N na Kangaa ni Kamanoai Man te Mwakuri n Tangako?
Ana kaeka te Baibara
Iangoi taeka n ibuobuoki aika manena aikai aika boto man te wanawana ae reke n te Baibara:
Tai kakabanetai n am mwakuri. Bwabwaina te riai ao kaotiota te karinerine nakoia raom ni mwakuri, ma tai karenaia n aron ae ko kaotia bwa iai naba nanom irouia.—Mataio 10:16; I-Korote 4:6.
Kunnikaiko n te aro ae riai. Kabonganaani kunnikai aika kabwakabwaka e kona ni kaburea aia iango aomata. E kaungaaki n te Baibara bwa ko na kunnikaiko “n te aro ae riai ma te iangoraoi.”—1 Timoteo 2:9.
Rineiia raoraom ma te wanawana. Ngkana ko kakabanea am tai ma aomata aika taatangira te wi ni kababaa ke a kaungaa te mwakuri ni kabwakabwaka, e na boni kai karaoaki naba anne nakoim.—Taeka N Rabakau 13:20.
Rarawa nakon taeka aika kamatauninga. Kamwaawako ngkana e a moanna ni bitaki te maroro nakoni “karaki aika bubuaka, maroro n nanobaba, ao manikangare aika kammaira.”—I-Ebeto 5:4, God’s Word Bible.
Tai kariaia waaki aika a na karekeko n te kangaanga. N te katoto, tarataraiko ngkana iai ae e tuangko bwa ko na tiku ni mwakuri imwin te tai n akea raoi bukina ae riai.—Taeka N Rabakau 22:3.
Kamatoako ao tai wimakiki. Ngkana iai ae e karaoa te mwakuri n tangako nakoim, tai wimakiki nakon te aomata anne ao tuangnga bwa ko aki kukurei n ana mwakuri. (1 I-Korinto 14:9) N te katoto, ko kona ni kangai: “Ko aki toki n riringai, ao I rangi ni mwengabuaka iai. Tai manga karaoia ngkanne.” Ko kona ni kororeta nakon te aomata anne ni kabwarabwaraa te bwai ae riki, am namakin iai, ao tera ae ko tangiria bwa e na karaoia imwina. Kamataataa raoi bwa e boboto aroarom i aon am koaua ni kaineti ma te aroaro ni maiu ae riai ao am Aro.—1 I-Tetaronike 4:3-5.
Kakaaea buokam. Ngkana e teimatoa te mwakuri n tangako nakoim, kaotia nakon raoraom ae ko onimakinna, kaain am utu, ke raom ni mwakuri, ke te aomata ae mwaatai ni buokiia naake a rotakibuaka n te waaki anne. (Taeka N Rabakau 27:9) A bati aomata aika karaoaki te mwakuri n tangako nakoia, ake a karekea buokaia rinanon te tataro. E ngae naba ngkana ko tuai n tatataro mai mwaina, tai iangoia bwa ko aki kona ni buokaki iroun Iehova, are ngaia “te Atua ae anga te kabebetenano n aekana nako.”—2 I-Korinto 1:3.
Mirion ma mirion ake a a riribaa te tabo ni mwakuri ibukin te mwakuri n tangako.