Hulɔnu da nɛa da di wɔ yii pɛlɛ gee ɓa a ninɛ, mɛni tamaa a kɛ tooi di lowai. Ka nu hweelɛi, ka kiliŋahiɛ pələ ho tanɔn, ka kwəi mɛni ho tanɔn, ə lɛɛ ka wɔ yɛnɛɛ kaa pələ ho tanɔn. Mɛniɠaa tii həɠəi katii. Gbəli a kɛ mɛniɠaa tii diɛ həɠə kwəli pulu, awala kɛtii diɛ kulɔ ka tɛɠii.

Mɛni a pɛli tooi ka lowai, kaa ɓo a gɔlɔnŋaa, kaa maa laa. Kəlaa Biblə a mo yɛ, mɛni a too ka lowai, ka mo ə kpɛɛ (Matie 5:23, 24). Gbaaləi kpɔ ka pɛli tɛɛi la kaa ka lowai mɛniɠaa ɓo a nɛlɛɛ, ya ɓaa kaa Biblə ŋɔ liɛwooɠaa pɔ túwɔ́ ɓo.

YII BIBLƏ KAA MOI : « Nu hwaai lowai [kaa] ma » (Kilimaa mun 3:1, 7). Maanɛɛ ka lowai ta həɠə ɉu kaa ka lowai mɛniɠaa ɓo. Mɛnii ka kaa moi, pələi gaa la ə́ kwəi da pələi ə́ kaa ə́ kiliŋahiɛi la ma, haŋa ə́ ɉukulɔ ə́ nɛa awala kɛtii ə́ hilɛ ɓa. « Ka teɲa ɓo ka kee ɓa » a holo kəlee (Efɛsə 4:25). Gbəli a kɛ ə́ lii yɛ kələn ə́ kwəi, naalowai gɛ pələ kwɛli ə́i kpɔɔ hu hon. Ka kɛi pələ ɓo, kaa ka kee woo pulu pənə a nɛlɛɛ, hwaa hwa kulɔ ɉu (Haŋɔn 15:4 ; 26:20, TMN).

Ə́ nɛa awala kɛtii ə́ hilɛ a mɛni ta ɓo, ə ma kɛ hó hwaa li ma, túwɔ́ a nɛlɛɛ. Ə́ kili lɛɛ ɉu yɛ́ ma, maanɛɛ ə́ nwɛlilakɛ ə lɛɛ ə́ maawiɛ (Kɔlɔsə 4:6). Mɛnii ka kaa moi, ka gɛ pələ kwɛli ə kpɛɛ ɉaɉa, ə lɛɛ ka ho kpəla lonoi ka kee pɔ (Efɛsə 4:26).

YII KA PƐLI GƐI :

• Ka lowai ta həɠə ɉu kaa ka lowai mɛniɠaa ɓo

• Ə́ nɛa awala kɛtii ə́ hilɛ a kɛi hwaa, ə́ wəli tɔɔ ma, ho nwoo hon na. Nɛɛ laa ə kpɛɛ yɛ́ təɠa pa hwaai

YII BIBLƏ KAA MOI : « Ka ka kee ni wɛlilakɛ, ka kɛ a nu tolooɠaa kaa ka kee ni maawiɛ » (Rɔmu 12:10, TMN). Mɛni wala-wala ɓaa, da kɛi hwaa ə́ pɔ, yɛ́ ə́ wəli tɔɔ. Ə́ nɛa awala kɛtii ə́ hilɛ a kɛi giliŋahiɛ pələ hukulɔ yɛ́, gɛ pələ kwɛli ma ə́ nwoo ɲaakaa. Ya yili kɛ « kwəi tɔnɔ laa hu, [...] da kpɔɔmaayɛɛ » laa (Piɛli dɔlɔɔ 3:8 ; Zaakə 1:19). Hó gɛ lɔ yɛ ya kɛi ə́ wəli tɔɔ. Akɛ ə́ kaa mɛni ta kɛi, ya pɛli nɛɛi laa, ə́i wəli tɔɔ ə́ nɛa awala kɛtii ə́ hilɛ ɓa kpɔ a nɛlɛɛ, awala kɛtii, ə́ mo ma yii yaan ka pa mo pulu ɓa. Ya wala kɛ ə́ nɛa awala kɛtii ə́ hilɛ kaa yɛ ə́ yowo, kəlaa ə́ maakpɔnmaa ɓo mun, ə́ kaa pai kɛi a nui hwa « nii holi ɉa ». (Kilimaa mun 7:9.)

YII KA PƐLI GƐI :

• Da kɛi hwaa ə́ pɔ, ə́ wəli tɔɔ a nɛlɛɛ, ə ma kɛ yii di kaa moi ho nɛɛi yɛ́

• Ə́ nɛa awala kɛtii ə́ hilɛ a kɛi hwaa ə́ pɔ, nwooɠaai gaa moi yɛ́ di mukulaa ɓə maanɛɛ ə́ ɲaakaa. Kɛ ə́ kiliŋalaai vaa pələ ɓa, akɛ gwəinɛɛi, awala kɛtii nii holiɛi

YII BIBLƏ KAA MOI : « Kólói lɔpee nu a mɔnɔ mɛɛ gɛi, a dɔnɔ hɔlɔɓo, kəlaa nu a kɛi hwaa lɔ ho bɔ túwɔ́ ɓoi, a ɲaakpɛɛ a yee howolo laa » (Haŋɔn 14:23, TMN). Ka lowai mɛni kpɛɛ lɔ hwaa ka woo tɔɔi ə kɛ tanɔn. Yii ka pɛli ɉu, maanɛɛ ka nu hweelɛi ka gɛ. Yili kɛ laa ho nɛɛ li, maanɛɛ ka kóló kɛ kpɔ kpaan yili maa mɛni ɓa. Ka wala, ka kaa pai kulɔi dɔnɔ ɓa (Haŋɔn 10:4, TMN). Ka kɛi kóló kɛ gee ɓa, ka ka « hwəla lɛlɛɛ hɔlɔɓo » ka kɛ kóló wala-wala hu (Kilimaa mun 4:9, TMN).

YII KA PƐLI GƐI :

• Kpaaləɠaai ka pɛli tɛɛi la, kaa ka lowai mɛni ta ɓo, nu kəlee ə nwɛi lɛ

• Yələ taɠaa, ka kɛ gaai akɛ ka kaa tɛi tɔwɔ