Bon te tautaeka mai karawa Ana Tautaeka n Uea te Atua. E na onei mwin aia tautaeka ni kabane aomata, ao e nang karaoaki iai nanon te Atua i karawa ao i aon te aba. Bon te rongorongo ae raoiroi taekan Ana Tautaeka n Uea te Atua. E a kaan te tai are e nang katoki kainnanoia aomata n tangiran te tautaeka ae raoiroi, Ana Tautaeka n Uea te Atua. E na katiteuanaia aomata ni kabane aika maeka i aon te aba.​—Wareka Taniera 2:44; Mataio 6:9, 10; 24:14.

E riai n iai te tia kairiri n tautaeka nako. E a tia Iehova n rinea Natina ae Iesu Kristo bwa te Uea n Ana Tautaeka n Uea.​— Wareka Te Kaotioti 11:15.

Bon te Uea ae raoiroi Natin te Atua, ibukina bwa e akoi ao e teimatoa ni karaoa ae eti. (Ioane 1:14) E bati naba mwaakana ni buokiia aomata, ibukina bwa e na tautaekana te aonnaba mai karawa. Imwini kautana man te mate ao e waerake nako karawa ao e tekateka n tataninga i angaatain Iehova. (I-Ebera 10:12, 13) Imwina, e a anganaki iroun te Atua te mwaaka bwa e na moana iai ana tautaeka.​—Wareka Taniera 7:13, 14.

A na tautaeka ma Iesu i karawa, te koraki aika “itiaki.” (Taniera 7:27, BG) Bon ana abotoro Iesu aika kakaonimaki te koraki aika itiaki ake a moan rineaki. E teimatoa Iehova ni karokoa ngkai, n rineiia mwaane ma aine aika kakaonimaki aika itiaki. A kautaki man te mate nakon te rabwata n taamnei, n aroni kautan Iesu.​—Wareka Ioane 14:1-3; 1 I-Korinto 15:42-44.

 Iraman aomata aika a na nako karawa? E arania te koraki akanne Iesu bwa “te nanai ae uarereke.” (Ruka 12:32) Mwaitiia ni kabane bon 144,000. A na tautaekana te aonnaba ma Iesu.​—Wareka Te Kaotioti 14:1.

E moana ana kairiri Ana Tautaeka n Uea te Atua n 1914. * Te moanibwai are e karaoia Iesu ngke e a riki bwa te Uea, boni karenakoan Tatan ma ana taimonio nako aon te aba. E a rangi ni korakora unin Tatan ao e a karikii kangaanga n te aonnaba ni kabutaa. (Te Kaotioti 12:7-10, 12) Ni moa man te tai anne, ao e a rikirake ni korakora rawawatan te botannaomata. Buaka, roongo, aoraki aika kamamate, ao mwaeiei boni ‘kanikinaean’ te Tautaeka n Uea ae e a kaan roko n tautaekana te aonnaba.​—Wareka Ruka 21:7, 10, 11, 31.

A katiteuanaaki n Ana Tautaeka n Uea te Atua te koraki ae uanao mai buakoia botannaomata nako, rinanon te mwakuri n uarongorongo ni katobibia te aonnaba. Mirion ma mirion aomata aika nimamannei aika a na tautaekanaki iroun Iesu. A na kamanoaki te koraki akanne n Ana Tautaeka n Uea te Atua, ngkana e a kamauna te waaki ae buakaka ae ngkai i aon te aba. Mangaia are a riai n ongeaba te koraki ake a kan tautaekanaki iroun Iesu, ake a tangiria ni karekei kakabwaia n Ana Tautaeka n Uea te Atua.​—Wareka Te Kaotioti 7:9, 14, 16, 17.

I nanon te tai ae maanna 1,000 te ririki ao e nang kakororaoaki n te Tautaeka n Uea anne, ana moani kantaninga te Atua ibukin te botannaomata. E nang riki bwa te bwaretaiti te aonnaba ni kabutaa. Imwin tenga n ririki, e nang kaoka te Tautaeka n Uea Iesu nakon Tamana. (1 I-Korinto 15:24-26) Iai ae ko kan taekina nakoina rongorongon Ana Tautaeka n Uea te Atua?​—Wareka Taian Areru 37:10, 11, 29.