Yɛ July afi 2013 lɛ, Yehowa Odasefoi A-Gbɛtsɔɔmɔ Kuu lɛ ŋma wolo kɛyahã be fɛɛ sɔɔmɔ krɛdɛɛ lɛ mli bii fɛɛ ni sɔmɔɔ yɛ maŋsɛɛ lɛ. Wolo lɛ tsɔɔ mli akɛ, ato gbɛjianɔ ko ni baaye abua mɛi ni miisɔmɔ yɛ maŋsɛɛ lɛ koni amɛnyɛ amɛya majimaji kɛ kpokpai wuji anɔ kpeei ni abaafee yɛ afi 2014 kɛ afi 2015 shishijee gbɛ lɛ.

Yiŋtoo ni yɔɔ gbɛjianɔtoo nɛɛ sɛɛ lɛ jeee ni akɛye abua mɛi ni miisɔmɔ yɛ maŋsɛɛ lɛ koni amɛya kpeei lɛ kɛkɛ, shi koni amɛnyɛ amɛyasara amɛwekumɛi kɛ amɛnanemɛi hu. Wolo lɛ tsɔɔ mli akɛ asafo lɛ baawo amɛplen yaa kɛbaa fɛɛ he nyɔmɔ.

Eyɛ mli akɛ ato gbɛjianɔi ni tamɔ nɛkɛ pɛŋ moŋ, shi afi nɛɛ nɔ lɛ baafee srɔto kwraa. Yɛ Nitsɔɔmɔ Ajinafoi Akuu ni tsuɔ nii yɛ Gbɛtsɔɔmɔ Kuu lɛ shishi lɛ gbɛtsɔɔmɔ naa lɛ, abaahã dipatmɛnt hee ko ni yɔɔ nitsumɔhe yitso lɛ ato gbɛfãi srɔtoi lɛ ahe gbɛjianɔ.

Be ni akɛ ninefɔ̃ɔ wolo lɛ maje amɛ lɛ, etsɛɛɛ kɛkɛ ni amɛkɛ amɛgbɛ́i bɔi nitsumɔhe ni kwɛɔ gbɛfãa nɔ ni yɔɔ nitsumɔhe yitso lɛ majemɔ koni ahe amɛtikiti ahã amɛ. Be ni shɛɔ January 2014 lɛ, ahe tikiti lɛ babaoo. Nyɛmimɛi ni ahala koni amɛkwɛ gbɛfãa nɛɛ he saji anɔ lɛ bɔi gbɛfãa lɛ he niiamlitaomɔ feemɔ koni anyɛ ato he gbɛjianɔ ahã bei fɛɛ sɔɔlɔi krɛdɛi ni yɔɔ jeŋ fɛɛ lɛ.

Gbɛfãa lɛ he gbɛjianɔtoo kɛ woji lɛ ekomɛi afeemɔ bɛ mlɛo kwraa. Ehe bahia ni gbɛfãlɔi lɛ ekomɛi ajɛ Reykjavík, yɛ Iceland, kɛya Cochabamba, yɛ Bolivia. Ehe bahia ni mɛi komɛi hu ni jɛ Nouméa, yɛ New Caledonia lɛ awó plen kɛya Antananarivo, yɛ Madagascar. Mɛi komɛi hu jɛ Port Moresby, yɛ Papua New Guinea, kɛtee Seattle, Washington, yɛ U.S.A., ni loloolo lɛ, esa akɛ mɛi komɛi ajɛ Ouagadougou, yɛ Burkina Faso, kɛya Winnipeg, yɛ Canada.

Nyɛmimɛi enumɔ ni yɔɔ nitsumɔhe yitso lɛ ni kwɛɔ gbɛfãa lɛ nɔ lɛ yawo tikiti aaafee 19,000 he nyɔmɔ. Amɛkɛ onia ni asafoi lɛ tsu kɛhã gbɛjianɔtoo nɛɛ lɛ yahé tikiti amɛhã gbɛfãlɔi aaafee 4,300 ni jɛ maji 176 amli lɛ.

Nyɛmimɛi lɛ ahiɛ sɔ gbɛjianɔtoo nɛɛ waa. Maŋsɛɛ sɔɔlɔ ko kɛ eŋa ŋma akɛ: “Ŋmɛnɛ lɛ, wɔmiiku wɔsɛɛ wɔyatsa wɔsɔɔmɔ lɛ nɔ yɛ Asia Wuoyi-bokãgbɛ. Wɔmiida nyɛ shi waa akɛ nyɛye nyɛbua wɔ ni wɔku wɔsɛɛ kɛtee wɔmaŋ England, ni wɔkɛ wɔwekumɛi ni wɔshi amɛ afii enumɔ nɛ lɛ eyakpe ekoŋŋ. Kɛjeee gbɛjianɔtoo nɛɛ kulɛ, wɔnyɛŋ wɔya. No hewɔ lɛ, wɔmiida nyɛ fɛɛ ni nyɛye nyɛbua wɔ lɛ shi waa.”

Maŋsɛɛ sɔɔlɔ ko ni miisɔmɔ yɛ Paraguay lɛ ŋma akɛ: “Mi kɛ miŋa fɛɛ miitao ni wɔhã nyɛle akɛ wɔhiɛ esɔ hegbɛ ni wɔná kɛtee majimaji ateŋ kpee lɛ yɛ New Jersey, yɛ U.S.A. lɛ waa. Afi 2011 shishijee gbɛ lɛ, wɔbɔi gbɛjianɔtoo akɛ wɔbaafã gbɛ kɛya United States wɔyakwɛ nitsumɔhe yitso lɛ. Wɔkɛ shika to kɛhã gbɛfãa lɛ. Shi yɛ June mli yɛ nakai afi lɛ ml lɛ, afɔ̃ wɔ nine koni wɔyasara mumui asafoi ni yɔɔ Paraguay lɛ. Enɛ biɔ gbɛfãa kpele diɛŋtsɛ. Be ni wɔsusu nibii ahe saŋŋ lɛ, wɔkpɛ mli akɛ wɔyaŋ United States lɛ dɔŋŋ, moŋ lɛ, wɔkɛ shika lɛ baahé kar koni eye ebua wɔ ni wɔnyɛ wɔsara asafoi lɛ. Etsɛɛɛ nɔŋŋ kɛkɛ ni ahã wɔ wolo akɛ wɔya majimaji ateŋ kpee lɛ. No hewɔ lɛ, nɔ ni wɔshweɔ lɛ ba mli! Wɔmiida Yehowa shi yɛ emlihilɛ kɛ esuɔmɔ ni ejie kpo etsɔɔ wɔ lɛ hewɔ.”

Nyɛminuu ko kɛ eŋa ni jɛ Malawi lɛ ŋma akɛ: “Wɔmiitsɔ e-mail fioo nɛɛ nɔ wɔmiikɛɛ akɛ nyɛyiwaladɔŋŋ waa diɛŋtsɛ! Wɔle akɛ ebiɔ nitsumɔ, be, kɛ shika dani abaanyɛ ato mɛi babaoo tamɔ nɛkɛ agbɛfãa he gbɛjianɔ. Wɔhiɛ esɔ deŋme ni nyɛgbo lɛ waa! Nɔ ni fe fɛɛ lɛ, wɔhiɛ esɔ mlihilɛ kpo ni Yehowa asafo lɛ jie ni hã wɔnyɛ wɔtee majimaji ateŋ kpee lɛ yɛ wɔmaŋ ni wɔnyɛ wɔyasara wɔwekumɛi kɛ wɔnanemɛi hu lɛ.”

Nyɛmimɛi ni yɔɔ asafo lɛ nitsumɔhe yitso lɛ ni toɔ gbɛfãa lɛ he gbɛjianɔ lɛ sumɔɔ amɛnitsumɔ lɛ waa. Amɛteŋ mɔ kome ni atsɛɔ lɛ Mileivi lɛ kɛɛ akɛ: “Eji hegbɛ ni nɔ bɛ akɛ abaaye abua maŋsɛɛ sɔɔlɔi koni amɛyasara amɛwekumɛi kɛ amɛnanemɛi.” Amɛteŋ mɔ kroko hu ni atsɛɔ lɛ Dorise lɛ kɛɛ akɛ: “Ehã mihiɛ sɔ suɔmɔ kpele ni asafo lɛ yɔɔ kɛhã nyɛmimɛi ni sɔmɔɔ yɛ maŋsɛɛ lɛ waa. Ni Rodney, ni ji kuu lɛ ni kwɛɔ gbɛfãa lɛ nɔ lɛ nɔkwɛlɔ lɛ hu kɛfata he akɛ, “Mimii eshɛ mihe waa akɛ mifata he kɛtsu nitsumɔ nɛɛ.”

Yehowa Odasefoi ni yɔɔ jeŋ fɛɛ lɛ nya hegbɛ ni amɛná akɛ amɛtsu onia kɛfi amɛnyɛmimɛi hii kɛ yei ni kɛ hiɛdɔɔ kɛ hekɛafɔleshãa mumɔ tsuɔ nii nɛɛ asɛɛ waa diɛŋtsɛ.