Anuu tü alatakat sümüin Karen. Chajatü shia sünain wanee miʼiraa, saapaka sünüiki wanee wayuu süchiiruajee sünain maa:

Shia ounejaka shia Rebeca, wanee saʼaleewain. «Nna püsüin seruweesa», sümaka Rebeca sümüin. «Nnojotsü joʼuuin pia, püsa wamaa», sümaka sümüin.

Nnojotsü aseein Karen süka jintuluin shia, nnojotpajaʼa sücheküin «malasü pia», sümüin Rebeca sümüin. Saaʼujee jintuluin anasü Rebeca, eesüjaʼa süpüla müin sünüiki Karen süleʼeruʼu: «Nnojottaasü mojuin süsüle, aluʼusaʼa drogale shia».

¿Kasajeʼe paainjaka sülatüle pümüin tia?

Süpüla anainjatüin sukuwaʼipa tü kasa püneekakat, choʼujaasü pansaainjatüin tü pukuwaʼipakat. Pansaale pukuwaʼipa, eejeerü paaʼin waneepia süpüla paaʼinrüinjatüin tü kasa anasükat jee piyouktüinjatüin tü kasa mojusükat. Paaʼinrüle tia, nnojoleerü amojujaain pukuwaʼipa jee nnojoleerü aneekünüin pooʼopünaa tü paaʼinrajatkat (1 Corinto 9:26, 27).

¿Kasa paaʼinrajatka süpüla puuntüin tia? Anuu waneeirua pütchi pikirajaainjatkalü anain palajana.

Pütüjaale saaʼu tü kasa pütüjakalü apüleerua jee anain pukuwaʼipa, yalayaleerü paaʼin.

TÜ SÜMAKAT TÜ WIWÜLIAKAT. «Mayaainjeʼe nnojoluin tatüjain maʼin aashajawaa, tayaawata aaʼu tü shiimainkat», müshi chi aluwataaushikai Pablo (2 Corinto 11:6, TNM). Sünainjee niyaawatüin maʼin aaʼu Pablo tü Ashajuushikat, nüchecherüin naaʼin wanaa sümaa mojuin pütchi nüchiki. Yalayalasü naaʼin soʼu tia (2 Corinto 10:10; 11:5).

PÜNÜIKI PÜCHIKIJIRAA. Jülüja paaʼin wanee kasa pütüjaka apüleerua.

Jülüja paaʼin süpüshi tü pukuwaʼipa anakat maʼin (maʼaka saaʼin kamaneere pia, püsülajüire jee püntüle maalü eemüinjachire pia).

Joole pia süpüla wanee kasa, moteerü paaʼin tü pukuwaʼipakat. Meerü aka saaʼin sukuwaʼipa wanee kaleena asüʼüjaaka eere arülain shia.

TÜ SÜMAKAT TÜ WIWÜLIAKAT. Nütüjaa aaʼu Pablo tü jookalü apüla nia. Müshi nia: «Tacheküin taaʼinreein tü kasa anasü nuluwataakat anain Maleiwa, süka shiiʼiranajaaitpain takuaippa nütüma. Otta müleka shiimüinre tia, ¿jamakaʼa taneekakaʼa waneepia aaʼinraa tü kasa mojusükat? Shia süka taleʼeruʼuin kaainjalaa. Je sükajee tüü, müsü aka eekai wane atkawaa sütüma tü takuaippa jeketkat. Je müshi aka kapükai taya, süka nnojolüin tountüin taaʼinrüin tü anasükat» (Roma 7:22, 23).

PÜNÜIKI PÜCHIKIJIRAA. ¿Kasa tü jookalü apüla pia püchecherüinjatka oulia paaʼin?

Poʼotoole suluʼu wanee kemion, ¿eeshiche süpüla pümüin nümüin chi chupeetkai leeyakuʼu jümüinjanain sajaʼttaleepa kosoliinaka? Nnojottaa. Paaʼinrüle tia, watteerü saalii nneerü puwalaajüinjatka.

¿Kasa shikirajaka anain pia tia? Pütüjaale saaʼu tü keeʼireekat paaʼin, nnojoleechi pia leeyakuʼu müin, pütüjaajeerü aaʼu jalainjachin pia otta tü paaʼinrajatkat süpüla püntüin eemüinjachire pia.

TÜ SÜMAKAT TÜ WIWÜLIAKAT. «Eesü taaʼin waneepia sünain tü taaʼinrakat süpüshua», müshi Pablo (1 Corinto 9:26). Nnojoishi Pablo anoujain süpaʼa mma, eesü naaʼin sünain tü naaʼinrüinjatkat otta nuʼuna achiiruat shia (Filipos 3:12-14).

PÜNÜIKI PÜCHIKIJIRAA. Jülüja paaʼin apünüinsü kasa püsaʼwateeka amüin soʼu juyakat tüü.

Nnojorüle pansaain paaʼin sünain tü punoujakalü anain, meerü pukuwaʼipa maʼaka saaʼin nukuwaʼipa wanee camaleón. Aʼwanajaweerü pukuwaʼipa pejeewa süpüla müin pia maʼaka naaʼin na pukonpayeetsekana. Müle pia, nnojotsü pansaain tü pukuwaʼipakat.

Ichere pia süchiirua tü punoujakalü anain, nnojoleerü motuin paaʼin pansaale tü pukuwaʼipakat, jaʼitairü kasain maʼin naaʼinrüin na waneeinnua.

TÜ SÜMAKAT TÜ WIWÜLIAKAT. Jintüi Daniel wanaa sümaa nümaanüin wattamüin suulia nüpüshi. Mayaainjeʼe sülatüin tia nümüin, «niʼitaatüjülia paala Daniel suluʼu naaʼin» noonooinjachin sümaa tü nuluwataakalü anain Maleiwa (Daniel 1:8, TNM). Eejüsü naaʼin sünain tü nukuwaʼipakat otta icheshi nia süchiirua tü nunoujakalü anain.

PÜNÜIKI PÜCHIKIJIRAA ¿Kasa punoujaka anain? ¿Punouja anainchi Maleiwa? ¿Jamüshi punoujaka nünain? ¿Jamüsü pütüjaaka aaʼu eein Maleiwa?

¿Aneetche pukuwaʼipa sutuma tü nümakat pümüin Maleiwa? ¿Jamüsü aneetka pukuwaʼipa?

¿Meesüche pukuwaʼipa maʼaka saaʼin süpana wunuʼulia suwanuwaaka jouktai? ¿Shiataapa meein pukuwaʼipa maʼaka saaʼin wanee wunuʼulia nnojotka ojuttüin sutuma wawai? Meere pia, jülüja paaʼin pansaale tü pukuwaʼipakat. Paaʼinrüle tia, pusoukteerü eʼipajee pütchikat tüü: ¿Pansaasüche maʼin takuwaʼipa?