Anuu tü alatakat sümüin Julia: Wanaa sümaa shiirakaain suluʼu tü rouyakat kaüsüsü maʼin shia saaʼin sümüin. «Anasü aürülüin taya», müsü saaʼin süleʼeruʼu. Akatsaʼa jiipüirüin shia naashin süshi, shii otta na saʼaleewainkana.

Eeirü sükalia sümaa jülüjain saaʼin süchajaainjatüin sukuwaʼipa süpüla süshakajüin saawain maʼaka piama kiilo shiatapünaamüin. Nnojoluinjatü eküin shia maʼaka jeʼra kaʼi saashin...

¿Kasajeʼe paainjaka sülatüle pümüin tia?

Nnojotsü mojuin jülüjale paaʼin aneein piyolojo. Ashajünüsü suluʼu tü Wiwüliakat anasüchoin Sara, Raquel, Abigail otta anashi aaʼinchi maʼin José nümaa David. Saashin tü Wiwüliakat, «anasüchonleesia maʼin» Abisag (1 Reyes 1:4, TNM).

Eeshii na tepichi jülüjakana maʼin aaʼin nayolojo maaʼulu yaa. Sutuma tia, eeshii süpüla ayuulin naya. Jülüja paaʼin tüü:

• Asakinnüshiinka waneeinnua majayünnüü. Eeshii 58% na «kaüsüshii maʼin waya» makana. Shiasaʼa eejanain neʼe 17% na kaüsükana naʼakajee.

• Asakinnataashii joo waneeinnua majayünnüü aürütkana maʼin. Eeshii 45% na «kaüsüshii maʼin waya» makana sümaa aürülajüin maʼin naya.

• Na jimaʼalii jee majayünnüü aürüleekana aaʼin, ayuuishii naya sutuma anorexia. Meküinyeesat jee eesü süpüla ouktüin wayuu sutuma tia ayuuliikat.

 Pünainre tü ayuuliikat anorexia jee shiale wanee ayuulii eeka müin aka saaʼin tia, puchunta kaaliinwaa nümüin püshi, püi jee niale wanee wayuu miyoʼu aleewaka amaa pia. «Shiimainre alin nüpüla naʼaleewain wanee wayuu, aishi nia nüpüla waneepia, müshi aka naaʼin wanee nuwala müliale nia niʼrüin», müsü tü Wiwüliakat (Proverbios 17:17, TNM).

Kamalainshi wanee wayuu namüin na waneeinnua anale maʼin tü nukuwaʼipakat, nnojotsü shiain sutuma anashin aaʼinchi nia. Anuu tü sümakat tü Wiwüliakat nüchiki Absalón, chi nüchonkai David:

«Nnojoishi eejachin wanee wayuu anashi maʼin aaʼinchi chaa Israel nuulialeʼeya Absalón. [...] Mamojulasai nia» (2 Samuel 14:25, TNM).

Nnojotpejeʼe anain sünüiki tü Wiwüliakat nüchiki. Süka jamüin, yaletüin naaʼin, washireein nia otta nuluwataweein nuulia chi nüshikai. Mojulaashi, oʼutüi saaʼin wayuu jee kaʼünüürai nia.

Müsüjeseʼe müin tü Wiwüliakat wamüin:

«Anakaja [shiiʼiranajaale] jukuaippa nütüma Maleiwa» (Colosas 3:10).

«Tü kamalainkat namüin na [wayuukana] nnojolüinjatü sükajeejatüin anain maʼi juʼwala noʼupalapünaa. Tü kamalainkat namüin, shiainjatü tü jukuaippakat sünain anamiashaatain je sünain kamaneein maʼi jia» (1 Pedro 3:3, 4).

Nnojotsü mojuin aneere piyolojo. Shiapejeʼe jülüjainjatüin maʼin paaʼin anainjatüin tü pukuwaʼipakat. Shia kamalainka sümüin wayuu tü pukuwaʼipakat suulialeʼeya tü piyolojokot. «Eirakaamaatüsü wayuu pümüin anasüchonle pia. Akatsaʼa shieerüin kamalain maʼin sümüin wayuu tü pukuwaʼipakat müleka anale shia», müsü wanee majayüt Phylicia sünülia.

¿Mojusü pümüin piyolojo?

¿Jülüjasü paaʼin puwaʼnnüin jee paamajüin shiiʼiree aneein piyolojo?

¿Kasa puʼwanajeʼereeka pünainjee? (Pejeetta shia).

• PAJAʼAPÜIN

• PAAWAIN

• PUʼWALA

• PIYOLOJO

• PUʼUPÜNAA

• PUWALAPAʼA

Müleka «aa» pümüle sünain tü palajatkat jee tü piamakat pütchi jee pejeettüle maʼaka jeʼra sünain tü apünüinsükat pütchi, jülüja paaʼin tüü: Eesü nnojorüle keemain piyolojo namüin na waneeinnua maʼaka keemain shia pümüin. Soto paaʼin eein süpüla mojuleein pümüin wanee kasa shapaale paaʼin shiiʼiree aneein piyolojo (1 Samuel 16:7).