Koo ko yɛ Amerika Wuoyigbɛ ni atsɛɔ lɛ Amazon, ni nugbɔ nɛɔ yɛ jɛmɛ waa. Maji srɔtoi ahusui feɔ koo nɛɛ, ni mɛi ni wieɔ wiemɔi srɔtoi yɔɔ koo nɛɛ mli. Koo nɛɛ etse ehe kwraa yɛ maŋtiase wuji ahe. No hewɔ lɛ, yɛ July 2017 lɛ, Yehowa Odasefoi hii kɛ yei 13 fã gbɛ kɛyatsɔ Maroni Faa lɛ kɛ eniji ni yɔɔ bokagbɛ yɛ French Guiana lɛ anɔ. Mɛni hewɔ amɛfã gbɛ nɛɛ? Amɛtee koni amɛyashiɛ sane kpakpa ni yɔɔ Biblia lɛ mli lɛ amɛhã mɛi ni yɔɔ faa lɛ naa lɛ.

 Nyɔɔŋ kome dani amɛbaaje gbi 12 gbɛfãa lɛ shishi lɛ, amɛ fɛɛ amɛyakpe kɛto he gbɛjianɔ. Winsley wie akɛ: “Wɔtao kpokpaa lɛ kɛ mɛi ni yɔɔ jɛmɛ lɛ ahe saji, ni wɔsusu nibii ni wɔbaafee kɛsaa wɔhe kɛhã gbɛfãa lɛ hu ahe. Ahã amɛteŋ mɔ fɛɛ mɔ nɔ ko ni nu nyɛŋ abote mli ni amɛbaanyɛ amɛkɛ hammock, ni ji nɔ ko ni akɛtsotsoroɔ shi ni akãa nɔ, kɛ tɔŋtɔŋ buu awo mli. Gbɛfãa lɛ bi ni amɛta ɛroplen mli shii enyɔ, koni no sɛɛ lɛ amɛta lɛji bibii amli ŋmɛlɛtswai babaoo.

 Te mɛi ni ahala kɛhã gbɛfãa lɛ nu he amɛhã tɛŋŋ? Claude kɛ Lisette ni amɛyɛ amɛpɛnshɛŋ afii amli lɛ mɔ hegbɛ nɛɛ mli oya nɔŋŋ. Claude wie akɛ: “Mimii shɛ mihe waa, shi mishe gbeyei fioo. Ejaakɛ no mli lɛ, minu akɛ faa lɛ hei komɛi yɛ oshãra waa.” No mli lɛ, Lisette hu yɛ enaagba, ewie akɛ: “Mibi mihe akɛ, ‘Te mafee tɛŋŋ mawie Amerika shikwɛɛbii awiemɔi lɛ?’”

 Mickaël, ni fata mɛi ni ahala lɛ ahe lɛ, hu nu he nakai nɔŋŋ. Ewie akɛ: “No mli lɛ, nɔ ko fioo pɛ wɔle yɛ Wayanabii lɛ ahe, no hewɔ lɛ, mitao nii amli yɛ Intanɛt lɛ nɔ koni mikɛkase wiemɔi fioo komɛi kɛ bɔ ni aŋaa mɔ yɛ amɛwiemɔ lɛ mli.”

 Shirley ni ekɛ ewu Johann fata mɛi ni ahala lɛ ahe lɛ ŋmala wiemɔi srɔtoi komɛi ni mɛi ni yɔɔ faa lɛ naa lɛ wieɔ lɛ eshwie shi. Ewie akɛ: “Wɔdaunlodi vidioi ni yɔɔ wiemɔi nɛɛ ateŋ babaoo amli lɛ yɛ jw.org lɛ nɔ, ni wɔhe wolo ko ni tsɔɔ bɔ ni atsaraa wiemɔi yɛ Wayana wiemɔ lɛ mli.”

 Yɛ Jufɔ, July 4 lɛ nɔ lɛ, kuu nɛɛ yakwɔ ɛroplen yɛ Saint-Laurent du Maroni ni ekɛ amɛ tee Maripasoula, ni ji maŋ bibioo ko yɛ French Guiana koo ko mli lɛ.

 Enɔ jetsɛremɔ lɛ, kuu nɛɛ kɛ lɛji bibii ni atsɛɔ amɛ pirogues lɛ nyiɛ Maroni Faa lɛ nɔ kɛyashiɛ yɛ akrowai ni yɔɔ ekooyigbɛ lɛ amli; amɛye gbii ejwɛ. Roland, ni fata kuu lɛ he lɛ wie akɛ: “Wɔna akɛ Amerika shikwɛɛbii lɛ nyaa saji ni Biblia lɛ wieɔ he lɛ ahe waa. Amɛbibii saji babaoo, ni amɛteŋ mɛi komɛi bi ni wɔkɛ amɛ akase Biblia lɛ.”

 Yɛ akrowa ko mli lɛ, Johann kɛ Shirley yanina nuu ko kɛ eŋa, ni no mli lɛ amɛwekunyo ko gbe ehe etsɛko tsɔ. Johann bɔ amaniɛ akɛ: “Wɔjie vidio ni ji Amerikanyo Ko Ni Na E-Bɔlɔ Lɛ wɔhã amɛ.” Vidio nɛɛ yɛ JW Broadcasting lɛ nɔ. Ekɛfata he akɛ: “Vidio nɛɛ ta wu kɛ ŋa nɛɛ atsui he waa. Akɛni amɛmiisumɔ ni wɔkɛ amɛ aya nɔ ashãra hewɔ lɛ, amɛhã wɔ e-mail adrɛs.”

 He ni yɔɔ shɔŋŋ fe fɛɛ yɛ faa lɛ kooyigbɛ ni amɛyashiɛ yɛ lɛ ji Antécume Pata. Maŋtsɛ ni yɔɔ akrowa nɛɛ ŋmɛ Odasefoi ni etɔ amɛ waa nɛɛ gbɛ koni amɛshi amɛ-hammock srɔtoi lɛ yɛ maŋ lɛ henaabuamɔhe lɛ koni amɛkãmɔ nɔ. Amɛju amɛhe yɛ faa lɛ mli taakɛ maŋbii lɛ feɔ lɛ nɔŋŋ.

 Gbɛfalɔi lɛ shi kɛtee akrowa ko ni atsɛɔ jɛmɛ Twenké. Be ni amɛshɛ jɛmɛ lɛ, mɛi lɛ miiye awerɛho ejaakɛ amɛsuɔlɔ ko egbo. Éric, ni efata he kɛto gbɛfãa nɛɛ he gbɛjianɔ lɛ wie akɛ: “Akrowa lɛ maŋtsɛ lɛ, ni egbɛnaa gbɛ́i ji ‘Gbɔmɔ Wulu’ lɛ ŋmɛ wɔ gbɛ ni wɔya mɛi ni miiye awerɛho lɛ aŋɔɔ wɔyashɛje amɛmii. Maŋtsɛ lɛ kɛ eweku lɛ nya ŋmalɛi ni wɔkane yɛ Wayana Biblia lɛ mli wɔhã amɛ lɛ he waa. Wɔjie gbohiiashitee he shiwoo ni yɔɔ Biblia lɛ mli lɛ he vidioi hu wɔtsɔɔ amɛ.”

 No sɛɛ lɛ, amɛwo ɛroplen kɛjɛ Maripasoula kɛtee maŋ bibioo ko ni atsɛɔ lɛ Grand-Santi lɛ mli, enɛ he amɛ minitii 30. Enɔ Jufɔ kɛ Shɔ lɛ, kuu lɛ yashiɛ Biblia lɛ mli sane kpakpa lɛ amɛtsɔɔ maŋbii lɛ. Kɛkɛ ni Soo lɛ, Odasefoi nɛɛ fã gbɛ kroko ko hu​—amɛta lɛji amli ŋmɛlɛtswai enumɔ kɛ fã sɔŋŋ yɛ Maroni Faa lɛ hiɛ kɛtee akrowa ko ni atsɛɔ jɛmɛ Apatou.

 Be ni eshwɛ gbii enyɔ ni amɛgbɛfãa lɛ baaba naagbee lɛ, kuu nɛɛ tee Maroonbii akrowai ni yɔɔ koo mli lɛ. Maroonbii lɛ ji nyɔji ni ahe amɛ yɛ Afrika kɛtee Amerika Wuoyigbɛ lɛ aseshibii. Ahe amɛ kɛtee jɛmɛ be mli ni Blɔfomɛi yeɔ Suriname, ni ji maŋ ko ni bɛŋkɛ jɛmɛ lɛ nɔ lɛ. Odasefoi lɛ fɔ̃ mɛi fɛɛ ni yɔɔ jɛmɛ niiaŋ lɛ nine kɛhã kpee ko ni abaafee yɛ koo lɛ mli; aje gbɛ ashi tɛnti agbo ko kɛhã kpee nɛɛ. Claude wie akɛ: “Wɔtsui tɔ waa, ejaakɛ mɛi babaoo ba kpee lɛ. Nakai leebi lɛ nɔŋŋ wɔfɔ̃ amɛ nine!” Karsten hã maŋshiɛmɔ ko yɛ Aukan wiemɔ mli; maŋshiɛmɔ lɛ yitso ji, “Ani Shihilɛ Lɛ Fɛɛ Nɛ?” No mli lɛ, Karsten eyako jɛmɛ dã. Mɛi 91 jɛ akrowai srɔtoi lɛ amli amɛba kpee nɛɛ.

 Naagbee kwraa lɛ, gbɛfalɔi lɛ ku amɛsɛɛ amɛtee Saint-Laurent du Maroni. Mɛi fɛɛ ni fã gbɛ nɛɛ amii shɛ amɛhe waa yɛ bɔ ni mɛi ni yɔɔ hei ni amɛyashiɛ yɛ lɛ nya wiemɔ lɛ he lɛ hewɔ; amɛhã mɛi lɛ woji srɔtoi, ni amɛjie Yehowa Odasefoi avidioi srɔtoi amɛhã amɛ.

 Lisette wie akɛ: “Mibɛ wiemɔ ko ni mikɛbaatsɔɔ bɔ ni gbɛfãa nɛɛ hã miná miishɛɛ lɛ mli.” Cindy kɛ lɛ kpãa gbee, lɛ hu ewie akɛ: “Kɛ́ miná hegbɛ nɛɛ ekoŋŋ lɛ, mishashaoŋ shi kɔkɔɔkɔ. Ja osa onaa dani obaana bɔ ni eyɔɔ!”

Miishɛɛ nɛɛ hã amɛteŋ mɛi komɛi nu he akɛ esa akɛ amɛku amɛsɛɛ kɛya jɛmɛ ekoŋŋ. Mickaël wie akɛ: “Wɔbaasumɔ ni wɔya jɛmɛ ekoŋŋ!” Winsley efã kɛtee Saint-Laurent du Maroni. Claude kɛ eŋa Lisette, ni amɛ fɛɛ amɛye fe afii 60 lɛ hu ekpɛ mli akɛ amɛbaafã kɛya Apatou.