Iangoa te bwai ae riki aei: Ngkana e tiroia Julia ao irouna e marikarika. E taku i nanona: “I riai ni kabwakaa rawawatau,” e ngae ngke a tutuangnga ana karo ma raoraona bwa e boni bakitaia.

N taai aika tibwa nako, e iaiangoi baika riao Julia ibukini kabwakaan “rawawatana ae tii teutana.” Te bwai ae e riai ni karaoia, e na tii aki amwamwarake i nanon tabebong . . .

Ngke arona bwa titeboo am namakin ma Julia, tera ae ko na karaoia?

E aki bure tabeaiangam n aron taraakim. Ni koauana, a taekinaki baaraoia aine ao mwaane tabeman n te Baibara, n aron Tara, Rakera, Abikaira, Ioteba, ao Tawita. E taekinaki n te Baibara bwa “moan te baaraoi” te aine ae Abitiaka.—1 Uea 1:4.

Ma a bati rooro n rikirake n taai aikai ae e a riao tabeaiangaia n aron taraakia. E kona anne ni karekei kangaanga aika kakaiaki. Iangoa aei:

• N te kakaae teuana, 58 te katebubua ataeinnaine aika taku bwa a riao rawawataia, ma n etina bon tii 17 te katebubua aika riao rawawataia.

• N te kakaae riki teuana, 45 te katebubua aine aika bon aki tau rawawataia ma a taku bwa a rangi n tinebu!

• Ibukini kani kabwakaan rawawataia, e a tia n reke irouia tabeman rooro n rikirake te anorexia, ae te aoraki ae te aki amwamwarake ae karekea te bakitaia ao e karuanikaia te maiu.

 Ngkana iai iroum kanikinaean te anorexia ke aoraki riki n aron akanne, karekea buokam. Moanna n te maroro ma am karo ke ae ikawai ae ko onimakinna. E taekinaki aei n te Baibara: “E kaotiota te tangira n taai nako te rao ni koaua, ao boni ngaia te tari ae bungiaki ibukin tain te rawawata.”—Taeka N Rabakau 17:17.

Ni koauana, bon te aomata ae raba are n te nano ae kona n oti iai bwa e tamaroa te aomata ke e aki. Iangoa natin te Uea ae Tawita ae Abetarom. E taekinaki aei n te Baibara:

‘Akea te mwaane temanna ae kamoamoaaki riki nakoina ibukini botonimwaanena. Bon akea naba waewaeana teutana.’—2 Tamuera 14:25.

E ngae n anne, bon te rorobuaka n ataei ae rangi n nanorieta, e kainikatonga, ao te tia kamwane! Ngaia are e aki kaotaki n te Baibara aron Abetarom ae raoiroi; e kaotaki iai bwa te mwaane ae aki bwerengaki n aki kakaonimaki ni koaua ao e tiritiri kairiribaina.

Anne bukina ae e anga taeka n reirei aikai te Baibara:

“Karina i aomi te aroaro ae boou.”—I-Korote 3:10.

“Katamaroaami ae riai, tiaki katamaroaan tinanikumi . . . , ma katamaroaami ae riai bon te aomata ae raba are n te nano.”—1 Betero 3:3, 4.

E ngae ngkai akea buren te kani baaraoi, ma e kakawaki riki aroarom nakon aron taraakim. N tokina, ane ko na ririkirake ni baaraoi irouia tabemwaang ibukin aroarom aika tamaroa, ao tiaki ibukini korakoran ke teiraoin rabwatam! E taku te teinnaine ae Phylicia: “Ko kai taraaki ni baaraoim, ma anuam raoi ao aroarom aika raraoi boni ngaia ake a na ururingko riki iai aomata.”

Ko aki kukurei n aron taraakim n angiin te tai?

□ ENG □ I AKI

Ko a tia n iangoa te korokoro ibukin teiraoim ke baireani kanam n te aro ae riao ibukini kanakoraoan taraakim?

□ ENG □ I TUI

Tera ae ko na bitia n aron taraakim ngke arona bwa ko kona ni karaoia? (Kamroroni ake ko taku.)

• ABWAKIM RAWAWATAM IRAM

• TEIN RABWATAM UBUM KUNIM

Ngkana eng am kaeka nakon titiraki ake uoua ao ko kamroroni tenua ke e raka riki n te katenua, iangoa aei: A boni bae n aki nori kabwakam akana ko nori akanne tabemwaang. E kai reke ae ko na tabeaianga n te aro ae riao ibukin aron taraakim.—1 Tamuera 16:7.