Yálá ŋɔ Tɔɔlaa kaa a yələkɔlɔn ɉu Tɔɔlaa. Gaa pai lɔi mɛi tɔɔlaaɠaa maahwalən ɉii, ə lɛɛ ə Yálá liiɓa laahwɛɛ yələkɔlɔn ɉu da lɔi mɛi. Yálá ŋɔ Tɔɔlaa maa wɛlɛɛ lɛlɛɛi ! Ɉu ho kea kweali, Dɔɔlaa tii kaa pai yɛnɛɛ nua maakpan gbɛɛ ŋaawoo ɓo laa lɛlɛɛ maa mɛni ɓa. Gaa pai lɔi mɛi nua kəlee yee lɔi gee.​—Daniyɛli 2:44 ; Matie 6:9, 10 ; 24:14 ɓo.

Tɔɔlaa kəlee ŋɔ tɔɔmun gaa ma. Zehova aa non Zesu Kilista kɛ a ŋɔ Tɔɔlaa hu Tɔɔmun.​—Kulɔ ponoŋa 11:15 ɓo.

Vidio hu kaa Yálá ŋɔ Tɔɔlaa ɓaa lə ?

Zesu kaa a Tɔɔmun nɛlɛɛ, maahɔlɔɓo ŋɔ mɛni lɛlɛɛi, ə lɛɛ teɲa wɛli yɛ ɓo ma (Matie 11:28-30). Yili pulu, huwala-wala kɛnɛ kaa ɲəi kpɔnmaa tɛɛ mɛni ɓa nua pɔ, maahɔlɔɓo, yələkɔlɔn ɉu ɓə gaa pai kɛi laa, yɛ lɔi mɛi ŋaawoo ɓo. Zesu muhəɠɛɛ pulu haaɓəlaa lowai, ə tɛ yələkɔlɔn ɉu, ə hee Zehova ɓamiiyee hu pələ, yɛ naa maakpɔn (Hebulu 10:12, 13). Yili pulu, Yálá ə tɔɔlaa kɛ hwaŋa tɛɛ ɓɔ.​—Daniyɛli 7:13, 14 ɓo.

Nu kpulu ta kaa laa diɛ kɛ ma “ Nu maa həɠɛɛɠaa ”, da Zesu ni ɓə pai tɔɔlaa kɛi yələkɔlɔn ɉu (Daniyɛli 7:27, TMN). Nu maa həɠɛɛɠaa tɔlɔɔ Zehova ə di həɠə ɉu, diɛ ɓaa Zesu ŋɔ apɔtɛlɛɠaa. Yili pulu, Zehova ə təlimo nua takpɛliɠaa pɛlɛ diɛ, hinaa da nɛaa, ə lɛɛ la ɉu háákələi. Yɛ pələi Zesu ə nwun na malaka kɔlɔ hu, nua tii diɛ kpɛli da nwun malaka kɔlɔ hu, di haa pulu.​—Záán 14:1-3 ; Kɔlɛntə dɔlɔɔ 15:42-44 ɓo.

 Nua da li yələkɔlɔn ɉu, di kaa a nu yɛli ? Zesu ə kɛ ma, di kaa a “ kpulu logolo ” (Lukə 12:32). Di kaa pai kɛi a nu waa-nwun-dɔnɔ nu waa-po-naan-kɔu-naan (144 000). Da Zesu ni ɓə pai lɔi mɛi ŋaawoo ɓoi.​—Kulɔ ponoŋa 14:1 ɓo.

Yálá ŋɔ Tɔɔlaa ə gbəlatɔɔ a gwəlan nwaa-tɔnɔ pulu nwun-mɛinaan gwəlan bo-kɔu-naan (1914) *. Gólói Zesu ə gɛ tɔlɔɔ ya ɓaa : ə Sətana da ŋɔ ɲinɛnŋaa di kpɛ yələkɔlɔn ɉu, ə di pili lɔi mɛi. Sətana lii ə kələn gwəi kpɔ kɛnɛ, ə gɔwɔtɔɔ kea yɛ mɛni ɲɔn damaa kɛ lɔi mɛi naa kəlee (Kulɔ ponoŋa 12:7-10, 12). Ə həɠə naa lowai tii ɓa, nukanŋaa di wɔ mɔnɔɠaa hu kaa lɔ ma yɛ kɛnɛ. Kɔ, pulu, ɲɔn ɉuwu tamaa, lɔi kpɛlin mɛni, di kəlee di kaa a “ kɔlɔn ɉɛn ” yii a nɛ guɔ yɛ, Yálá ŋɔ Tɔɔlaa pa hiɛli ə yɛnɛɛ mɔnɔɠaa kəlee kpɛɛ.​—Lukə 21:7, 10, 11, 31 ɓo.

Yálá ŋɔ Tɔɔlaa kaa ma yɛ Yálá lawoo laa həli lɔi kəlee hu. Gólói tii haalai, aa yiihu nu kpulu kɛnɛ ŋaakpɔn, diɛ həɠə lɔi kəlee hu. Kpɔɔmaayɛɛ nua tamaa kaa ma diɛ kɛ a Zesu ŋɔ ŋaawoo ɓo laa hu lonnii. Yálá ŋɔ Tɔɔlaa kaa pai di maakpɛi a ɓɛlowai gaa pai ɲɛnɛɛ ɲɔnwɔɔ ŋɛi kalaɠalai la. Nua kpɔ di kaa bɔ di Dɔɔlaa tii hu mɛinɛɛɠaa hɔlɔɓo, di maanɛɛ kea di di maakwɛli diɛ lɛɛ Zesu woo mu.​—Kulɔ ponoŋa 7:9, 14, 16, 17 ɓo.

Kwəlan nwaa-tɔnɔ (1 000) yee mu, Dɔɔlaa tii kaa pai Yálá liiɓa laahwɛɛi, yii tɔlɔɔ kɛ Yálá kwəi yɛ hwilɛn na nukanŋaa diɛ. Lɔi mɛi naa kəlee kaa pai kɛi a Alizana. Gwəlan nwaa-tɔnɔ tii tɛɛ pulu, Zesu kaa pai Dɔɔlaa tɛɛi Nan bɔ (Kɔlɛntə dɔlɔɔ 15:24-26). Gbɛɛ ɓə ə́ kaa bɔ ə́ Yálá ŋɔ Tɔɔlaa maa mɛni hukulɔ ma ?​—Somə 37:10, 11, 29, TMN ɓo.