWÜLIAKAT: «Eesü kasa anasü wousütaka waʼyataale süchiirua wanee kasa, akaajasaʼa saashajaanüle neʼe achiki, nnojotsü kasain eein sutuma» (Proverbios 14:23, TNM). Junouktüinjatü tü mojujiraakalü aaʼujee jia, nnojoishii yootuinjanain neʼe jia. Choʼujaasü saainjünüin mayaapejeʼe kapüleein shia (Proverbios 10:4). Jiʼyataajiraale piamaleʼeya eesü kasa anasü aapünaka jümüin (Eclesiastés 4:9).

TÜ EEKAT SÜPÜLA PAAINJÜIN:

• Jülüja jaaʼin kasain jaainjüinjatüin waneʼewai jukua süpüla junouktüin tü mojujiraakalü aaʼujee jia

• Jülüjüinjatü jaaʼin müleka junouktüle shia