I-Karatia 3:1-29
3 Ngkami aika I-Karatia aika kam nanobaba! Antai ae mwamwanaingkami,+ ngkami ake e a tia ni kaotaki raoi nakoimi bwa e bobitiaki i aon te kai Iesu Kristo?+
2 Tii te baei ae I kan titirakiningkami* iai: Kam karekea te taamnei ni mwakurian te tua, ke man onimakinan te baere kam ongo?+
3 Kam rangi n nanobaba? Ngke kam moani waaki ao kam toua mwin ana kairiri te taamnei ae raoiroi. Ma te koaua bwa kam a manga ira bwain aon te aba ngkai kam a roko n tokin ami waaki?+
4 Kam rinanoni maraki aika bati n akea uaana? I koaua raoi bwa bon iai uaana.
5 Ma teuare karekea te taamnei nakoimi ma ni karaoi mwakuri+ ni kakai i buakomi, e karaoa aei ibukini mwakurian te tua iroumi, ke ibukin onimakinan te baere kam ongo?
6 N aron Aberaam n “onimakina Iehova,* ao e aranaki iai bwa e raoiroi.”+
7 Kam bon ataia bwa bon natin Aberaam te koraki ake iai aia onimaki.+
8 E a kaman ataaki n te koroboki ae tabu bwa te Atua e na atongia natannaomata bwa a raoiroi ibukin aia onimaki, ao e taekinaki iai te rongorongo ae raoiroi rimoa nakon Aberaam ni kangai: “A na bane ni kabwaia natannaomata rinanom.”+
9 Mangaia ae a a kakabwaiaaki naake iai aia onimaki n aron are e kakabwaiaaki naba Aberaam are onimaki.+
10 A na bane ni maraia ake a onimakina kakaraoan ae taekinaki n te tua, bwa e koreaki ae kangai: “A na maraia aomata nako ake a aki teimatoa ni karaoi bwaai ni kabane ake a koreaki n te nira ni boki are e koreaki iai te Tua.”+
11 Ma e teretere bwa akea ae atongaki bwa e raoiroi n te tua i matan te Atua,+ ibukina bwa “e na maiu ane e raoiroi ibukin ana onimaki.”+
12 E aki katauaki n te Tua bwa e riai n iai ana onimaki te aomata, ma “ane e karaoi baikai ao e na maiu iai.”+
13 E kainaomataira Kristo man te rekenikai+ n te Tua ngke e kabooira+ ao e onei mwira ni karekeaki kaina, ibukina bwa e koreaki ae kangai: “Ke e reke kain te aomata ae tauraki n te kai.”+
14 E karaoaki aei bwa e aonga ni karababaaki nako kakabwaiaan Aberaam nakoia natannaomata nako rinanoni Kristo Iesu,+ bwa ti aonga ni karekea te taamnei are e beritanaki,+ ibukin ara onimaki.
15 Taari, I taekina te kaikonaki ae kangai: Ngkana e a tia ni kamatoaaki te berita, ao e ngae ngke ana berita te aomata, ma akea ae e kona ni kamauna ke ni betanna.
16 Ao a atongaki berita nakon Aberaam ma kanoana.* E aki kangai: “ao nakoia kanoam,”*+ bwa aongkoa a mwaiti. Ma e kangai, “ao nakoni kanoam,”* ae kaineti nakon temanna ae Kristo.+
17 I a manga atonga riki aei: E aki toki manenan te berita are e kamatoaaki iroun te Atua rimoa, n te Tua are roko 430 te ririki imwina,+ ao e aki naba kamauna te motintaeka.
18 Bwa ngkana e boto i aon te tua te tibwanga are e anga te Atua, ao e a aki ngkanne boto i aon te berita, ma e tituaraoi te Atua n angan Aberaam rinanon te berita.+
19 Tera ngkanne manenan te Tua? E ikotaki ibukini kaotan taiani bure,+ ni karokoa rokon+ te kanoa* are e taekinaki te berita nakoina. Ao e karokoaki irouia anera+ ni bain te tia raoi.+
20 E na akea te tia raoi ngkana tii temanna te aomata ae irekereke iai, ma e karaoa te berita te Atua n tii ngaia.
21 Te koaua bwa e ekinako ana berita te Atua te Tua? Tiaki ngaia anne! Bwa ngke arona bwa e a tia n anganaki te aba te tua ae kona ni karekea te maiu, ao e na bon reke ngkanne te raoiroi man te tua.
22 Ma e kabureia aomata nako te Koroboki ae Tabu ni kainia i aan te bure, bwa a aonga n anganaki te koraki ake a onimaki, te berita are reke man onimakinan Iesu Kristo.
23 Ma imwain rokon te onimaki ti tararuaaki i aan te tua, bwa ti bane ni kabureaki ma ni kainaki iai, ao ti kakariariaa te onimaki are baireaki bwa e na kaotaki.+
24 Mangaia ae e riki te Tua bwa ai aron te tia kairiia ataei* ae kairira nakoni Kristo,+ bwa ti aonga n atongaki bwa ti raoiroi rinanon te onimaki.+
25 Ma ngkai e a roko+ te onimaki, ti a aikoa mena i aan te tia kairiia ataei.+
26 Bon natin te Atua+ ngkami ni kabane, rinanon onimakinani Kristo Iesu+ iroumi.
27 Bwa kam a tia ni karina Kristo i aomi, ngkami ni kabane ake kam bwabetitoaki i nanoni Kristo.+
28 Akea te I-Iutaia ke te I-Kuriiti,*+ akea te toro ke ae e inaomata,+ akea te mwaane ke te aine,+ bwa kam a bane n riki bwa te aomata ae tii temanna ae katiteuanaaki ma Kristo Iesu.+
29 Ma ngkana ana bwai Kristo ngkami, ao boni kanoan*+ Aberaam ngkami, aika taani bwaibwai+ ni kaineti ma te berita.+
Taiani Kabwarabwara Mai Nano
^ Kuritii, “ataia mairoumi.”
^ Nora Buk. A5.
^ Kuriiti, “am kariki.”
^ Kuriiti, “am kariki.”
^ Kuriiti, “ana kariki.”
^ Kuriiti, “te kariki.”
^ Ae nanona “te aomata ae tararuaiia ke e kawakinia ataei.”
^ E nanonaki ikai aomata aika tiaki I-Iutaia ake a kabongana te taetae ni Kuriiti.
^ Kuriiti, “ana kariki.”
