“Odasefoi lɛ tse amɛhiɛ amɛhã mɔ fɛɛ mɔ, ni amɛtse amɛhiɛ amɛhã migbei lɛ po. Gbi ko lɛ, amɛteŋ mɔ kome ni atsɛɔ lɛ Elaine lɛ hã migbei enyɔ lɛ biskit. Kɛjɛ no sɛɛ kɛyaa lɛ, be fɛɛ be ni wɔbaashɛ jɛmɛ lɛ, gbei lɛ gbalaa mi koni wɔya shwiili lɛ he ni ahã amɛ biskit.

“Enɛ tee nɔ nyɔji abɔ. Be fɛɛ be ni wɔbaashɛ jɛmɛ lɛ, gbei lɛ yakpeɔ amɛbiskit lɛ ni Odasefoi lɛ kɛ mi gbaa sane kuku. Shi no mli lɛ, misumɔɔɔ ni mikɛ amɛ gbaa sane etsɛɔ, ejaakɛ miye afii 70 kɛ sɛɛ ni mileee nɔ ni amɛheɔ amɛyeɔ. Mitee sɔlemɔi srɔtoisrɔtoi pii, shi nɔ ko kpakpa jɛɛɛ mli kɛbaaa. No hewɔ lɛ, mikpɛ miyiŋ akɛ mi diɛŋtsɛ makase Biblia lɛ.

“Yɛ nɛkɛ be nɛɛ nɔŋŋ mli lɛ, minaa Odasefoi krokomɛi hu yɛ maŋ lɛ mli hei krokomɛi ni amɛ hu amɛdamɔ amɛshwiilii lɛ ahe. Amɛ hu amɛtseɔ amɛhiɛ amɛhãa mi be fɛɛ be, ni kɛ́ mibi amɛ sane lɛ, amɛjɛɔ Biblia lɛ mli amɛhãa mi hetoo. Enɛ hã mina akɛ amɛlakaŋ mi.

“Gbi ko lɛ, Elaine bi mi akɛ, ‘Ani ole akɛ Nyɔŋmɔ kɛ kooloi hã wɔ akɛ nikeenii?’ Mihã lɛ hetoo akɛ, ‘Hɛɛ, mile waa!’ Kɛkɛ ni Elaine kane Yesaia 11:6-9 lɛ ehã mi. Nakai ŋmalɛ lɛ ta mitsuiŋ waa. Shi fɛɛ sɛɛ lɛ, miheee amɛwoji lɛ eko.

“Kɛjɛ no sɛɛ kɛyaa lɛ, Elaine kɛ ewu Brent kɛ mi gbaa Biblia lɛ mli sane fiofio, ni minya he waa. Amɛwo mi ŋaa ni mikane Mateo wolo lɛ kɛyashi Bɔfoi awolo lɛ koni mana nɔ ni hãa anaa akɛ mɔ ko ji Kristofonyo diɛŋtsɛ. No hewɔ lɛ, mifee nakai. No sɛɛ etsɛɛɛ lɛ, mihã Elaine kɛ Brent kɛ mi bɔi Biblia lɛ kasemɔ. Enɛ ba yɛ afi 2016 teŋgbɛ.

“Minya Biblia lɛ ni amɛkɛ mi kaseɔ daa otsi, kɛ asafoŋ kpeei ni miyaa yɛ Maŋtsɛyeli Asa lɛ nɔ lɛ ahe waa. Miná miishɛɛ waa akɛ miinu nɔ ni Biblia lɛ tsɔɔ lɛ shishi. No sɛɛ afi kɛ nyɔji fioo lɛ, abaptisi mi akɛ Yehowa Odasefonyo. Amrɔ nɛɛ, miye afii 79, ni mile akɛ mina anɔkwa jamɔ lɛ. Yehowa ejɔɔ mi waa akɛ ehã mibafata ewebii ni ejɔɔ amɛhe nɔ amɛhã lɛ ni efee ekome akɛ weku kɛmiijá lɛ lɛ ahe.”