Gbɛtsɔɔmɔ Kuu lɛ ji Kristofoi fioo komɛi ni edara yɛ mumɔŋ ni kɛ gbɛtsɔɔmɔ hãa Yehowa Odasefoi yɛ jeŋ fɛɛ. Amɛnitsumɔ lɛ hiɛ fãi enyɔ:

•   Amɛkwɛɔ ni ajɛɔ Biblia lɛ mli akalaa woji, afeɔ vidioi, atoɔ kpeei ahe gbɛjianɔ, ni afeɔ skul srɔtoi ahãa Yehowa Odasefoi.​—Luka 12:42.

•   Amɛkwɛɔ Yehowa Odasefoi ajeŋ muu fɛɛ nitsumɔ lɛ nɔ; no ji akɛ amɛkɛ wɔshiɛmɔ nitsumɔ lɛ he gbɛtsɔɔmɔi hãa, ni amɛtsɔɔ bɔ ni akɛ oniai ni atsu kɛ nibii krokomɛi ni mɛi kɛkeɔ asafo lɛ atsu nii ahã.

 Yɛ klɛŋklɛŋ afii oha lɛ mli lɛ, “Bɔfoi lɛ kɛ onukpai lɛ” ni hi Yerusalem lɛ kpɛɔ yiŋ ni he hiaa waa kɛhãa Kristofoi asafo lɛ fɛɛ, ni ŋmɛnɛ lɛ, Gbɛtsɔɔmɔ Kuu lɛ nyiɛɔ nakai nɔkwɛmɔnɔ lɛ sɛɛ. (Bɔfoi 15:2) Taakɛ bɔ ni nakai hii anɔkwafoi lɛ jeee Kristofoi asafo lɛ hiɛnyiɛlɔi lɛ, nakai nɔŋŋ ŋmɛnɛ lɛ, Gbɛtsɔɔmɔ Kuu lɛ hu jeee Yehowa Odasefoi asafo lɛ hiɛnyiɛlɔi. Amɛkwɛɔ Biblia lɛ mli kɛhã gbɛtsɔɔmɔ, ni amɛkpɛlɛɔ nɔ akɛ Yehowa Nyɔŋmɔ ehala Yesu Kristo akɛ asafo lɛ Yitso.​—1 Korintobii 11:3; Efesobii 5:​23.

 Gbɛtsɔɔmɔ Kuu lɛ mli bii lɛ ji Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, kɛ Jeffrey Winder. Amɛsɔmɔɔ yɛ wɔnitsumɔhe yitso lɛ yɛ Warwick, ni yɔɔ New York, yɛ U.S.A lɛ.

 Gbɛtsɔɔmɔ Kuu lɛ eto ajinafoi akui ekpaa koni amɛkwɛ wɔnitsumɔi srɔtoi lɛ anɔ, ni amɛteŋ mɔ fɛɛ mɔ sɔmɔɔ yɛ ajinafoi akuu kome lo nɔ ni fe ekome mli.

•   Nɔkwɛlɔi Ajinafoi Akuu: Amɛkwɛɔ mla saji anɔ, ni kɛ́ oshãra ba he ko lɛ, amɛkwɛɔ ni atsuɔ he nii loo ayayeɔ abuaa, amɛyeɔ amɛbuaa Yehowa Odasefoi ni aawa amɛyi yɛ amɛhemɔkɛyeli lɛ hewɔ, ni amɛkwɛɔ ni atsuɔ saji krokomɛi ni kɔɔ Yehowa Odasefoi ahe ni biɔ ni atsu he nii oya nɔŋŋ lɛ.

•   Ajinafoi Akuu Ni Kwɛɔ Betel Nitsulɔi Anɔ: Amɛkwɛɔ koni ato Betel weku lɛ mli bii lɛ ahe gbɛjianɔ.

•   Wolo Kalamɔ Ajinafoi Akuu: Amɛkwɛɔ ni akalaa woji ni akɛkaseɔ Biblia lɛ ni akɛmajeɔ, amɛkwɛɔ hu ni amamɔɔ kpee asai, Maŋtsɛyeli Asai, wiemɔ shishitsɔɔmɔ ɔfisii kɛ nitsumɔhe niji.

•   Sɔɔmɔ Nitsumɔ Ajinafoi Akuu: Amɛkwɛɔ “Maŋtsɛyeli lɛ he sane kpakpa” shiɛmɔ nitsumɔ lɛ nɔ.​—Mateo 24:14.

•   Nitsɔɔmɔ Ajinafoi Akuu: Amɛkwɛɔ ni atoɔ mumɔŋ niyenii ni atsɔɔ wɔkpeei, wɔskul srɔtoi lɛ, nibii ni atswaa aboɔ toi lɛ, kɛ vidioi lɛ anɔ akɛtsɔɔ wɔ nii lɛ ahe gbɛjianɔ.

•   Niŋmaa Ajinafoi Akuu: Amɛkwɛɔ ni atoɔ mumɔŋ niyenii, ni ji woji kɛ nibii ni akɛtsɔɔ nii lɛ ahe gbɛjianɔ kɛtsɔ woji ni akalaa, wɔwɛbsaiti lɛ, kɛ wiemɔ shishitsɔɔmɔ nɔ.

 Yɛ nitsumɔi nɛɛ ni Gbɛtsɔɔmɔ Kuu lɛ tsuɔ lɛ sɛɛ lɛ, amɛkpeɔ shi kome daa otsi kɛsusuɔ Yehowa asafo lɛ hiamɔ nii ahe. Yɛ kpee nɛɛ shishi lɛ, amɛsusuɔ nɔ ni Ŋmalɛ lɛ ekɛɛ lɛ he, ni amɛhãa mumɔ krɔŋkrɔŋ lɛ tsɔɔ amɛ gbɛ koni amɛnyɛ amɛkpã gbee yɛ saji ahe.​—Bɔfoi 15:25.

 Amɛji Kristofoi ni anyɛɔ amuɔ afɔ̃ɔ amɛnɔ, ni yeɔ amɛbuaa Gbɛtsɔɔmɔ Kuu lɛ ajinafoi akui lɛ. (1 Korintobii 4:2) Amɛbaanyɛ amɛtsu nitsumɔ ni ajinafoi lɛ akuu ni amɛyɔɔ mli lɛ kwɛɔ nɔ lɛ jogbaŋŋ ni amɛhe esa yɛ mli, ni daa otsi lɛ amɛyaa kpee ni amɛkuu lɛ feɔ lɛ eko. Eyɛ mli akɛ amɛfataaa he ni akpɛɔ yiŋ moŋ, shi amɛkɛ ŋaawoi kɛ saji krokomɛi ni yeɔ ebuaa hãa, amɛkwɛɔ koni akɛ yiŋ ni ajinafoi lɛ akuu lɛ ekpɛ lɛ atsu nii, amɛkwɛɔ nɔ ni baajɛ yiŋ ni akpɛ lɛ mli kɛba, kɛ he ni atsu yiŋ ni akpɛ lɛ he nii kɛshɛ. Bei komɛi lɛ, Gbɛtsɔɔmɔ Kuu lɛ tsuɔ amɛ koni amɛyasara wɔnyɛmimɛi ni yɔɔ je lɛŋ hei srɔtoi lɛ, loo koni amɛyahã wiemɔi yɛ nifeemɔi tamɔ daa afi kpee lɛ loo Gilead gradueshɛŋ lɛ ashishi.