I-Karatia 5:1-26
5 E kainaomataira Kristo ibukin te aro n inaomata aei. Mangaia ae teimatoa iai,+ ao tai manga kariaia baemi i aan te amo n toronaki.+
2 Noria! I tuangingkami ngai ae Bauro bwa ngkana kam na korotobibiaki, ao akea manenan ae e a tia ni karaoia Kristo ibukimi.+
3 I a manga kaotioti riki nakoia mwaane nako bwa ngkana a korotobibiaki, ao a riai naba n toua mwin te Tua+ ni kabane.
4 Kam a raure ma Kristo ngkami aika kam kani karaoiroaki rinanon te tua,+ ao kam a aikoa mena i aan te akoi ae rianako.
5 Ma ti ingainga ngaira aika ti kairaki n te taamnei, ni kariaa te raoiroi ae kantaningaaki, ae nako man te onimaki.
6 Bwa akea manenan te korotobibi ke te aki korotobibi+ ni kaineti ma Kristo Iesu, ma e manena te onimaki ae kairaki n te tangira.
7 E nakoraoi biribirimi ngkoa.+ Antai ae tukingkami man irirakin nanon te koaua?
8 Tiaki mairoun Teuare weteingkami te aeka n anainano aei.
9 E karikirakea te bua ni burawa te iiti ae tii teutana.+
10 I kakoauaa bwa kam na aki bitii ami iango iai, ngkami aika taan rimwin te Uea,+ ma e na reke kain te aomata ae tatabareingkami,+ n aki ongeia bwa antai ngaia.
11 Ni kaineti ngkanne ma ngai taari, ngkana te koaua bwa I tabe n uarongorongoa taekan te korotobibi, ao e aera ngkai e waakinako bwainikirinau? Ngkana ngaia anne, ao e a tia ni kamaunaaki te bwai ni kabwakabwaka ae taekan te kai ni kammaraki.*+
12 A bia koromaangeia* i bon irouia, mwaane ake a kataia n uruana ami onimaki.
13 Taari, kam weteaki nakon te inaomata, ma tai kabongana inaomatami aei n ukeri iai kaibwabwarun te rabwata,+ ma kam na itorotoro i nanon te tangira.+
14 E kakoroaki nanon* te Tua ni kabane n te taeka ae tii teuana ae kangai: “Ko riai n tangira raom n aomata n aron tangiram i bon iroum.”+
15 Ma ngkana kam teimatoa n iowawa ao ni buaka i marenami,+ tarataraingkami bwa kam na aki kaai ni kamaunaingkami.+
16 Ma I tuangingkami, Teimatoa n nakonako ni kairakimi n te taamnei,+ ao kam na aki ira iai nanoni kaibwabwarun te rabwata.+
17 E kan ekaanako te taamnei kaibwabwarun te rabwata, ao e kan ekaanako te rabwata te taamnei, bwa a uaia ni kauntaba baikai, ai ngaia ae kam aki karaoi iai baika kam kani karaoi.+
18 Ma ngkana kam kairaki n te taamnei, ao kam aki mena i aan te tua.
19 A ataaki raoi ana mwakuri te rabwata bwa te wene ni bure,*+ te kamwara, te aroaro ae kammaira,*+
20 taromauriani bouannanti, te tabunea,*+ te kairiribai, te kiriwe, te bakantang, taian un, te ikakaiwi, te iraraure, te iraraure n te Aro,
21 te nanonibwi, te koro ni manging,+ botaki aika akea te taubaang iai,* ao aroaro riki n aron aikai.+ I a manga anga riki te kauring nakoimi ngkai, bwa a na aki rin n ana Tautaeka n Uea te Atua+ te koraki ake a kakaraoi baikai.
22 Ni kaitaraan anne, uaan te taamnei bon te tangira, te kimwareirei, te rau, te taotaonakinnano,* te akoi, te raoiroi,+ te onimaki,
23 te nimamannei, ao te taubaang.+ Akea te tua ae ekinako baikai.
24 Irarikin anne, a a tia ana aomata Kristo Iesu, ni bobitiia te rabwata ma kaibwabwaruna ao tangirani baika bubuaka, i aon te kai.+
25 Ngkana ti maiuakina ae boraoi ma kairakira n te taamnei,+ ti bia teimatoa ni maiuakina ae boraoi ma kairakira iai.
26 Ti na tai kainikatonga, ni kauekea te kaiangatoa+ ao te bakantang i marenara.+
Taiani Kabwarabwara Mai Nano
^ Nora Nanon Taeka.
^ Ke, “kanakoa aia bwai ni kakariki i bon irouia; riki bwa iunaki,” ae a na bon riki n aki tau ni boni karaoa te tua are a boutokaia.
^ Ke tao, “e ikotaki.”
^ Kuriiti, por·neiʹa. Nora Nanon Taeka.
^ Ke, “te aroaro ae kanuka.” Kuriiti, a·selʹgei·a. Nora Nanon Taeka.
^ Ke, “te mwakuri n tabunea ae te kakaraoi; kabonganaan taian drug n te aro ae aki riai.”
^ Ke, “te bukamaru n akea te taubaang.”
^ Ke, “nanomwaaka i aan te rawawata ae maan.”