Gu maakpaan gaa wali ɓa, gu yəi bɛlɛn nua maakpaan gbɛɛ mɛni ɓa (Haŋɔn 30:8, TMN). « Wali a nu maakpɛ » (Kilimaa mun 7:12, TMN). Wali mɛni ɓo laa a pɛli walai hulɔnu da nɛa di yəi, kəlaa ka ho wali mɛni lɛɛ laa ho mɛni lɔ ka wɔ húlu yii hu (Efɛsə 4:32). Maanɛɛ hulɔnu da nɛa di laa di kee ni la, di woo tɔɔi ə kɛ tanɔn yɛ hwilɛn na di wɔ wali hon bələ ɓa.

YII BIBLƏ KAA MOI : « Nuta a kɛ bɔ ə pɛlɛ kɛnɛ tɔɔ, a gbea hee ə giliŋahiɛ, akɛ hɛn gaa ɲəi a pɛli góló tii kɛi ə naa kulɔ » (Lukə 14:28). Maanɛɛ ka woo tɔɔi ə kɛ tanɔn, ka wɔ wali hon bələ hu (Amɔsi 3:3, TMN). Hɛn ka kaa bɔ ka ɲa, da wali yii a hɔlɔɓo ka yəi kaa pɛli ɲai la, ka gbea gɔlɔn (Haŋɔn 31:16, TMN). Ka ho hɛn da ya lɔ ɲa wɛli ɓa, maahɔlɔɓo wali kaa ka yəi. Ka gɛ pələ kwɛli ma ka ho kwələ həɠə. Wali yii ka yəi, ya lɔ ɓə maanɛɛ ka mɛɛ (Haŋɔn 21:5 ; 22:7, TMN).

YII KA PƐLI GƐI :

• Wali kpəli a lɛɛ ka yəi ka maakpaanŋaa kpɛɛ pulu, yii ka kaa pai gɛi la, ka mo ka pɛli ɉu

• Ka gaa kaa ma ka yəi wali hwa pɛli ka maakpaanŋaa kpɛɛi, ka gɛ pələ kwɛli ma ɉɛnŋaa maanɛɛ ka di ya, di hɔnwɔ ho tɛɛ ka yəi wali ɓa. Gɛ pələ ta ka : hɛnigɛ ka kɔnɔn ɲa kwəli pɔ, ka ka kpɔɔ kɔnɔn ɲili

YII BIBLƏ KAA MOI : « Yii ɉaŋaa ya ɓə ku kaa bɔ ku gɛ, yɛ ə kɛ Zehova ɲɛi ɓa, ə ma kɛ yɛnɛɛ nua ɲɛi ɓa » (Kɔlɛntə veelɛnaa 8:21, TMN). Kɛ a ə́ təlimoɔ ə́ nɛa awala kɛtii ə́ hilɛ ɓa, yɛ hwilɛn na wali yii ka ɉɔlɔɓo da yii ka ka maakpaan gbɛɛ la ma.

Ə́ maakpaan a hee wali ɓa yɛ hwilɛn na ə́ maa mɛni wala-wala ta ɓa, gbea ə́ nɛa awala kɛtii ə́ hilɛ kili pu ɉu, ka pɛli mɛni tɔnɔ hu (Haŋɔn 13:10, TMN). Pələi maanɛɛ ka wali hon na, ka kɛi mo ka kee ni lowai, yili a kpɔnmaa tɛɛ ka pɔ liilaa ə lɛɛ ka yəi bɛlɛn. Wali yii ka ɉɔlɔɓo, hó gaa yɛ yɛ́ tɔnɔ ə́ wɔɔ, kəlaa, kɛ gaai yɛ ka yəi bɛlɛn nwali (Timɔtə dɔlɔɔ 5:8).

YII KA PƐLI GƐI :

• Wali yii ka tɛi-tɛi a pɛli maakpaan gbɛɛ la, yii hwa nwoo hukulɔ məlan ma, ka vaaɓo

• Ka ho nɛɛ laa mɛni ta ho too kaa təɠa pa wali mɛni ɓoi