ODHEAI 9
Ghorabeant Ami Khuxalkai Koxim Haddtolim?
1. Ghorabeant khuxalkai asunk, kaidea pormonnem kazar zaunk kiteak gorjechem?
Jehova khuxalkaiecho Dev ani taka zai soglle ghorabe khuxal aslole. (1 Timotak 1:11) Kazaracho ekvott Tannench ghoddun haddla. Kaidea pormonnem kazar zaunk gorjechem, karonn oxem kel’lean, avoi-bapaink ani bhurgeank mogan, khuxalkaien ani surokxitponnim jieunk melltta. Devachea utrak khaltim ravtoleanim, aplem kazar register korun, sorkarachea kaideank man diuncho.—Lukas 2:1, 4, 5 vachat.
Dev kazara vixim kitem mhunntta? Devan dadlea ani bailecho, kazara udhexim ekvott ghoddla to, sodankal urlolo Taka zai. Ghov-bailanim, eka-mekak visvaxi ravchem oxem-i Jehova sangta. (Hebrevank 13:4) Thoddim kazar zal’lim zoddpim aplem kazar moddtat, punn Jehova kazar moddnecho dves korta. (Malaki 2:16) Kazari zoddpeam modem zor eklean pordvar kelo zalear, niropradi ghovak vo bailek kazar moddun, dusrea lagim kazar zaunk Dev porvangi dita.—Matev 19:3-6, 9 vachat.
2. Ghov-bailechi vagnnuk eka-meka thaim koxi asunk zai?
Jehovan dadleak ani bailek, kazari jivitant eka-mekak sangat ani adar diunk rochleant. (Utpoti 2:18) Ghorabeacho vhoddil zal’lean, ghovan aplea bail-bhurgeancheo favo teo gorzo purnn korcheo ani toxench tankam Deva vixim xinkounn diunk fuddem sorchem. Tannem apleo svotacheo khuxeo fattim dovrun, aple bailek mog dakhounk zai. Ghov-bailanim aple vagnnuken eka-mekak mog ani man diunk zai. Sogllim ghov-bailam patki dekhun, tanchea kazari jivitant khuxalkai asunk tannim eka-mekacheo chuki bhogsunk gorjechem.—Efezkarank 4:31, 32; 5:22-25, 33; 1 Pedru 3:7 vachat.
3. Tumchea kazari jivitant oddchonneo ailear, tumi eka-mekak soddun diunk zata kai?
Kazari jivitant kosleo-i oddchonneo aileo zalear, tumi eka-meka thaim mogan vavrunk proitn korunk zai. (1 Korintkarank 13:4, 5) Soglleanchea kazari jivitant oddchonneo astatuch, teo suttaveo korunk ghov-bailen, eka-meka thaun vegllem sorchem, oxem Devachem Utor sangona.—1 Korintkarank 7:10-13 vachat.
4. Bhurgeamno, Dev tumche passot kitem anvddeta?
Tumi khuxal aslolim Jehovak zai. Tumche tornne piraier thaun khuxalbhorit ravunk, To tumkam boreantli bori budh dita. Tumche avoi-bapaichi budh ani tanchea onubhovantlean xinkun, tumchem jivit bore toren sarlolem Taka zai. (Koloskarank 3:20) Rochnnarachi ani tachea putachi seva korun khuxalkai melltta ti, tumi onubhov kel’li Taka zai.—Upodexok 11:9–12:1; Matev 19:13-15; 21:15, 16 vachat.
5. Avoi-bapaimno tumi tumchea bhurgeanchem jivit khuxalkaiechem koxem kortolim?
Tumchea bhurgeank jevonn, nhesonn ani asro diunk tumi vavrunk zai. (1 Timotak 5:8) Punn, tumchea bhurgeanchem jivit khuxalkaiechem zaunk zai zalear, tankam Devacho mog korunk ani taka mandta te porim cholunk xinkounk zai. (Efezkarank 6:4) Tumi Devacho mog khoreaninch kortat tem polloun, tumchea bhurgeancher boro probhav poddunk xokta. Devachea Utra pormonnem tumi bhurgeank xist ditat tedna tumchea bhurgeank bore bhaxen jieunk adar zatolo. —Dusri Somurt 6:4-7; Mhonn’nneo 22:6 vachat.
Tumi tumchea bhurgeank urbha ani xabaski dilear tim khuxal zatolim. Toxench, tankam xist diun, tancheo chuki nittaier ghalunk gorjechem. Osle xinkounne vorvim vaitt sovoim-ia thaun pois ravunk tankam adar mellttolo. (Mhonn’nneo 22:15) Punn, bhurgeank xist ditana, tanche sovem dharunn vo nixttur zaum nakat.—Koloskarank 3:21 vachat.
Avoi-bapaink ani toxench bhurgeank bori budh diunk, Jehovachea Sakxeanim zaitim pustokam chhapleant. Him pustokam Bible-acher adarit asat.—Stotram 19:7, 11 vachat.