હા. બાઇબલ પુરાવો આપે છે કે ઈશ્વર ખરેખર છે. ઈશ્વર પર શ્રદ્ધા મૂકવા આપણે કોઈ પણ ધાર્મિક માન્યતા પર આંખ બંધ કરીને ભરોસો ન મૂકવો જોઈએ. એના બદલે, ‘સમજશક્તિ’ અને ‘સૂઝબૂઝથી’ કામ લેવું જોઈએ. (રોમનો ૧૨:૧; ૧ યોહાન ૫:૨૦, ફૂટનોટ) ચાલો બાઇબલમાં આપેલા અમુક પુરાવા જોઈએ:

•   વિશ્વમાં સૂર્ય, ચંદ્ર, તારાઓ અને ગ્રહોને પોતપોતાની જગ્યાએ વ્યવસ્થિત મૂકવામાં આવ્યા છે. કોઈ પણ ગ્રહો કે તારાઓ એકબીજા સાથે અથડાતા નથી. પૃથ્વી જ એક એવો ગ્રહ છે જ્યાં જીવન શક્ય છે. આ બધું બતાવે છે કે કોઈ બનાવનાર છે. બાઇબલ કહે છે: “ખરું કે દરેક ઘર કોઈકે બનાવ્યું છે, પણ બધી વસ્તુઓ બનાવનાર તો ઈશ્વર છે.” (હિબ્રૂઓ ૩:૪) એ સમજવું એકદમ સહેલું છે. કેટલાક વિદ્વાનો પણ એ દલીલનો નકાર કરી શકતા નથી. a

•   આપણને નાનપણથી જ જીવનનો હેતુ જાણવાની ઇચ્છા હોય છે. એ એવી ઇચ્છા કે ભૂખ છે જે ખાવાથી નથી ધરાતી. બાઇબલ એને “ઈશ્વરના માર્ગદર્શનની ભૂખ” કહે છે. એના લીધે આપણને ઈશ્વરને જાણવાની અને તેમની ભક્તિ કરવાની ઇચ્છા થાય છે. (માથ્થી ૫:૩; પ્રકટીકરણ ૪:૧૧) એ બતાવે છે કે ઈશ્વર છે. તે પ્રેમાળ સર્જનહાર પણ છે. તે ચાહે છે કે આપણે તેમના વિશે જાણીએ.—માથ્થી ૪:૪.

•   બાઇબલમાં વર્ષો પહેલાં ઘણી ભવિષ્યવાણીઓ નોંધવામાં આવી છે. એની એકેએક વિગત સચોટ રીતે પૂરી થઈ છે. એ બતાવે છે કે એની પાછળ કોઈ એવી શક્તિ છે, જે માણસો કરતાં ઘણી ચઢિયાતી છે.—૨ પિતર ૧:૨૧.

•   બાઇબલના લેખકોએ વિજ્ઞાનની એવી જાણકારી જણાવી, જે એ સમયના લોકો જાણતા ન હતા. દાખલા તરીકે, એ જમાનાના લોકો માનતા હતા કે પૃથ્વી હાથી, ભૂંડ કે બળદ પર ટકેલી છે. પણ બાઇબલમાં લખ્યું છે કે, ઈશ્વર “પૃથ્વીને કોઈ આધાર વગર અધ્ધર લટકાવે છે.” (અયૂબ ૨૬:૭) બાઇબલ એમ પણ જણાવે છે કે પૃથ્વીનો આકાર ‘ગોળ’ છે. (યશાયા ૪૦:૨૨) મોટા ભાગના લોકો માને છે કે લેખકો માટે એ જાણકારી પોતે લખવી અશક્ય હોત. ચોક્કસ, ઈશ્વરે તેઓને એનું માર્ગદર્શન આપ્યું હશે.

•   અમુક લોકો ઈશ્વરમાં માનવાનું છોડી દે છે, કેમ કે તેઓને આવા સવાલોના જવાબ મળતા નથી: આજે દુનિયામાં આટલી તકલીફો અને દુષ્ટતા કેમ છે? લોકો ધર્મના નામે ખરાબ કામ કેમ કરે છે? (તિતસ ૧:૧૬) બાઇબલ એવા મહત્ત્વના સવાલોના પણ જવાબ આપે છે.