SHIʼIPA 9
Puʼwaaja Maleiwa sümaa püpüshi
Juʼwaaja chi Maleiwakai, chi kakumalakai tü kasakat süpüshuaʼa (Alateetkat Mapeena 14:7).
Jütüjaaitpa aaʼu sünainjee karalouktakat tüü, wainmain pütchi suluʼujee tü Wiwüliakat akaaliinjeenaka jia süpüla talatüin jaaʼin. Talateeshii jia niʼrüin Jeʼwaa. Palajanale jutuma nia, naapeerü tü choʼujaakat jümüin (Mateo 6:33, TNM). Aleeweeshi nia jümaa makalaka aleewainjanain jia namaa. Tia shia wanee kasa anasü jünteetka anain (Mateo 22:37, 38).
1 PÜCHEINRAA PAAʼIN NÜNAIN JEʼWAA
TÜ SÜMAKAT TÜ WIWÜLIAKAT: «Jiyaawateechi aaʼu sünain tayain Jüshin otta sünain jiain tachooin», müshi Jeʼwaa (2 Corinto 6:17, 18). Maleiwa meeshi aka naaʼin wanee paʼaleewain aika maʼin apüla pia, puʼuraajüle nümüin aleeweechi pia nümaa, oʼuraajüinjachi pia waneepia nümüin (1 Tesalónica 5:17). Kamalainsüleʼe nümüin waküjüle süchiki tü shapaakalü atuma waaʼin jee shiale süchiki tü kasa waleʼeruʼukat (Filipos 4:6). Puʼuraajiraale sümaa püpüshi, nayaawateerü aaʼu shiimain chi Maleiwakai pümüin.
Süchikijee puʼuraajüin nümüin Maleiwa, paapajüinjatü nünüiki. Paainjüin tia, paashajeʼerüle tü Wiwüliakat otta tü karaloukta ayuʼluushikat sünainjee (Salmo 1:1, 2). Püsakireʼera paaʼin sünain tü paashajeʼerakat (Salmo 77:11, 12). Wanee sukuwaʼipa paapaka akajee nünüiki Maleiwa shia pürütkaale sünain tü outkajawaakat (Salmo 122:1-4).
Jee wanee shia paashajaale nüchiki Maleiwa sümüin wayuu, paainjüle maʼin tia, aleeweechi maʼin pia nümaa (Mateo 28:19, 20).
TÜ EEKAT SÜPÜLA PAAINJÜIN:
-
Puʼuraajawai otta paashajeʼerawai tü Wiwüliakat weinshi
-
Pükaaliinja püpüshi süpüla kojutüin namüin tü naʼyataainkat nümüin Maleiwa suulialeʼeya nashaittakuʼu namüin
2 TALATA PAAʼIN SÜNAIN AʼWAAJAA JEʼWAA SÜMAA PÜPÜSHI
TÜ SÜMAKAT TÜ WIWÜLIAKAT: «Jürütkaale nünainmüin Maleiwa, arütkaajeechi nia jünainmüin» (Santiago 4:8). Püneeka wanee kaʼi süpüla puʼwaajüin Maleiwa sümaa püpüshi (Génesis 18:19). Otta jülüjüinjatü paaʼin waneepia jamüin nünüiki Maleiwa süchiki wanee kasa eeka paainjüinjatüin. Anuu sünüiki tü Wiwüliakat: «Pikirajüinjana na püchonniikana [nüchiki Jeʼwaa] wanaa sümaa püikkalaain pipialuʼu, wanaa sümaa waraittüin pia, piisalaapa otta püchijiraapa» (Deuteronomio 6:6, 7, TNM). Waainjüinjatü tü naainjakat Josué, anuu nünüiki: «Aluʼusaʼa tayakai sümaa tapüshi, aʼyataajeena waya nümüin Jeʼwaa» (Josué 24:15, TNM).
TÜ EEKAT SÜPÜLA PAAINJÜIN:
-
Kettaainjatü putuma jamüinjatüin nekirajia püchonnii sümaa puʼwayuuse süka naatawalin nakuwaʼipa
