Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Belshazar gbɛ́i fata nibii ni aŋmala yɛ sũ nii nɛɛ he lɛ ahe (Edalɛ pɛpɛɛpɛ nɛ)

Ani Ole?

Ani Ole?

Mɛɛ gbɛ nɔ blema nibii komɛi ni ana lɛ maa nɔ mi akɛ mɔ ko hi shi yɛ Babilon ni atsɛɔ lɛ Belshazar, ni akɛ, eye nɔ akɛ maŋtsɛ?

BE KO ni eho lɛ, mɛi ni jeɔ nibii ni awie yɛ Biblia lɛ mli lɛ ahe ŋwane lɛ kɛɛ Maŋtsɛ Belshazar ni atsĩ etã yɛ Daniel wolo lɛ mli lɛ jeee mɔ ko diɛŋtsɛ ni hi shi. (Dan. 5:1) Amɛwie nakai ejaakɛ no mli lɛ, mɛi ni kaseɔ blema nibii ahe nii lɛ enako nɔ ko ni tsɔɔ akɛ eji mɔ ko diɛŋtsɛ ni hi shi. Shi yɛ afi 1854 lɛ, amɛtsake amɛjwɛŋmɔ. Mɛni ba?

Nakai afi lɛ, Britain maŋ onukpa ko ni atsɛɔ lɛ J. G. Taylor lɛ yana sũ nibii komɛi ni tamɔ mliki tsɛnsii agboiagboi yɛ mɔɔ agbo ko mli yɛ blema Ur maŋ lɛ ni yɔɔ Iraq wuoyigbɛ lɛ. Sũ nibii nɛɛ eko fɛɛ eko kɛlɛ feɔ iŋtsii ejwɛ (sɛntimitai 10), ni aŋmala nibii yɛ amɛhe fɛɛ. Ekome ko yɛ ni nibii ni aŋmala yɛ he lɛ fã ko ji sɔlemɔ ni aasɔle koni Babilon Maŋtsɛ Nabonido kɛ ebinuu nukpa Belshazar yi aná wala daa. Enɛ kumɔ ŋwanejelɔi lɛ anyanyɔji ewo amɛdaaŋ. Amɛkpɛlɛ nɔ akɛ, nɔ ni ana lɛ yeɔ odase akɛ, lɛɛlɛŋ, mɔ ko hi shi yɛ blema ni atsɛɔ lɛ Belshazar.

Biblia lɛ kɛɔ hu akɛ, Belshazar ye nɔ akɛ maŋtsɛ. Shi ŋwanejelɔi lɛ je enɛ hu he ŋwane. Akɛ nɔkwɛmɔnɔ lɛ, Blɔfo jeŋ shikpalɔ ko ni hi shi aaafee afi 1875, ni atsɛɔ lɛ William Talbot lɛ wie akɛ, mɛi kɛɛ “Bel-sar-ussur [Belshazar] kɛ epapa Nabonido fɛɛ ye nɔ akɛ maŋtsɛmɛi yɛ be kome too lɛ nɔŋŋ mli. Shi nɔ kome folo po bɛ ni tsɔɔ akɛ sane nɛɛ ji anɔkwale.”

Nibii ni aŋmala yɛ sũ nibii krokomɛi ni tamɔ nɔ ni wɔtsɔ hiɛ wɔwie he lɛ ahe lɛ ehã ana sane nɛɛ hu naa. Nibii ni aŋmala yɛ ekomɛi ahe lɛ tsɔɔ akɛ, Belshazar papa, Maŋtsɛ Nabonido fãa gbɛ eshiɔ maŋ lɛ maŋtiase lɛ, ni kɛ́ etee lɛ, eyayeɔ afii babaoo dani ekuɔ esɛɛ. Kɛ́ etee nakai lɛ, namɔ kwɛɔ esɛɛ? Encyclopaedia Britannica lɛ kɛɔ akɛ: “Be ni Nabonido bɛ lɛ, ekɛ maŋtsɛyeli lɛ kɛ esraafoi lɛ tsiimɔ wo Belshazar dɛŋ.” No hewɔ lɛ, yɛ gbɛ ko nɔ lɛ, Belshazar ye nɔ akɛ maŋtsɛ yɛ Babilon yɛ nakai be lɛ mli. Blema nibii kɛ wiemɔi ahe nilelɔ kpanaa ko ni atsɛɔ lɛ Alan Millard mu sane naa akɛ, eja gbɛ akɛ “Daniel wolo lɛ tsɛ Belshazar ‘maŋtsɛ.’”

Kɛ́ blema nibii yɛ ni maa saji ni awie yɛ Daniel wolo lɛ mli lɛ anɔ mi jio, eko bɛ jio lɛ, jeee no wɔmɛɔ dani wɔhe emli saji lɛ wɔye ni wɔkpɛlɛ nɔ akɛ Nyɔŋmɔ mumɔ lɛ ni hã aŋma. Mɛni hewɔ? Ejaakɛ Biblia lɛ ewie momo akɛ Ŋmalɛ muu lɛ fɛɛ jɛ Nyɔŋmɔ mumɔ lɛŋ.​—2 Tim. 3:16.