Ngkana ti kaokoroira ma naake ti taku bwa a aki raraoi aroia, ti a karikirakea riki ara riribai. Ao ngkana ti tii raoraonia naake titeboo arora ma ngaiia, ti na kona n iangoia bwa tii ngaira ae riai arora n iaiango, ara namakin, ao ara mwakuri.

“Kam na kamwaawawai naba nanomi.”​—2 I-KORINTO 6:13.

Tera ae e nanonaki iai? E kona ni kaineti “nanora” ma ara iango ao ara namakin. Ngkana ti tii tangiriia naake titeboo arora ma ngaiia, ti a tiatiana iai ara tangira. Ngkana ti na totokoa te kangaanga anne, ti riai n tauraoi n raoraonia naake a kaokoro ma ngaira.

Ngkana ti a atai aroaroia tabemwaang, ti a kona n ota ni bukini karaoani bwaai irouia n te aro ae kaokoro. Ngkana ti a kaan riki ma ngaiia, ti a kona ni mwaninga ae a kaokoro ma ngaira. A a kakawaki riki iroura, ao ngkana a kimwareirei ke a nanokawaki, ti rotaki naba iai.

Iangoa ana katoto Nazaré. E riribaiia ngkoa naake a mwaing nako abana. E taekina te baere e buokaki iai neiei ni kangai: “E babane au tai ma ngaiia ao ni mwakuri ma ngaiia. I kaitiboo ma aomata aika rangi ni kaokoro ma taekaia ake a tataekinaki irouia kaain ara tabo. Ngkana ko raoraonia aomata aika kaokoro aia katei ma ngkoe, ko na aki tii kinaia, ma ko na tangiriia ao a na kakawaki naba iroum.”

Karekea am tai ni maroro ma aomata ake a roko man aaba, reeti, ke taetae aika kaokoro ma ngkoe. Ko kona

• Ni butiia bwa a na karakinia teutana.

• Ni kaoia bwa a na amwarake ma ngkoe.

• N ongora aia karaki, ao n noria bwa tera ae kakawaki irouia.

Ngkana ko ota bwa tera aron rotakin aroaroia ma baike a rinanoi, ko na kona n tangiriia riki.