ƝAAKWƐLƐI 4
Gbɛɛ ɓaa Zesu Kilista ?
1. Zesu ŋɔ yɛnɛɛ ə gɔwɔtɔɔ ləi ?
Lə ɓə kɛi gɛ nua di ho kɛi ɲɔu lɛɠɛi Zesu ɓa ?—MATIE 11:29 ; MALIKƏ 10:13-16.
Zesu ŋɔ yɛnɛɛ kɔwɔtɔɔ pələ ho kɛ yɛ nukanŋaa di wɛi. Ə gbea kɛ yələkɔlɔn ɉu a malaka, diɛ təɠa pa gaa a lon lɔi mɛi (Záán 8:23). Ya ɓə kɛ a Yálá ŋɔ pɛlihɛn dɔlɔɔ. Da Yálá ɓə ɉɛnŋaa kpəliɠaa pɛli. Yaa tɔnɔ gbən lɔ ɓə Yálá yaa kpinii ə bɛli. Yili ɓə gɛ diɛ kɛ ma “ Lon gɔu tɔnɔ gbən ”. (Záán 1:14.) Ə kɛ a Yálá lawoo tɛɛ mun, yili ɓə gɛ diɛ kɛ ma “ woo ”.—Haŋɔn 8:22, 23, 30, TMN ; Kɔlɔsə 1:15, 16 ɓo.
2. Lə mɛni ɓa Zesu ə pa lɔi mɛi ?
Yálá ə Zesu ŋɔ yɛnɛɛ həɠə yələkɔlɔn ɉu, ə dɛɛ zuwifu nɛɛgbəla ta kwəi, yii ho kɛ hulɔnu mɛni hukɔlɔn. Di kɛi kɛ naa ɓaa Mali. Yili ɓai tii, Zesu nan və kɛ a nukan (Lukə 1:30-35). Zesu ə pa lɔi mɛi, 1) Yálá maa teɲa kalan ɉii nua diɛ. 2) Ə Yálá liiɓa kɛ pələ lɛ guɔ duwɔ pələ hu, ə gɛ guɔ pɛli Yálá liiɓa kɛi, ə ma kɛ gu kaa mɔnɔ hu. 3) Ə gbɔɔ kwɛlɛ gu “ nwun maaɓo mɛni ɓa. ”—Matie 20:28 ɓo.
3. Lə mɛni ɓa gu maakpaan gaa nwun maaɓo ɓa ?
Nwun maaɓo hɛn gaa a hɛn da gwɛlɛ nuta kulɔ mɛni ɓa haa wolo la (Kulɔ hɛɓɛ 21:29, 30, TMN). Yálá ho kɛ bɔ nua diɛ pɔlɔ ə lɛɛ diɛ haa. Gwa yili ɲaakaa ləi ? Yálá ə kɛ Adama ɓa : Ya kulɔ nwoo mu , awala kɛtii ya “ nɛŋɛn ” ɉəɠə, ya haa. Yili mukulaa ɓaa, Adama awala kɛ nɛŋɛn ɉəɠə, ho li haa (Zənɛsə 2:16, 17 ; 5:5, TMN). Biblə yɛ Adama ɓə gɛ haa yɛ “ lɔ ” nukanŋaa di wɔ yɛnɛɛ hu. Bələ ɓə ə nɛŋɛn vilɛn na nonnii pulu, da haa, yai gaa a nɛŋɛn vəla. Gu maakpaan gaa nwun maaɓo ɓa ə gɛ gu kulɔ haa yəi, yii Adama ə vilɛn gu pulu.—Rɔmu 5:12 ; 6:23 ɓo.
Gɓɛɛ ɓə a pɛli kɛ gu nwun maaɓoi haa yəi ? Nu kəlee a haa gbɔɔ kɛ nɛŋɛn maa mɛni ɓa. Nuta lɔpee hwa pɛli kɛ məlaa nwun maaɓoi, maahɔlɔɓo, nɛŋɛn gaa yɛnɛɛ nua kəlee diɛ.—Somə 49:7-9, TMN ɓo.
4. Zesu ə haa lə mɛni ɓa ?
Zesu nwɛi, nɛŋɛn və kɛ ma yɛ pələi gu kaa la. Yili ɓa, maa ho nɛɛli kɛ ho haa —ho ta kɛ nɛŋɛn gɛ li. Nukanŋaa di wɔ nɛŋɛnŋaa maa mɛni ɓə ə haa la. Zesu tɛɛ mɛni lɔi mɛi, yɛ haa gu maa mɛni ɓa, yili kaa a wɛlikɛmaa laa kɛnɛ, yii Yálá ə gɛ yɛnɛɛ nua diɛ. Zesu yaa kpɛli, ə gu wɛlilakɛ, maahɔlɔɓo, ə lɛɛ Nan nwoo mu, ə gbɔɔ kwɛlɛ gu wɔ nɛŋɛnŋaa maa mɛni ɓa.—Záán 3:16 ; Rɔmu 5:18, 19 ɓo.
Vidio hu kaa Lə mɛni ɓa Zesu ə haa ?
5. Lə ɓə Zesu kaa gɛi háákələi ?
Ɓɛlowai Zesu ə kɛ la lɔi mɛi, ə ɲɔngɛnua kɔlɔi pono, ə haaɓəlaa nwun, ə kpɔnmaa tɛɛ nua pɔ. Mɛnii gaa tinaa pai gɛi lɛɛ nwoo mu nua diɛ, yili katii ə kɛi ɲɛilɛ (Matie 15:30, 31 ; Záán 5:28). Zesu haa pulu, Yálá ə nwun malaka kɔlɔ hu (Piɛli dɔlɔɔ 3:18, TMN). Ə hee Zehova kwɛlɛ ɓamiiyee hu pələ, ə gɛ ə naa maakpɔn, ə lɛɛ la ɉu Zehova yɛ pa gɛi a Tɔɔmun yɛnɛɛ ŋawoo ɓo mɛni ɓa (Hebulu 10:12, 13). Háákələi, Zesu kaa Tɔɔlaa kɛi yələkɔlɔn ɉu, ə lɛɛ ŋɔ kalan neai diɛ dɔɔlaa tii maa wɛlɛɛ lɛlɛɛ laa həli yɛnɛɛ naa kəlee.—Daniyɛli 7:13, 14 ; Matie 24:14 ɓo.
Ɉu ho kea kweali, Zesu kaa pai mɔnɔɠaa da mɛni ɲɔn gɛ nua di kulɔi lɔi mɛi Dɔɔlaa tii haalai. Nua da laa Zesu la, diɛ lɛɛ nwoo mu, di kaa tinaa pai kɛi Alizana, lɔi mɛi.—Piɛli veelɛnaa 3:7-9 ɓo.
