SANEYITSO LƐ MLITSƆƆMƆ
Namɛi Ji Yehowa Odasefoi?
“Afii pii nɛ ni mile Mike. Eji Yehowa Odasefonyo. Shi jamɔ mli ni eyɔɔ lɛ hãa mihiɛ feɔ mi yaa. Namɔ ji Yehowa? Mɛni hewɔ Odasefoi lɛ yeee gbii juji lɛ? Ani Mike kɛ ehe eyadɔmɔ mumɔi atsɛmɔ kuu ko?”
—Becky, California, U.S.A.
“Be ni weku ko ni yɔɔ mikutso lɛ mli lɛ kɛ Yehowa Odasefoi lɛ bɔi Biblia lɛ kasemɔ lɛ, mibi mihe akɛ: ‘Mɛni ji gbɛ́i Yehowa Odasefoi lɛ shishi? Mɛɛ jamɔ gbɛ́i po nɛ!’”
—Zenon, Ontario, Canada.
“Akɛni mi kɛ miŋa eyaaa sɔlemɔ dɔŋŋ hewɔ lɛ, misusu akɛ Yehowa Odasefoi lɛ ba koni amɛbabu wɔ fɔ. Ni wɔsusu akɛ, kɛ́ sɔlemɔi wuji lɛ po nyɛɛɛ ahã wɔ nɔ ni wɔtaoɔ lɛ, belɛ nɔ ko kpakpa ko bɛ ni wɔbaaná kɛjɛ kuu ko tamɔ Yehowa Odasefoi lɛ adɛŋ.”
—Kent, Washington, U.S.A.
“Yɛ anɔkwale mli lɛ, mileee mɛi ni amɛji kɛ nɔ ni amɛheɔ amɛyeɔ.”
—Cecilie, Esbjerg, Denmark.
Ekolɛ ona ni amɛmiishiɛ yɛ mɛi ashinai anaa loo yɛ hei krokomɛi, loo ni amɛmiija Biblia kasemɔ woji, loo ni amɛkɛ mɛi miikase Biblia lɛ. Ekolɛ amɛteŋ mɔ ko ni hã bo wolo ni okaneɔ nɛɛ. Loloolo lɛ, ekolɛ oyiŋ etɛ̃ɛɛ bo yɛ mɛi tuuntu ni Yehowa Odasefoi ji lɛ he. Ekolɛ susumɔ ni ohiɛ yɛ amɛhe lɛ tamɔ mɛi ni atsi amɛtã kɛtsɔ hiɛ lɛ anɔ lɛ nɔŋŋ.
Kɛ́ oyɛ sanebimɔi kɛ susumɔi ni tamɔ nɛkɛ yɛ amɛhe lɛ, nɛgbɛ obaaná hetoo ni sa lɛ yɛ? Te ooofee tɛŋŋ ole nɔ tuuntu ni Yehowa Odasefoi heɔ amɛyeɔ, he ni amɛnáa shika yɛ kɛtoɔ amɛshiɛmɔ nitsumɔ lɛ he gbɛjianɔ kɛ he ni amɛnáa shika yɛ kɛmamɔɔ kpeei asai, nɔ hewɔ ni amɛshiɛɔ amɛhãa mɛi yɛ mɛi lɛ ashĩai kɛ hei krokomɛi lɛ?
Cecilie ni atsi etã kɛtsɔ hiɛ lɛ wie akɛ, “Mikane Yehowa Odasefoi lɛ ahe saji babaoo yɛ Intanɛt lɛ nɔ. Minu amɛhe saji gbohii babaoo hu. Enɛ hewɔ lɛ, miná amɛhe jwɛŋmɔ gbonyo.” Sɛɛ mli lɛ, ekɛ Yehowa Odasefoi lɛ diɛŋtsɛ gba sane, ni amɛhã lɛ esanebimɔi lɛ ahetoo, ni no hã etsui nyɔ emli.
Ani obaasumɔ ni oná hetoo ni ja kɛhã sanebimɔi ni oyɔɔ yɛ Yehowa Odasefoi lɛ ahe lɛ? Wɔmiiwo bo hewalɛ ni obi Yehowa Odasefoi lɛ, ni ji mɛi ni ŋma wolo ni okaneɔ nɛɛ diɛŋtsɛ. (Abɛi 14:15) Wɔheɔ wɔyeɔ akɛ saji ni nyiɛ sɛɛ lɛ baaye abua bo ni ona mɛi ni wɔji, nɔ ni wɔheɔ wɔyeɔ, ni ebaaye ebua bo hu ni onu nitsumɔ ni wɔtsuɔ lɛ shishi.
