TITIRAKI 9
I Riai ni Kakoauaa te Ewarutin?
TERA AE KO NA KARAOIA?
Iangoa te bwai ae riki aei: E a mangaongao ana iango Alex. E a kamani kakoauaa te Atua ao te karikibwai. Ma ngkai, e kamatoaa n taekinna ana tia reirei n te biology bwa e boni koaua te ewarutin, ae boboto i aoni kakaae n te rabakau n aonnaba aika kona n onimakinaki. E aki kan teinibaba Alex. E taku i nanona, ‘Ngkana a kakoauaa bwa e boni koaua te ewarutin taan rabakau ni bwain te aonnaba, antai ngai bwa N na nanououa irouia?’
Ngke arona bwa ngkoe Alex, ko na kakoauaa te ewarutin ibukina bwa e taekinaki ni booki n reirei bwa e koaua?
TEEI MOA AO IANGO!
Aomata aika mena n itera aika uoua ni kauntaekai aia koaua, n angiin te tai a waekoa n taekini baike a kakoauai ao a aki ataa raoi bukini kakoauaaia irouia.
-
A kakoauaa te karikibwai tabeman tii ibukin ae anne reireiaia n te Aro.
-
A kakoauaa te ewarutin tabeman tii ibukin ae anne reireiaia n te reirei.
TITIRAKI AIKA ONOUA AIKA RIAI N IANGOAKI RAOI
E kangai te Baibara: “A kateaki auti nako iroun te aomata, ma ane e katei bwaai ni kabane bon te Atua.” (Ebera 3:4) E riai kakoauaan anne?
Taekinan ae akea te tia Karika te maiu, ai aron taekinan ae akea te tia katea te auti aei
AE TAEKINAKI: E riki te iuniweeti imwin te rebwetaua teuana ae korakora.
1. Antai ke tera ae karika te rebwetaua anne?
2. E nga riki ae boo ma ongina
AE TAEKINAKI: A riki aomata mairouia maan.
3. Ngkana a riki aomata mairouia maan, n aroia taian ebe, e aera ngkai e rangi ni kaokoro wanawanaia aomata ma taian ebe?
4. Ngkana e kainnanoaki te wanawana ni karaoan ao kammwakuran robot aika akea te maiu irouia, tera ngkanne ae kainnanoaki ibukini karikan te cell ae maiu, ao te aomata?
AE TAEKINAKI: Iai bwaai ni kakoaua bwa e koaua te ewarutin.
5. E a tia te aomata ae taekina aei ni karaoa ana ukeuke i aon te bwai ni kakoaua?
6. Iraman aomata aika kakoauaa te ewarutin tii ibukin ae a tuangaki bwa a kakoauaa aomata ni kabane aika wanawana?
“Ngkana ko rianna i buakonikai ao ko a nora naba te auti ae tamaroa, ko na iango ni kangai: ‘Ai tikiraoira! A bae ni bwaka raoi aroka ikai ngaia ae e a riki te auti aei.’ E a bon aki boo ma ongina! Ngaia are e aera bwa ti na kakoauaa ae a riki i bon irouia bwaai nako n te iuniweeti?”
—Julia.
“Iangoia bwa iai ae e tuangko ae e rebwetaua te tabo ni boreeti teuana ao a teberaki taian oo ma etan te auti n te ingke ao e a mwakoro naba iai kanoan te rikitinare teuana ae bwanin. Ko na kakoauaa?”
—Gwen.
E AERA BWA KO KAKOAUAA TE ATUA?
E kaungako te Baibara bwa ko na kabongana ‘wanawanam.’ (I-Rom 12:1) E nanonaki n anne bwa e na aki boto kakoauaan te Atua tii i aon
-
AM NAMAKIN (I namakinna bwa kaanga iai te mwaaka teuana ae korakora)
-
AIA IANGO TABEMWAANG (I maeka n te tabo ae a taua te Aro kaaina)
-
KAIROROAM (A kaikawaai au karo bwa N na kakoauaa te Atua
—Akea riki au anga)
N oneani mwin anne, e riai n iai bukina aika raraoi ae ko kakoauaa iai.
“Ngkana I reirei ao I ongongora iroun au tia reirei ae kabwarabwaraa aroni mwakurin te rabwata, I a kakoauaa raoi bwa bon iai te Atua. A tannako bwain te rabwata nako ma aia mwakuri, ni moa man ae moan te uarereke, ao a bane ni karaoi tabeia n akea ataakina iroura. Rabwatan te aomata bon te bwai ae kaminonano!”
—Teresa.
“Ngkana I nora te kateitei ae moan te rietata, te kaibuke ae bubura, ke te kaa, ao I titirakinai ni kangai, ‘Antai ae karaoia?’ A kainnanoaki aomata aika wanawana bwa a na karaoa te kaa, ibukina bwa a rangi ni bati bwaina aika uarereke ake a na mwakuri raoi bwa e aonga ni maiu te kaa. Ngkana ngaia bwa a karaoaki taiani kaa iroun te aomata temanna, ao ai arora naba ngaira aika aomata.”
—Richard.
“Kabatiaan riki reiakinan te rabakau n aonnaba, e a kakekerikaaka riki kakoauaan te ewarutin. . . . Irou, ai aron ae e kainnanoa riki te ‘onimaki’ ae bati kakoauaan te ewarutin, nakoni kakoauaan te tia Karikiriki.”
—Anthony.
IAIANGOA AEI
I nanon irabwi ma irabwi te ririki ni kakaae irouia taan rabakau, e tuai man reke te kabwarabwara teuana ibukin te ewarutin ae a na bane ni boraoi n iango iai. Ngkana a aki boraoi n iango naba n te ewarutin taan rabakau, ao ngaiia aika taiani kabanea ni wanawana, iai ngkanne buren ae ko aki kakoauaa te iango aei?
